حادث -موتو .. سهل-

طارق ناجح
(Tarek Nageh)

الحوار المتمدن-العدد: 6049 - 2018 / 11 / 9 - 14:47
المحور: كتابات ساخرة
    

رآه  صديقه و هو يمشي يَجُّر في ساقه اليسرى .. وجسده  مُنحرف بزاوية مقدارها 45 درجة .. و هو مشهد إعتاد أن يراه من وقت لآخر ، فقال له مازحاً :- تاني يا سعيد .. !!!
فنظر سعيد بطرف عينه اليمنى إلى الخلف ، مواصلاً زحفه ناحية " السوبر ماركت " ، أو هكذا نُطلِق نحن المصريون على كل دكان بقالة حَتَّى و لو كانت مساحته لاتتعدى 2 متر مُرَبَّع ،  مُعَلِّقاً على دُعابته :- قول عَاشِرْ .. عِشرين .. ثلاثين .. دا أنا بعمل حوادث بالموتوسيكل أكتر ما أنا بسوق .. 
سمير :- الله .. !!  كل ده بالموتوسيكل الصيني الكحيان .. اللي كان عجَلَه و رَقُّوها .. أُمَّال لو كان BMW ولَّا Honda .. دا كان زمانك مَيِّت من سنين ..
سعيد :- مَافيش حد بيموت ناقص عُمر .. أنا اللي مِزعَّلني إن كل حادثة من دُوْل  فيها Sequence .. تسلسل يعني   ..  كانوا محتاجين  مُخرِج أكشن .. مش هنقول طارق العريان و لَّا شريف عرفه من جيل الروَّاد .. خَلِّينا فـي جيل الشباب ..   أحمد نادر جلال .. أحمد محمود الجندي .. أحمد خالد موسى .. بيتر ميمي ... أو يمكن ساندرا نشأت ترجع للإخراج تاني مع العبد لله بدل أحمد عز .. و نعمل مع بعض فيلم " منحوس ترانزيت" ..
سمير :- يا عَمْ إتنيل .. إنت فيك عَضمَه سليمه علشان تِهَزَّر .. 
سعيد :- الحمد لله .. أنا عن نفسي بقيت من أشد المؤمنين بالمَثَل اللي بيقول " إديني عُمر و إرميني البحر "  .. ده غير إن كل حادثة ليها طعم و مذاق غير التاني .. بس بصراحة الحادثة الأخيرة كان فيها Suspense & Thriller..  تشويق و إثارة يعني .: غير كل مَرَّه .. لبست في عربية شرطة "بوكس" .. الوش في الوش .. و كل واحد فينا معرفش يمسك فرامل ٍمن السرعة .. بس الحمد لله .. خرجت منها سليم .. بس يدوب شويِّة كسور و كدمات على الماشي ،، و كان في بعض كسور و كدمات من قبل كده أكِّدنا عليها .. 
سمير : طيب إنت مش ناوي تتوب ..
سعيد :- أتوووب .. !! آنا مش هقولك حاجة غير اللي قاله أبو نواس في الخمر .. 
دع عنك لومي فإن اللوم إغراءُ .. و داويني بالتي كانت هي الداءُ 
أنا عندي أموت في حادثة موتوسيكل أحسن ما أموت بالشلل بسبب المواصلات .. 
و زي ما قال عُمر الخيام 
ما أطال النوم عُمراً .. و ما قَصَّر الأعمار طول السهر ..
فأنا بأقول :-
ما أطال الأتوبيس عُمراً ،. و ما قَصَّر الأعمار "النحس الدَكر"
وتتمسَّى بالخير .. يا عم سمير .. 

#طارق_ناجح (هاشتاغ)       Tarek_Nageh#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات