حكاية الكُوْع

كامل النصيرات

الحوار المتمدن-العدد: 1681 - 2006 / 9 / 22 - 07:45
المحور: كتابات ساخرة
    

من كثر ما قرأت هالأيّام عن الواسطة والرشوة والمحسوبية والفساد ..فَرْطَتْ البيلية تَاعِتْ عْجال مُخّي..فأثرتُ أن أروي لكم هذه الحكاية ..لعلّ فيها عبرة للي حاب يستفيد..:-
اتصل مواطن غلبان ( عايف روح الدَّخْنَة ) بمسؤول كبير من ماركة ( طَعمي الثُّمْ تستحي العين ) .. وقال له المواطن : يا بيك ..إحنا على موعدنا وإلاّ صار تغيير ؟؟ فقال المسؤول بلهجة المتواضع : عيب ..شو تغيير..تعال أنا باستنّاك ..ورَح تشوف إنّو واسطتي ما تخُرّ المَيّة ولا الميرندا ولا الكابتشينو ..!! فقال المواطن بفرح وصوت حزين يقطِّعْ القلب والكبد والطحال : الله يسعدك يا بيك ..ساعة ونُصْ وأكون عند حضرة جنابك ..!! فقال المسعور الكبير : وليش ساعة ونُصْ ..كُلْ مشوارك لعندي ما يوخذ رُبع ساعة ..؟؟ فقال المواطن : والله عارف يا بيك ..بس الساعة ورُبُع الثانيات عشان أدبِّر أُجرة الطريق حتى أَقْدَرْ أصل لعندك ..!! فتنهّد المسؤول المسعور وقال بلهجة أسى مُصطنعة : الله يعين يا مواطن ..الله يعين ..بس شو رأيك ما دام بعد ساعة ونُصْ تيجي ع البيت أحسن من مكان الشغل ..؟؟ فقال المواطن : زي ما بدّكْ يا بيك ..بس بلا مؤاخذة بيتك ما أندل عليه ..!! فقال المسؤول : هاي بسيطة ..أنا بأدلّكْ عليه..!! فقال المواطن : يا الله شو بأغلبَكْ يا بيك ..إنت ما فيه زيّكْ ..كمان إنت بنفسك بدّك تدلني عَ بيتك ..هيك المسؤولين وإلاّ بلاش ..؟؟!! فقال المسعور الكبير : العفو العفو.. هذا واجبي ..أصلاً ليش أنا موجود ..عشان أخدم كندرتك ..وهسّة بلاش أطول عليك ..وركِّزْ معي ؛ رَحْ أعطيك عنوان بيتي ..:-
وانت طالع بالتكسي ..شُفْتْ العمارة إللي أشتغل فيها..اتركها وراك و بلِّشْ عِدْ خمس شوارع ..العمارة إللي هناك في وجهك على طول ..افتح باب التكسي بـِ ( كوعَكْ )..وروح على باب العمارة ..اضغط على زر الأسانسير بـِ ( كوعَكْ )..رح يفتح ..أدخل جوّاتو ..حُط على طابق رقم ستة واكبس الرقم بـِ ( كوعَكْ )..بعد ما تصل الطابق السادس ..اطلعْ من الأسانسير ..رح تلاقي باب حديد على درج زغير .. بـِ ( كوعَكْ ) افتح الباب ..واطلع الدرجات ..بآخرهن ..على إيدك اليمين فيه باب ..هذا باب شقتي ..رن على الجرس بـِ ( كوعَكْ )..رح أفْتَحْلَكْ أنا بنفسي الباب ..ويا مِيْتْ ألف أهلاً وسهلاً و مرحبا فيك ...!!
قال المواطن : يا بيك ..عنوانك سهل سهل كثير ..بس إللي مش قادر أفهمه ..ليش أستخدم ( كوعي ) في كل شي ..ليش ما أستخدم إيدي مباشرة ..؟؟ عندها ..ضحك المسعور الكبير ..وضحكته وصلت إلى آذان كل الأيتام الذين بلا ظَهْر ..وقال : كيف بدّك تستخدم إيدك وإنت حامل شويّة هدايا..ما رَحْ تقدر تستخدمها يا مواطن ..عشان هيك لازم تستخدم كوعَكْ ..صحيح إنك مواطن دمّكْ خفيف ...ها ها ها ها ها ها ها ها ها ...؟؟؟!!!

#كامل_النصيرات (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات