قاتل القرموط ( بطّل تنغير ياض )

ماجد الحداد

الحوار المتمدن-العدد: 6771 - 2020 / 12 / 26 - 17:37
المحور: دراسات وابحاث في التاريخ والتراث واللغات
    

واحنا في المتحف المصري كانت صديقتي الباحثة والمرشدة السياحية سارة حسين دخلت علطول جري على التوابيت الحجرية وما اخدتش بالها ان صلاية الملك نعر_مر _المدعو بمينا أو ميني موحد القطرين وطبعا احتمال يكون كل واحد فيهم ملك مختلف عن التاني _ نقلوها من مكانها في الممر ايمن المدخل بسبب تجهيزات نقل المتحف .
المهم قلت لها تعالي هنا رايحة فين هو ينفع ندخل المتحف من غير ما نصبح على جدنا الاول ؟
طبعا الصلاية دي عشان تدرسها صح مكن تقضي فيها شهور وسنين تفاصيلها مخيفة ومدمرة لكل اللي ورثتوه ... بس ما علينا
اتناقشنا في اسم الملك نعر_مر وهو مكتوب بالخط الهيروغليفي ما انتم شايفين في الصورة تحت ...
مخصص سمكة _ نعر _ ومخصص المطرقة _ مر _ والاتنين معناهما مطرقة السمكة أو قاتل السمكة ... القرموط
طب المشكلة أن دلالة ومخصص ( نعر ) في الهيروعليفي احيانا بيترسم على شكل سمكة بلطي مش قرموط وده ساعات بيخلي اللغويين يعتبروا أن كل مو نعر ممكن تعميمها كمرادف من مرادفات اسم جنس السمك عموما .
بس لو بصينا لاسم الملك هتلاقي أنه مخصص سمكة معينة بالذات وحاكم جنبها ( مر ) مطرقة ده هيخلينا نقول إن المقصود هو سمكة القرموط _ السلور _ بالفعل ...
استنى مستعجل ليه !!!
انا اقترحت أن السمكة اللي منحوتة هي سمكة _ الرعاش أو الرعاد النيلي _ مش القرموط المتعارف عليه ، وصحيح أن سمكة الرعاش اصلا من نفس.عائلة القراميط لكن بتتميز بأنها بتكهرب اللي بيلمسها ، بتفرز مواد كيميائية معينة بتعمل على إنتاج طاقة كهربائية كنوع من الحيل الدفاعية عن نفسها .
فانا اقترحت انها ممكن تكون هي دي بالفعل مش القرموط العادي ، لان اكيد الملك هيبقى أكثر تميزا وقوة لما يتسمى انه قاتل السمكة دي بالذات لصعوبة صيدها ... وبالتالي دلالة على أنه رجل المستحيل ويقدر بالفعل عن استحقاق أنه يخرج البدو من شمال مصر ويقطع دابرهم .
الفكرة حلوة ومنطقية ...
بس لما رجعت دققت في بحثي في البيولوجيا لقيت أن النقش بتاع ( نعر) في اللوحة له زعنفة على ظهر السمكة ، والرعاش مالوش زعنفة ظهرية ... وفي الصورة القرموط عيونه واسعة وجاحظة
يبقى فورا زي الشاطر كدة مادام لقيت الفرضية فيه أدلة ضدها يبقى فورا لازم نتنازل عنها وتتبنى النظرية اللي لقيت أن ليها دليل واضح .
يبقى كدة ما قدمناش غير نقول إن المقصود بالفعل سمكة القرموطي العامية دي اللي بتعيش في الأنهار والطين ، مش القرموط الرعاش الكهربائي
طب ليه نعرمر اسمه كدة ؟
الله اعلم ممكن كان عمله قبل الملك وتأسيس أسرته لو كان هو الملك الاول يعني في أسرته ، يكون بيشتغل صياد قراميط .
أو أن اسمه بيرمز أنه قاتل البدو لأنهم كتير وما بيموتوش بسهولة ويفضلوا لليدين في الحبال والصحاري لحد ما يلاقوا فرصة أنهم يحسوا ويهجموا تاني ، لأن القرموط ممكن يعيش بأقل الإمكانيات الحيوية وفترة طويلة جدا برة الماء _ وكأنه حيوان برمائي مش سمكة _ وكمان تحت الطين وترجع له الحياة بمجرد عودة المياه في الوادي .

بس الاهم بقى ليه خلوا ( مر ) المطرقة هي رمزه ؟
ده لان جدتك وامك لما كانوا بيشتروا القراميط من السوق ، كانت بتفضل حية لمدة طويلة من غير ماء ، فكانت الأمهات ما بتعرفش تتحكم فيه عشان تقطعه وتطبخه لأنه بيتحرك كتير وبيتزفلط
يقوموا يضربوه على رأسه ( بإيد الهون ) عارفين الهون النحاسي بتاع زمان اللي بتدقوا فيه التوم والكفتة و بتستخدموه كشبيه لأجراس النترة البقرة حاتحور في حفلات السبوع ؟
ده كان حل ناجح جدا انها تدوخ القرموط عشان تشل حركته ويموت بسرعة ... وكل ما الضربة تكسر جزء من جمجمته موته هيبقى اسرع .
واحيانا بياعين القراميط اصلا بيعملوا كدة لو مش عارف يمسك السمكة ويحطها لك في الكيس .
وهو ده اللي كان بيعملوا أجدادك بالضبط من قبل الملك المدعو بمينا !!!
وهو ده السبب الوحيد اللي ظاهر قدامي من خلال السلوك الانثروبولوجي المعاصر داخل مصر للتعامل مع القراميط اللي يفهمنا ليه اختاروا المطرقة عشان يعبروا بيها عن قاتل القراميط .

انا عارف ان البحث طويل شوية بس اصبر لسة التقيل جاي ورا
تخيل ليه المصريين سموا القرموط ( نعر )
الحقيقة أن المصري كان بيستخرج لغته من الطبيعة ومحاكاتها ... يعني كان يسمع الكائن بيطلع صوت ازاي ويربط الفوناتيك ده بالحرف المميز له ، فيقوم يرسم اشهر حرف او صوت على شكل المخلوق أو الظاهرة الطبيعية دي .
الغريبة أن القرموط بيطلع صوت من حلقه زي صوت حرف العين بالضبط ينخر ويبهدل الدنيا ويطلع صوت شبيه بحرف العين تمام .
عشان كدة سموه ( نعر) لتمييز حرف العين والراس دليل على الاصرار وعظم التوقف والمجهود
طب كفاية كدة ؟؟؟
لسة ...
الأغرب أن الكلمة دي اخذتها اللغة العربية بحذافيرها زي ما هي واطلقتها على نفس الدلالة كمان يعني الصياح والصوت العالي من خيشوم ... يعني حاجة تشبه النخر كدة .
( وفي اللغة العربية كلمة نَعَرَ تغني : صَاح وصَوَّتَ بخيشومه ) من المعجم الوجيز ...
وابحث في القاوس براحتك وشوف كل الدلالات اللي بتعبر عنها وقريبة منها كمان .
وكمان في اللهجة العامية تلاقي الواحد يقول للتاني اللي صوته عالي :
( مالك يا وله انت بتنعّر كدة ليه )
ما تبقاش بقى تعوج لسانك زي الاوربيين اللي مابيعرفوش ينطقوا كل الحروف الحلقية وتقول عن جدك ( نارمر ) اسمه ( نعرمر ) بالعين

ورغم كل ده ييجي واحد يقول لك بين اللغة المصرية والعربية حرفين جر ...
والتاني يقول لك قطعوا لسان المصريين عشان يتكلموا العربية بالقوة
والتالت يقول لك العربية اقدم لغات العالم

عندك فيديوهات لأصوات القرموط طبيعيا والتاني واحد يقلده
https://youtu.be/k2UN_0-KDkg
https://youtu.be/suLEi6KNnUE

وهنا هتلاقي بحثين كاملين عن اصوات القراميط
https://jeb.biologists.org/content/217/22/4068
https://jeb.biologists.org
/content/217/22/4068

وده الوصف لجسم القرموط الرعاش
https://animaldiversity.org/accounts/Malapterurus_electricus/ص

والثلاث صور اس

#ماجد_الحداد (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات