و ربى يا خايبه للغايبه

تمارا سعد فهيم

الحوار المتمدن-العدد: 1569 - 2006 / 6 / 2 - 10:57
المحور: كتابات ساخرة
    

وبتلفت عليا ومش لاقيانى يـــا غولبى يانى، ما بائتش عرفانى بسلم عليا على انى واحده تانى، و بشبه عليا ومش فكرانى؟!، فلان بيه مشاعره مغلبانى. أصله ياعينى مرهف الحس، جيااااش المشاعر، سفيييير دنيا العواطف، ردااار فى أكتشافه للجمال، دبلوماسى للمرأة اللى بتأسى، وقدامها توسع وتلمع عينيه، وتطير منها الشقاوة على جنحات نسجها من رموش عينيه، وفتح عينك فلان يحب ياكل ايه ؟! (ملبن) اوووكيه!!!. فلان بيه فاكرنى عبيطة ومش فهماه، وانا سيباه ومدلعاه، عارفين ليه؟! عشان هو ضنايه وانا يــــــا ولداه، قالو لى الضنى غالى يمكن أغلى من الحياه.

تفتكروا فلان بيه ناوى على ايه؟!! كل ما يشوف فلانه هانم يفرك فى عنيه و يتلفت حواليه، وذوقه باه أيه، واوووو!!!!!، ما يتحكيش عليه!!!!. والاقيه هناك عندها وهو هنا ماسك فيا بأديه، ومتسألونيش ازاى؟! وليه؟!. وأطبطب عليه واقول يمكن يعقل البيه واتارينى بنفش فى ريشه، وأطول جناحاته عشان يعرف يطير على اللى اسمها ايه؟! .



"وربى يا خايبه للغايبه" مثل قالتلى جدتى عليه، ويزعل منى ويخاصمنى عارفين ليه أصلى بتكبر عليه، ما بسأفش زى الهوانم للبيه، مش عارفه يعنى اجيب له شخشيخه ولااعمل ايه، حقيقى مش فاهمه طيب انا مزعلاه فى أيه؟!!. وأنادى على بنات أفكارى " أه الحقونى أعمل فى الراجل ده ايه؟!" يقولوا لى:- " سبيه ها تتأصص جنحاته و تحمر عنيه وها يحرم يتلفت حواليه وبلاش يا قطه تحبى خنائك خليكى عصفورة وطيرى بجنحاتك"، حزروا معايا فزروا نور عينيه هان عليه!! من غيره لازم ها يتكعبل البيه!!. وينادى عليا يا كتكوته روحتى فين؟؟ اختفتى من قدام عينيا ليه؟!!. أصل الكتكوته طلعت عصفوره فكت كلابشتها وطارت للسما بجنحاتها. وفى يوم راحت تسأل عليه قالوا لها جيرانه "صديقاته الحيات اصتدوه وقعوه فى الفخ و لدغوه سمموا حياته وسبوه" ، حزروا تانى فزروا "قفص فخوا مكسور جواه عصفور محبوس!! عروستى؟؟، تفتكروا حل الفزوره ايه؟؟؟، طبعاً فلانه هانم مع فلان بيه!!. وانا واقفه اتفرج عليه!!!

#تمارا_سعد_فهيم (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات