كاسة قهوة ومحرمة وطابور..

ضيا اسكندر

الحوار المتمدن-العدد: 6749 - 2020 / 12 / 1 - 16:39
المحور: كتابات ساخرة
    

أثناء تواجدي في الطابور لشراء الخبز، كان يقف خلفي رجلان يتسلّيان، والأصحّ يتباريان في إبراز أخلاقهما الرفيعة من خلال سرد كلّ منهما لقصصه وخصاله مع النظافة وضرورة التقيّد بالتعليمات الحضارية. وقد أعجبني حديثهما وأحببتُ أن أنقله إليكم عسىاه يرسم بسمةً على وجوهكم الطيبة:
الأول: يا أخي فعلاً النظافة حضارة. ويا ريت كل الناس يتقيّدوا بنظافة الشارع. بتصدّق؟ من يومين اشتريت من كولبة عالرصيف كاسة قهوة. هيك إجى عبالي. والله يا أبو الشباب انتعتلّك سيكارة وشربتا مع القهوة وأنا عمتمشّى. وبعد ما خلّصت طفّيت السيكارة بقعر الكاسة وصرت دوّر على حاوية حتى ارميها فيها. وبقى بتشوف حاوية!؟ الله وكيلك، ما إلك يمين تحلّفني، نص ساعة وأنا دوّر حتى لقيت حاوية. وبكل هدوء رميت الكاسة مع عقب السيكارة فيها. تخيّل يا رجل، نص ساعة والله وأنا دوّر!
الثاني: ولك أي بصدّقك. لأنه مبارح كنت ماشي بالشارع. وسبحان ألله يا أخي إجتني عطسة مفاجئة. قمت سحبت محرمة من جيبي وعطست فيها. بالمناسبة لا يمكن جيوبي تخلى من المحارم أبداً رغم غلاها. يا أخي ضروري التقيّد بتدابير الوقاية من كورونا. المهم بلا طول سيره، والله يا أبو الشباب وصرت دوّر على حاوية. بتعرف؟ ساعة كاملة وأنا دوّر. دوّر دوّر.. هيك حتى ألله حضّاني بحاوية. مع أنو كان فيّي بلا مؤاخذة، دعْبلا للمحرمة وإنقفها بأصبعي على شي زاوية عالرصيف. بس أعوذ بالله، أي والله ما بعملها لو يقصّوا إيدي.
الأول: أيييه.. يا ريت لو كل الشعب متلي ومتلك، أقسم بالله لكنا بطليعة البلدان المتقدمة بالنظافة. بس شو بدّك تساوي؟!
الثاني: أوف.. أُف.
ساد صمتٌ قصير وإذ بأحدهما الذي يقف خلفي مباشرةً يلكزني بظهري كي أتقدّم بالطابور قائلاً:
- مشيلك شي خطوة لقدّام ولوو..!
التفتُّ إليه مبتسماً واسترجعتُ خلال ثواني ما كنت قد سمعته منهما وقلت له:
- شو رأيك يعني بلْتصق بلّي قدّامي مثلاً؟! هلّق كنت عم تحكي عن ضرورة التقيد بتدابير الوقاية، شو عدا ما بدا؟!
أجابني وقد لاحظ أنه لم يكن موفقاً بلكزته تلك وقال:
- يعني لا تخلّي حدا يوقّف قدّامك وياخُد دورك.. هيك بقْصد. ولووو، ما حدا بيتحمّل كلمة أو لكزة بهالأيام؟!

#ضيا_اسكندر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات