لاچنه رحنه اوجينه

ميسون نعيم الرومي

الحوار المتمدن-العدد: 6581 - 2020 / 6 / 2 - 23:45
المحور: الادب والفن
    

كلما يهل الگمر
اتمعـنن ابنوره او احن
نجمات چن زفة عرس
والليل كحله للرمش
السمه شذرات اوضوت
عالرگبه گردانه
النخل يتمايل غنج
غنوة فرح بسمانه
والنسمه وي طرت الفجر
غنت فرح نهرانه
يادجله يالمايك عذب
حلم اوأمل عنوانه
***
الموج عالي يابحر
والروج يتهاده اويرد
نوبه ابفرح نوبه ابغضب
الريح تلعب لعب
ما تنحزرلا تنعرف
مركبنه ضاعت وجهته
قبطانه تاهت عرفته
متعوب يا ليل السفر
والعمر راح اتعده
الصبر گاعه مولحت
ماضن يخضر ورده
أحاه يا ديرة هلي
خيرچ الغيرچ عده
***
حرگوا الحنطه والشلب
فلاح دمعه ابچفه
عامل يحومي ع البعد
تحفر العبره ابخده
چم دوب نبچي اوننتحب
والحسره تچوي بالگلب
يا لليل عـَـشعـَـش بالبلد
ناشر عباته اوحزنه
واشعلنه شمعه للشمس
يوم او تمر تذكرنه
اتعبنه يادنيه بعد
من محنه نغزل محنه
***
الوطن باگوه الوطن
لتگول يمته اوتحن
اسكت اومامش رجه
مات الحلم بسك تون
كافي يروحي بعد
طالت اسنين البعد
والعين تربي اوترد
تترجه يوم امن الصبخ..
يزهر او ينبت ورده
سيس بلمنه ابلا هدف
والدهر يلعب بينه
-----------------------------------
2 / حزيران / 2020
ســـــــــــــتوكهولم

#ميسون_نعيم_الرومي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات