مؤتمر التنجيد في بيت فسخاني

أيمن غالي

الحوار المتمدن-العدد: 6478 - 2020 / 1 / 31 - 16:27
المحور: كتابات ساخرة
    

○ أنا عاوزة أعمل تنجيد يا زعفراني
● تنجيد إيه يا وِليَّة يا مَهْبوشة علي الصبح ؟!
○ أنا قولت عاوزة أعمل تنجيد يعني حا أعمل تنجيد
● مين إللي لعب في دماغك يا وِليّة علي الصبح ؟
○ كل جيراننا عملوا تنجيد، وقالوا لي إن كل مشاكلك معانا ومع جوزك وولادك؛ بسبب إنك ما عملتيش تنجيد، والتنجيد سُنّة الحياة يا زعفراني
● وآخرتها ؟
○ لازم نعمل مؤتمر تنجيد ونتفق
● مبدأيا موافق على المؤتمر؛ وفيه يا نتفق علي حونكيشة التنجيد يا نلغي الفكرة
○ ضروري حا نتفق
● وحُطي في دماغك إني لا حا أدفع تمن كهارب ولا طَفْح ولا مشاريب في مؤتمر الزفت ده؛ إنتم ما بتصدقوا أعمل لكم مؤتمر، وبتخربوا بيتي أكل ومشاريب
○ حا نقعد إنشالله علي نور الحمام وكفاية نشرب ماية حاف تِبِل ريقنا وحلة المحشي بتاعة إمبارح لسه بخيرها وحا تكفينا في مؤتمر التنجيد
● وأنا موافق ونشوف آخرتها معاكم إيه يا مجانين التنجيد
○ يالَّا يا واد منك له، يالَّا يا بنت؛ أبوكو وافق علي مؤتمر التنجيد
وقعدوا إترصصوا في الطُرقة الضيقة قُدام الحمام؛ علشان ياكلوا ويشربوا وقت المؤتمر ويروحوا يصَّرَّفوا إللي أكلوه في الحمام وما حدش يعملها علي روحه، ومنها يستفيدوا من لمبة الحمام لتقليل تكاليف الكهارب
● يالَّا؛ يا إللي واجعين دماغ أمي على أم التنجيد
قولي رأيك يا نَكَد عُمري
○ أنا عاوزة تنجيد
● وأنت يا أبو طويلة ؟
- عاوز تنجيد
● وأنتَ يا روح أُمَك ؟
.. عاوز تنجيد
● وأنتِ يا مفعوصة ؟
¤ تنكيد
● ينَّكدوا عليكي وعلي أمِك
● أنا كده راجل دقروماطي؛ إديتكم حرية الكلام والتعبير عن إللي في معاميقكم جاكوا حش معاميعكم، وجه دوري في الكلام
تنجيد إيه يا ولاد الكلب إللي إنتم عاوزينه ؟
○ تنجيد الصالون
● وهو إحنا عندنا صالون علشان ننجدوه يا ولية يا مناخوليا ؟
- ننجدوا لنا لحاف
● لحاف إيه يا إبن الهبلة؛ والبطاطين دي نقطعها ونعملها كوافيل ؟
.. ننجد كراسي السفرة
● ومالها الكراسي الخشب؛ واجعه بواسيرك ؟
¤ ننكدوا المراتب
● المراتب دي أنا وارثها من أمي ومراتب أمي خط أحمر، ولا ممكن أبدا حد حا يمد إيده عليها؛ ده إنتم إتولدتوا عليها ونمتوا عليها سنين عمركم، ولولاها كان جالكم موروتيزم في عضامكم .. ما حدش حا يمد إيده على مراتب أمي طول ما أنا عايش وأنا سبب وجودي ودوري في الدنيا دي إني أحافظ علي مراتب أمي
○ المراتب مِكَمْكِمَّة ومِبَشْنِنَّة وريحيتها تِعمي يا زعفراني
● ما هو منكم وكل يوم أقول إعملوا حمام قبل ما تناموا، وما حدش يشرب ماية كتير قبل ما ينام .. حا أجيب لكم كلكم بامبرز منين يكفيكم وإنتم نايمين ؟
المشكلة فيكم مش في مراتب أمي ..
○ قفِّلتها في وشنا يا زعفراني ؟
● يالا يا ولية يا مهبولة أنت وخلفتك الهباب؛ كُلوا حَلِّة المحشي وإشربوا مايَّة كتير علشان ما يكلكعش في بطونكم وإلحقوا أدخلوا الحمام بدل ما تعملوها علي روحكم وأنتم نايمين .. قال تنجيد قال ..
وحا أكتب لكم بيان بمؤتمر التنجيد، وكل واحد يعلقه زي الحجاب في رقبته؛ علشان دماغكم لا تروح كده ولا كده .. مفهوم ؟
○ يشيل ويحُط عليك يا زعفراني .. خسارة فيك إسمك وإللي سَمَّاك زعفراني ظلمك وظلمنا معاك والإسم إللي يركب معاك ويليق عليك هو فسخاني .. يا فسخاني يا معفن

(بمناسبة مؤتمر تجديد الخطاب الديني برئاسة الشيخ الطيب؛ شيخ الأزهر)

#أيمن_غالي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات