المصريين لما رفعوا الكواليس كشفوا عن الخفافيش

تمارا سعد فهيم

الحوار المتمدن-العدد: 1613 - 2006 / 7 / 16 - 00:07
المحور: اليسار , الديمقراطية والعلمانية في مصر والسودان
    

ونقول مالك يا بنى آدم نظراتك تايهة ليه؟ أدمنت الحزن ولا أيه؟!!، بتقول الأكتئاب والإحباط مغطينك وفى عز الحر من البرد الشتا حمينك! ، انت بتقول ايه؟! كلامك غريب أوى كده ليه !!. وكمان بتقول احتقان،حراك سياسى واجتماعى، ويمكن فتنه؟!هى وصلت لكده كمان ولا أيه!! الموضوع مش كده خالص، اتحسبط يا سعادة البيه!!. ، كل الحكاية أن المصرى إنسان عنده أوجاع وفى قلبه فوران و بيعانى من الفقر و الحرمان، والبطالة وقتل الأحلام.ونطلب منه بعد كده أيه؟.... يبتسم!!! طيب أدينى أمارة الإبتسامه ليه؟! وطبيعى ولما يحصل احتقان فى الصدور نفتكر الأوجاع، والصراع يتولد فى النفوس، والصداع يفجر العقول، ويضحك علينا الظلام ويقول لنا انا طاقة النور ونمشى وراه فى طريق ما نعرف بدايته من نهايته طريق مجهول شعاره هرتقة العقول.
ونحبس نفسنا بكامل فكرنا جوه قوقعة نقصنا ونقول اصلنا وصلنا للنور واتارينا متكعبلين فى الحفره اللى تحت رجلنا و نجعل بلدنا شماعة اوجعنا، وفى الظلام تتولد صرعات فى النفس يصبها احتقان، وبعدين نقول حراك مش عارفه بعد كده نفك العقده ازاى. منين البدايه و على فين النهايه، قوقعة تيهان مافيهاش هوان؟!. ده باه اللى اسمه فوران فى النفس البشرية، نتج عنه حراك واحتقان ويمكن فتنه كمان.
وابعادهم ورواسبهم ايه مش فاهمين ومش مدركين ويمكن مدركين وناسين تاريخ المصريين. و امراض فى النفوس وليدة بذرة الحرمان ورحيل الأحلام اتفشت فى النفوس و نبتت ثمار حصاده ذى ما انتو شايفين هيستريا فى الشوارع والميداين.
المصريين وصلوا لمرحلة انهم بيحلموا بأحلامهم ، و أمنو ان الطريق اتقفل قدامهم ومش هايشوفوا السعادة فى عيون أولادهم وبناتهم!. لازم ناخد بيدهم، ونساعدهم يتصالحوا على نفسهم، بعد أعتقالهم جوه سجن أفكارهم، ساعدوهم يرفعوا عن طموحاتهم حصارهم ، وبالإفراج عن المسجون آعلاه هاتعود له تانى الحياة، وطبعا ها ينسى آلامه وأكيد ها يحافظ على سلامة أحلامه ويطرد الهرتقات من قاموس أيامه. مصر لو ذاقوا طعمها ها يقبلوها بحلوها ومرها،.

المصريين مش لاقين فرحتهم!! كتمين فى قلوبهم حسرتهم. وفى الوقت المناسب ظهروا اللى خلف الستائر مترقبين ومنتظرين وقالوا "نحن هنا ما تغفلوش عننا". ومن الكواليس لعبوا بنقطة ضعف المصريين - ظروف وأزمات أقتصادية وطبعاً نتيجة طبيعية حادثة تلقائية رد فعل مشاكلنا الإقتصادية!!. وبسرعة المساكين لقطوا الطعم ومسكوا فيه وقالوا مصطلحات سياسية و علمية وياريت فاهمين أبعادها!. واتفرجنا على مسرحية مثيرة جدا للسخرية والأبطال هما المصريين خلوهم ممثلين لعبوهم زى العرائس و فى أيديهم الخيوط ماسكين. وكلاً بيغنى على ليلاه .
محتاجين نعالج من الجذور نرسم أحلام تبصر النور، مش أوهام تولد الكبت فى الإنسان، وبعد الكبت والغليان لازم انفجار مش عايزة كلام و اتفرج على اللى حصل للقضاه والصحفيين وضحايا عباره اصحابها سافروا ليوم الدين!!!. حزن مالوش حدود، لكن أكيد فيه طاقة نور كشفت لنا عن الخفافيش اللى عايشين فى الكواليس.
و خرجوا الخفافيش من الكواليس رافعيين شعارات بيقولوا حراك احتقان. عندى سؤال يا للأستاذ يا اللى رفضت دعوتك للمظاهرة فى التحرير، هو انت زعلان ليه؟ خايف من انفلونزا الطيور ولا ايه؟ وتعبان ورافض الفراخ السمان وبيطلب الأرانب، طيب لو اكل ارانب تفتكر تنسى انك فى حالة احتقان؟! ممكن!! و مش بعيد تقول عفى الله عن ما سلف وتسامح كمان. خلاص ايدى على كتفك و ندرس مشروع مزارع للأرانب اصل ايد لوحدها ما تسأفش، واحنا اكتر من سبعين مليون، يعنى لو سأفنا ممكن كففوفنا تزلزل الكون، وافتكروا ان احنا الفراعنه اللى تراثنا شل عقول الكون لكن ها اقول ايه الدنيا اصلها مرجيحه ممكن نكون النهارده تحت وبكره فوق.
وكفايه باه يا كفايه والهتافات والشعارات. و لما أفكر فى المصريين المتأصلين الأقيهم بشغلهم و بحياتهم وحياة ولادهم مهمومين و مش فاضين يتمنوا يزوروا الكورنيش والوقت حتى مش لاقين. مش عارفه يعنى اللى واقفين فى مظاهرات بيجيبوا الوقت منين؟ وينادوا بطاله ويمكن شغلهم سايبين! ولا مكسلين! ويختلط العاطل مع الباطل، وافرزوا بأه يا شاطرين لو فاضيين المصريين المتأصليين من المضروبيين.


والجيران ، يجيبوا سيرتنا ويحطوا فوق الخبر خبريين، وينسوا بلاويهم ويفتكوا بلاوتنا ، أصل اللى بيتوا من الزجاج هو اللى بيشمت فى الجيران ويفتعل المواقف كمان يمكن يستريح ويفك عن نفسه ويفضفض بنظرية الإسقاط مساكين اصل صوت الرصاص جلب لهم انفجار وخلل افكار. وهانقول ايه جيرنا بس مش لازم نكون زيهم ونتعدى منهم .
ياريت احنا نكون واعيين وفاهمين على الأقل عشان احنا المصريين ابو الهول والأهرامات لسه عايشين يشهدوا لنا ويفكرونا لو احنا ناسيين، طيب 6 أكتوبر يشهد لمين مبارك شعبى مصر البركة مش للخايبين .
عارفين حل المشكلة ديه ايه، نتجاوزها وبلاش نعيد ونزيد كتير فيها و نبكى على اللبن المسكوب، محتاجين نعدى مرحلة اللى حصل واللى كان. محتاجين نتفوق عليهم و على أنفسنا وننادى عليهم ونقولهم "يا خفافيش المعاناة أصلها عندكم،عقده جوه فكركم ، ياريت تعالجوا نفسكم، وأرحمونا مش فاضين لكم!. ونركز فينا ونعرف الطريق ده نهايته لينا و لا علينا، نلملم أشلائنا بأيدينا عشان الوقت بيتسرق من حولينا، وناخد حظرنا ونعالج أفكارنا، ونواجه مشاكلنا ونعرف أخطارها وأبعادها ونستوعبها ويا نحلها يا نحللها. محتاجين نعرف نفسنا ونمسك بمفاتيح فكرنا، ويا سلام لو عرفنا النهاية قبل البداية ساعتها مش هانكون تايهين، بالعكس هانكون المصريين الحقيقين اللى عارفين رايحين على فين، مستقبلنا فجر بكره جديد، شروق لازم يكون له نور ويكون أبن أصول مش لاقيت مجهول الوالدين وآه من المجهولين

# تمارا_سعد_فهيم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات