جاسمية تلبس سترة صفراء دون علم ابو جاسم

مؤيد عبد الستار

الحوار المتمدن-العدد: 6088 - 2018 / 12 / 19 - 03:49
المحور: كتابات ساخرة
    

مشهد تمثيلي ساخر 21
* اكول .. حصلتي وظيفة بالاطفاء لو بالحريق !!
- لا يابه ... لا بالاطفاء ولا بالحريق
* لعد شنو هاي السترة الصفرة طالعة مثل كاهن بوذي لابستها للغوى .. عيوني كَام تغوش .
- هسه عيونك كَام تغوش من هالستره .. جا ما غوشت من شفطوا ربعك براميل النفط !
* آني يا هو مالتي .. قابل اني واكف على الكاك مال النفط .. هو مال الحكومة ..
والاخذوه ربع مجلوب السلف هم حكومة .. منها واليها .
- تالي صار النفط مال الحكومة .. مو مال الشعب .. هاي بيا قانون وبيا دستور !! النفط مال الشعب .
* جاسمية .. روحي اشتري بعقلج حلاوة .. منو يبيع النفط والبنزين بالمحطات ؟ مو الحكومة ! هو النفط مالها
وهي تبيعه للناس .. بعد يا شعب يا بطيخ ... انتي تظلين بها العقل ...!!
- ابو جاسم ..يبين داهنين زردومك بجم برميل نفط .
* اي تمام .. مو اني شريك مجلوب السلف من زمان النفط مقابل الغذاء . آني يا هو مالتي .. لا بالعير ولا بالنفير .
- اذا ياهو مالتك .. ليش تركض لمجلوب السلف .. وتركب وياه بالسيارة ؟
* هاي هم لاحكتني عليها .. ركبة السيارة .. الله واكبر .. الرجال وصلني لراس الشارع .. الله وكيلج لا ما كل ولا شارب .. هاي خطة العباس .. اذا حاط شي بجيبي .
- ابو جويسم .. مو البارحة شفت الدولارات جوه راسك .. منين ... ها .. خطة العباس .. !! لا تكول مالي شغل .
* يابه شخبصتينه .. هن ّ عشرين ورقة .. تـكَـول شايفه عندي بنك الرافدين .. ماطول عينج وراهن .. اليوم راح اخسرهن .
- لا تلعب بيهن قمار ما تخسرهن .. طبعا .. مال اللبن للبن ... فلوس حرام .. وين تروح .
* جاسمية بروح ابوج ماكلتيلي .. شنو هالستره الصفرة .. مو مال حريق ..والله لا يكتلج .
- لا مو مال حريق .. اريد اطلع بيها مظاهرة .
* وهاي السترة الصفرة شنو ... ما عندج عبايه ، لو طالعة موده جديدة ام الاطفائية !
- لا .. هاي تعلمناها من فرنسا .. تظاهرة بالفرنسي ها الشكل .
* جاسمية .. الزمي حدج .. لا تكولين فرنسي .. تره وصلت لليافوخ .. كلشي سمعنا .. حجي فرنسي ... ركص فرنسي .. ما ادري شنو فرنسي .. هالنوب مظاهرة بالفرنسي ..هاي ما صايره ولا دايره .
- اي انت ما تعرف شي زين بالفرنسي بس تعرف المكسرات ...هي فرنسا اللي طلعت للناس الحرية والمظاهرات والكومونة .
* انا اخو المصرّف .. وصلت للكومونة .. لا بالله احتركنا .. خلي اشلع

رابط الحلقة السابقة
http://www.ahewar.org/debat/show.art.asp?aid=618285

#مؤيد_عبد_الستار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات