قصايد من ديوان ولد مفتون

اشرف عتريس

الحوار المتمدن-العدد: 6294 - 2019 / 7 / 18 - 02:15
المحور: الادب والفن
    

(1) أنا **

مبارح شفت صباحك جاى بينهج
الصوت بيعيط واللون مخطوف ..ياستار


مين اللى بياخدك منّى ..
بعد ماكنت فى صفّى جنّى وعشيق
كل شبر من جسمك عليها بصمة يدى
كل شبر من جسمك مدهونه بلونى
كل حته فينا عارفه امتى بالظبط هنموت ..!!
فين البحر اللى دابت فيه القمره وغرقت فيه الشمس
لجل مايلحس جرحك ويحرق فيه السحر والباطل
ياللى قلبك كان زى الحصان يرمح
مايحسش بالتعب غير لما السبق ينفضّ
ايه اللى فاضل منك دلوقت
غير الوش المطفى وضل متاكل
ياعيون وحشاها الضحكة من زمان
شايفك بالعين دى حقيقه
وبعينى التانية باتخيّلك
بس يكون الجو رايق والقلوب رقيقه زى الندى
من زمن العز والبغددة
تطبطب ع العيال الفقرا والميتين بالحيا ،..
تلمس جراح بالشفا زى النسيم ،..
نشم ريحة البيوت ،..
نتنفس بعض ..!!


تهمونى فيك ..
أى والله تهمونى فيك ..
والناس اتجنت زيىّ..
مانا واعى للدنيا لسه قريّب زى خالى الطيّب اللى مات عاشق
وقدر ينفد من بابها المردود ع الدنيا التانيه اللى بجد
من غير ماينادى عليا ولا ينده عليك .
تهمونى فيك بالكدب ..
!!
على بال مايطيب جرحك
هطلع أجيب اللى محدش جابه
اكمنى قلبى الشقى واقف متصدر مش خايف م الليل يطلع له
فالت من تحت باط جده
مايعرفش الربايه والضرب على خده
مش خايف م الليل –صدقنى
لكن يرعشنى ..
البكا لو طالع من قلب عيل بدمه
لو بان من جواه الحته العتمه وشفت بعينى مقاسها
لو طبطبت عليه وماتحملش
لما ألمس خده ألقاه مش ناعم
أحسك منّى بتتاخد وبتكبر عن سنك
زى مايكون محدش غيرنا – يقدر يستحمل أذيه
فندوق السحر وننزف خطية
ننزف خطية ..
ننزف وبس !!


&&&


(2) بينى وبينك سفر ..يامالك الملك

رهن المشوار غربه وقلق ..
ورغبة قمر فى انتظار شهادة وشارة حجيج
ياقلبى سايق عليك النبى ماتنزف ألم
حوالين الكعبة الاعتراف أول الندم
والدمع لما يشق الخد زى الخليج
فيغيب الجسد
يابوووووى ..
الله اكبر دى حاجة تطيّر العقل
ده مفيش مطرح لقدم زى مايكون يوم القيامه
يادى القلوب الخطيّه اللى بتلف بيت ربنا
متحملين بالعشمم وبدمع فياض يوصل حد الكتاف
وساعة الطواف تلاقى الجسم وحده بينمّل
أما الباقى مش متحمّل ومسنود بالعافيه
الحاجه الوحيده اللى مفكوكه عقدته
لسان مطلوق بالتسبيح وبيذكر الأوراد
تبتدى من عند طرف الحجر
لغاية قدم ابراهيم ..

ياالله ..
أنا حاسس ان الدنيا بتخلص بين السعى والمروه
مش بعد الحلق والتقصير
فى حضن الصفا فى سابع شوط
العالم زحمه موت ..
ياالله مدد مدد
انا ضيفك يا صاحب البيت
مدد مدد
عطشان والبير مابينشفش ..
بس أنا ميت م الخجل ..
ياترى ..
هتحاسبنى ع الزعل ولاّ هتسامح ..
مدد ..
مدد..
مدد..

&&&


(3) طعم الدنيا من غيرك بطعم التراب

صدقنى ..
لما تكون الشمس فى ضهرك
ضلك يكش ع الحيط
فتحط ايدك على قلبك تعرفنى مين ..صدقنى
عمر الريح ماشالت غنوه من غير ماتشد عدودة
والليل لما يهجم يفوت فى الشجر
لاباب يقدر يحوش ولا حاجة تقدر تدارى رعب الناس
كدابه العيال لما تصدّق من غير ماتشوف طعم الدنيا من غيرك
وكيف الطريق يسحب فى العيون يغريها بالمشوار ..من غيرك
قبل ما تتنفس تراب ..
ياقلب متربى فى حضن الغنا
ياللى واقف تدهن جروحك بحزن المقهورين
تحن وتشتهى ..
يادى القلب الملهلب حنين حرّاق
ترافق طيره وغنوة شوق تاخد لونها من روحى
تاخد سرها من عندياتى
تعلا عن صوت الهديل والزقزقة جوايا
بس مين يسبق ويستحمل التلت الأخير م الليل
لجل ما يشوف الحلم فى أوله
كيف بيلمع قبل النور ..!!

صدقنى ..
طعم الدنيا من غيرك
نبيت بلون الكركم وفاكهه مش طايبه
توحشنى روحك الغايبه
يشدنى تحت التراب ..بدنك
صدقنى ..
مليش حد غيرك ..
صدقنى
صدقنى ..


&&&


(4) مد كفوفك للفضا ..
يغريك البحر بالكلام ...

اسكندريه مشقوقه بالبحر
زى قلبى المشطوف بسن الموس
ينزف فراوله وريحة تفاح من حلمه المتخزن جواه
ع البيوت الرطوبه والعيون اللعوبه ومطرح لسه بينقّط حنين
غنيت بالعافيه :
(ياشمس ياشموسه
خدى دمى وغمّى عنيا
مسينى بدم عروسه..)
قبل البحر ما ينشف ويبور
فيبان الجرح وجبل الملح فى عز مانا محتاج
أدفن جسمى فى حزنه العتيق لجل ما تتبل عروقى
يارب الحظوظ ..
رشنى بنافورة هوا مايكونش متبخّر
مش فاكر من قد ايه بصيت للسما وكان القلب مفتوح
اكمنى شايف من غير عينى ما ترمش
جنيّه بجلد ناعم مشدود زى الطبل حىّ
الوش صبوح مورّد والجسم مرمر عفى
بيشتهى آدم زى الأول

الله الله على سرب الحمام الله الله
الله على سرب الحمام لما يدغدغ كتفها بمنقاره الله الله
الله الله على سر جواها الله الله
الله على سر جواها بيعلا عن صوت الهديل والزقزقه وصوت الآدان
الله الله الله
حنّان يابحر ع الغرقانين فتّان ياقلب البنيّه
الأصل ايه يا سكندريه ..
جسم ولاّ روح
حرير ولاّ مارد ولاّ تعبان
ناس بتضحك ولاّ جيش م النمل هلكان
مشوار ولاّ نفس وحدانيه بتنده ع العشيق
والقصد ريح وفيها الشقا لما العيون تبان
لما العيون تبتدى من أول اللمعان
تنادى وتهلل :
لسه ماشبعتش كلام
ماشبعتش كلام
ماشبعتش كلام لسه ...
لسه !!
لسه !!

#اشرف_عتريس (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات