جاسمية و مزة عدس ابو جاسم

مؤيد عبد الستار

الحوار المتمدن-العدد: 6149 - 2019 / 2 / 18 - 23:20
المحور: كتابات ساخرة
    

مشهد تمثيلي ساخر 24
* أبشـرج جاسمية سواها مجلوب السلف
- خير .. أبو جويسم .. شنو البشارة ...ياالله
* مو كَـتلج من يصير مجلوب السلف بالحكومة نبربع
- ما معقولة .. مجلوب السلف يسوي شي بي خير !!
* وداعتج .. سوّه تخصيصات ما كو منها لشهر رمضان
- ليـش لشهر رمضان .. شنو ناوي يصوم من هسـه .
* والله إلج خلك .. ليش ما تعترفين بالخير اللي جاينه
- إي غير تفهمنا شنو الخير .. حتى نعترف بيه .
* جاسمية .. تخصيصات .. خير .. خير
- إي د حجي يا ابو جويسم ..مو طكَـيت مرارتي
* أكَـلج .. كل واحد من عدنه راح يحصل على نص كيلو عدس بشهر رمضان .
- صدك .. جذب .. هيه هاي البشارة ... د كَـول غيرها
* جاسمية ..شوية شوية يجي الخير .. خو ما تردين كلشي مرة وحدة
- يعني على كَـولت المطربة صباح أكل العنب حبة حبة .. مو هيج
* والله .. إنتي ما ترضين بحليب العصافير
- هسه صار العدس حليب عصافير .. و الزقنبوت اللي تشربه .. حليب سباع !
* ما تصيرلج جاره .. ترحين وتردين على حليب السباع .. هوه بطيل زحلاوي نشربه آنه و مجلوب السلف علمود نصفي الحسابات براحتنه.
- الحسابات .. لو الفرهودات ... حتى البشارة ما لتكم شوية عدس .. الله يطيح حايطكم .
* إيـه مو ما تدرين .. اذا كل مواطن ياخذ نص كيلو عدس يعني 20 مليون كيلو عدس ينراد للعراق واحسبيها كل كيلو على دولار دولارين .. هم تصير مليار لو مليارين دولار .. شعبالج كَـوتره .. كلها محسوبة .
- إي صدك .. جوز معدود بجراب مشدود .. شلون حسبتها يابه مليارين دولار .. ليش ما تشتغل محاسب بلانجو بوال ستريت ... اذا مستشارين مجلوب السلف هالشكل يحسبون لا بالله تفرهدت الخزينة بس على العدس .
* جاسمية ... انتي شمفهمج بالحسابات .. ليش هـوّه بس سعر العدس .. مو ينرادلها كومشنات .. وقومسيون .. وخشمك .. إذنك .. وهاي لعمك... وذيج لخالك .. تصير كسر بجمع مو مليارين توصل لثلاث مليارات .. شعبالج .. هاذا حساب حكووووومة ..مو حساب عمج محيسن أبو الثلج .
- ماطول هيج إنت قوي بالحسابات .. كَـوم جيب الدجاجة مال مكرمة صديم حتى أطبخها وي عدسات مجلوب السلف وأسـويـلـك مزة للزحلاوي مال الخلفوك ...بلكت تصحه وتجوز من ها المجلوب .

* رابط الحلقة السابقة
http://www.ahewar.org/debat/show.art.asp?aid=627477

#مؤيد_عبد_الستار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات