|
كوفيد-19 والباي بولر
مصطفى التركي
شاعر
(Mostafa Eltorky)
الحوار المتمدن-العدد: 7184 - 2022 / 3 / 8 - 18:29
المحور:
الادب والفن
لقّحت جسمي ينام على أسفلت أوضتي وصحيت في ساعة قبل ما شمس المرض تبقى عمودية -فين السجاير؟ فين؟ وليه الأوضة هادية؟ إيه اللي حاصل؟ ليه الشوارع برضو هادية؟ يعني إيه؟ لازم امشي السكة دي وأجيب سجايري؟ ابن اخويا فين يجيبلي؟ خد وهات عقلي شاط إرتباط قلبي حطوه احتياط إيه اللي انا بقوله ده كله؟ جبت؟ هات. بعد ما ولّعت واحدة عرقي نازل نقطة نقطة جسمي عمّال يترعش وبدأت اشوف الخيال ويا الحقيقة بدون كسوف
المطر نازل ياخدني المطر ده فيه كورونا دي مؤامرة عالمية يا ناس سيبونا لأ ده وهم لأ حقيقة لو وصلكم أي حاجة كلمونا. هو ده كاتب في بوست كلام يلقّح قصده مين؟ ده أكيد لازم قاصدني والكلام ناصبه كمين إيه اللي جاب أمريكا بيتنا دخّلوها إزاي منين؟ لأ ده وهم لأ حقيقة عقلي ليه رجلين وماشي ونفسي أعرف ماشي فين؟ سيبوا قلبي إنتوا بتشدّوه وعايزين تقتلوه فين قزازة الميّه ارش الأرض؛ عاملين لي عَمَل كلكم جعانين وناويين تاكلوا جسمي بعدها تحلوا بفواكه طعم اسمي -فوق لنفسك يا ابني فوق =ده أنا فايق وفوق -ليه بتضرب في الهوا رصاص الكلام =كنت عايز أقول للناس بإني مش تمام إوعوا من وشي أنا موجود هنا أيوة عارف كل حاجة كل حاجة كل حاجة
قومي يا ستي كورونا جت علينا والمطر جايب كورونا فيه بشر بيموتونا أيوة خايف بصوا على حركة سناني والشفايف أيوة قلقان م النهاردة عايز آخد البشر جمعًا في حضني لأ ده وهم وناوي لجهنم ياخدني هاتوا مصحف أقرا فيه هاحتويكم واحمي نفسي اتحامي بيه البشر عايزنني اموت يا خراب كل البيوت يا كورونا كل دول راقبوني حاسبوا يراقبوا فيكوا بصوا إيدي من السلام شايلة إيديكوا -يا ابني إهدى =هاتوا مصحف -ما انت ماسكه الطريق يكشف لشخص مدى تماسكه واللي يهذي حد زيي ليه المرض ساب كل واحد ع الطريق ولقيته جايلي؟
في انتظار الكون بحاله ياخدني منكوا فيه أكيد قوة غريبة فوقنا إحنا البشر، ساعة ما حاولنا نفكر، دوبنا، سيحنا
آه يا راسي الصداع يا ناس قسمني والألم نابه طويل غارسه في فصي الشمال أي برشامة احتمال لما أبلعها تكون جاية مقاسي آه يا راسي
جابوا دجال خفت منه دس في الميّه مُهدئ قال كلام مش فاكره عني
جابوا دجال غيره تاني خفت أكتر كان سمين ومعاه عصاية قال حاجات بالهمس خفت قال وقال ووافقت طبعًا قاللي شوفت؛ قلت: شوفت سابني على إني كويس بس انا في الوهم طوفت
جُم ملايكة أو مشايخ أو ملايكة في المشايخ أذّنوا في البيت عشان يرعبوا صنف الشيطان نمت على حجر المشايخ قال رُقْيَةْ هديت معاهم جابوا ماء ورد وسقوني قالوا: واللي اتبقّى منّك ادلقه ع الجسم من فوق الكتاف. ده اللي خلّاني آمنت لما شوفت ملايكة فيهم شالوا ألمي، الخُفاف
خفت على صاحبي ندهته دوست على إيده وقلت: الناس يا صاحبي
الألم أتاريه مخبّي
قبل ما ادخل للطبيب كنت شايف كل حاجة لابسة حاجة اللي جوا التاكسي صاحبي واللي مرسوم ع الحيطان ده رسالة ليا والعصير فيه سم فيا أي حاجة خارجية ساكنة فيا متدارية
شخّصوني باي بولر زي فان جوخ ف زمانه بس كل الفرق بيننا إنه لما إنتحر عشت انا واقف مكانه.
#مصطفى_التركي (هاشتاغ)
Mostafa_Eltorky#
كيف تدعم-ين الحوار المتمدن واليسار والعلمانية
على الانترنت؟
رأيكم مهم للجميع
- شارك في الحوار
والتعليق على الموضوع
للاطلاع وإضافة
التعليقات من خلال
الموقع نرجو النقر
على - تعليقات الحوار
المتمدن -
|
|
|
نسخة قابلة للطباعة
|
ارسل هذا الموضوع الى صديق
|
حفظ - ورد
|
حفظ
|
بحث
|
إضافة إلى المفضلة
|
للاتصال بالكاتب-ة
عدد الموضوعات المقروءة في الموقع الى الان : 4,294,967,295
|
-
ذكريات
-
قصيدة الأراجوز
-
وقت الضغوط
-
الغلبان
المزيد.....
-
رسميًا إلغاء مواد بالثانوية العامة النظام الجديد 2024-2025 .
...
-
مسرح -ماريينسكي- في بطرسبورغ يستضيف -أصداء بلاد فارس-
-
“الجامعات العراقية” معدلات القبول 2024 في العراق العلمي والأ
...
-
175 مدرس لتدريس اللغة الصينية في المدارس السعودية
-
عبر استهداف 6 آلاف موقع أثري.. هكذا تخطط إسرائيل لسلب الفلسط
...
-
-المُلحد-.. إبراهيم عيسى: الفيلم هو الدولة المدنية التي نداف
...
-
ساويرس يرد على سؤال بشأن فيلم -الملحد-.. وهذا ما قاله عن -من
...
-
-رأس الخس- يلاحق تراس من جديد ويخرجها من المسرح (فيديو)
-
هيفاء وهبي تعلق على قرار منعها من التمثيل والغناء بمصر بآية
...
-
بعد أزمة فيلم -الملحد-.. هل تأجل العرض بمصر أم مُنع العمل؟
المزيد.....
-
في شعاب المصهرات شعر كتاب كامل
/ كاظم حسن سعيد
-
(مجوهرات روحية ) قصائد كتاب كامل
/ كاظم حسن سعيد
-
كتاب نظرة للامام مذكرات ج1
/ كاظم حسن سعيد
-
البصرة: رحلة استكشاف ج1 كتاب كامل
/ كاظم حسن سعيد
-
صليب باخوس العاشق
/ ياسر يونس
-
الكل يصفق للسلطان
/ ياسر يونس
-
ليالي شهرزاد
/ ياسر يونس
-
ترجمة مختارات من ديوان أزهار الشر للشاعر الفرنسي بودلير
/ ياسر يونس
-
زهور من بساتين الشِّعر الفرنسي
/ ياسر يونس
-
رسالةإ لى امرأة
/ ياسر يونس
المزيد.....
|