هل التجارب علي الحيوانات حرام ؟

أيمن غالى

الحوار المتمدن-العدد: 6527 - 2020 / 4 / 1 - 23:18
المحور: كتابات ساخرة
    

في شغلنا علي حيوانات التجارب؛ أعترف إننا كنا فعلا بنعذبها ..
لو عندنا فار تجارب؛ بنربيه محبوس في بوكس؛ بياكل نوعيات أكل وبكميات علي مزاجنا؛ ما يعرفش يجري ويلعب وياكل براحته أو علي مزاجه أو إنه يقابل بنت الحلال ويعيش حياته ويكوّن أسرة ..
وفجأة؛ نحقنة بميكروبات وكيماويات مُسرطنة وبَلا أزرق، وأكيد المرض بيتعبه وبيضايقه وبيعكنن عليه عيشته ..
ويوم والتاني ويصدر حكمنا عليه بإعدامه؛ علشان تتعمل فحوصات علي جميع أنسجة جسمه .. وفي آخرة المتمة تترمي أشلاؤه في صفيحة الزبالة ..
طبعا ناس كتير حا تستاء من الموضوع وحقوق حيوان وكدهون .. وإننا حرمناه من حياته وعكننا عليه عيشته ..

طيب تخيلوا كده لو الفار ده من أصل بوذي أو هندوسي ؟
حد حا يقول لي: إشمعني ؟
أقول لكم ..
الديانتين دُوكهُمَّه عندهم عقيدة "تناسخ الأرواح"؛ إللي بتقول إن الخالق خلق مجموعة محددة من البشر، وزاغوا وعكوا وهلفطوا في حياتهم .. أووم إيه؛ ضروري يمروا بمراحل تطهير لغاية ما يوصلوا لمرحلة الرُقيّ الروحي والنقاوة إللي تم خلقتهم عليها في بداية الخلق؛ علشان يرجعوا ويعيشوا حياة النعيم والخلود الأبدي في الجنة ..
طيب يتطهروا إزاي ؟
الإنسان الشَرَّاني لَمَّا بيموت وحسب درجة شره ووساخته؛ روحه بتدخل في كائن وضيع دنئ، وبيتولد مرة تانية في صورة حشره أو طائر أو حيوان (حسب مجموعه ومكتب التنسيق)، وبيكمل حياته وبيموت وبيترقي لكائن أرقي وهكذا لغاية ما يرجع إنسان مرة تانية، ويا يعيش محترم ويرجع لحالة الرُقيّ الروحي (النيرڤانا) إللي وصل لها بوذا ويدخل الجنة؛أو يِعُك ويرجع يعيد الكورس مرة تانية ..
ويبقي حظه حلو إللي روحه يحصل لها تناسخ في كائنات عمرها قُصَيَّر ويِخَلَّص كورسات تطهيره بسرعة، ويا سواد عيشتة إللي روحه ترشق في كائن زي السلاحف ويعيش له 300 سنة شايل بَلْوَّة علي ضهره وماشي يِجَرْجَر في رِجليه ..
وفترة التطهير دي يا تاخد لها عشرات السنين أو مِيّات من السنين وممكن آلافات زي إللي عايشين معانا علي الكوكب النهاردة ..

نرجع للفار بتاعنا
تخيلوا بقي إنه بوذي أو هندوسي ..
أولاً: حا يقللوا أيامه في إنه يعيش في جسم فار
ثانياً: حا ياخد درجات زيادة؛ بدل تعذيب
ثالثاً: ممكن ينط من فار لإنسان مرة واحدة ويوفر كام مرحلة تطهير
رابعاً: وده أهم بند؛ إنه لما يرجع إنسان وييجي له دور مرض - إتعملت تجاربه عليه وهو فار - حا يلاقي علاج وحا يعيش صاغ سليم وبصحة زي الفُل

#أيمن_غالى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات