الكلام المرصع

المريزق المصطفى

الحوار المتمدن-العدد: 5999 - 2018 / 9 / 20 - 14:25
المحور: مواضيع وابحاث سياسية
    

اسمحوا لي بغيت نتكلم اليوم معاكم بالتمغربيت.. .واللي بغيتو تقولو قلوه.. والحساب بيناتنا يكون فوقتوا انشاء الله!
حديثكم على المجتمع والبلاد ديانا..
المغرب فيه بالزاف ديال المجتمعات وماشي مجتمع واحد..
فيه مجتمع السي وعمي فلان من ديك القبيلة،
وفيه مجتمع أبا وامي فلان أو فلانة،
وفيه مجتمع مول الفيرمة والخماسة والرباعة،
وفيه مجتمع القايد والشيخ،
وفيه مجتمع مول لوزين وعمال الشركة،
وبغيت بهاد المناسبة نوضح كذلك أن المغرب مازال فيه العلاقة مع امي وأبا وهي العلاقة الأساس وهي الحزب القوي في المغرب، اللي يصلي الجمعة ويأكل الكسكس ويفرح جماعة في كل الأعياد اليهودية والمسيحية والإسلامية. ومنين كنقول أبا وأمي كنقول العائلة اللي كتزوج وكطلق.. وتحمي الفقير وتكبر بالغني.. وتحضن على "العزبة" حتى تزوج وتحمي المعطل حتى يخدم وتدي القفة للمسجون..
هذا الحزب العائلي هو اللي كيقرر في سلطة العائلة وهو اللي كيتفاوض بها مع السلطة الأخرى..هذا الحزب هو اللي عاندوا العلاقة مع المسجد أو يختار الزاوية أو شي جماعة دينية أخرى..المهم العائلة وعلى رأسها الأب هو اللي عندو الكلمة وخا يكون فقير..
ولأن الحزب الكبير كاين غير في الرباط، فالحزب ديال العائلة هو اللي خدام عندو في الفيرمة وفي المعمل..وفي الانتخابات كيصوت عليه باش يتمتع بالرضى ويحافظ على العبودية ديالو اللي كتعطيه الشرعية في القبيلة والدوار وحتى الدشر..
وخا هاد المجتمع ديال أبا وأمي والحزب اللي عندهم يتخلى دار بوهوم ..ما يمكن إلا يضامنو مع الرباط وطرابشها منين كتحتاجهم..
أما صحاب الشركات أو اللي كنسميوهم الباطرونا..فممسوقينش، علاش؟ لأنهم كيعتبروا الملكية الخاصة بحال لكارط بلو في الجيب..ما عندهومش لا الكبدة ولا الرية على الاقتصاد ديال البلاد..والعمال والاجراء عندهم زايد ناقص..يمشي واحد يجيو جوج..
هذا هو المغرب ديالنا خلوطة جلوطة تقليدي يوم عاشوراء وحداثي يوم عيد الميلاد..عقلاني في الوراق وفي كلام القهوة وفي المحاضرات والتجمعات والمقالات و" خوانجي" مع الزوجة والأبناء، وفقيه في الدار كتسخر عليه المرأة..
هدا هو المغرب ديالنا اللي فيه القانون يطبق على الفقراء والضعفاء باش يبقاوا في الدوار او في الهامش وبالزاف عليهم المركز..باش كذلك تكون المحسوبية والزبونية في المدرسة والجامعة والمعاهد وفي الداخليات والأحياء الجامعية، وحتى في الوظيفة العمومية والمؤسسات الخصوصية..
وهكذا كيسهل على المخزن ديال البلاد ينشر الدعوة ديالو في الراديو والتلفزة وفي السوق عبر البراح وعند أبا وامي والجيران..ويكون عندو تنظيم اجتماعي قوي فيه العتيق والحديث اللي كيتماها مع المشروع ديالو.
أما الوطن مزال بعيد شوية علينا..لحقاش حنا كاملين دايرين يدينا فهاد الشي بقليل أو بكثير..حيت بلادنا مزالة مسحورة بالحرمل والجاوي وحصلبان ..والقراية ديالنا مزالة غير فهامة وماشي وعي..مازالين حايرين غير مع الداراري في المدرسة والسيارة والكونجي والخياط ومواعيد المقاهي والبيران والفنادق لمن استطاع إليها..
المهم الوطن مزال كنتعاملوا معاه بتغماض العينين والتعتيم والتوشويش. وعزيز علينا بالزاف منين كنشعروا بالخطر عليه كنخافوا عليه مسكين واخا هو ما يخافش علينا..
احنا بلادنا فيها أكثر من 1800 جماعة قروية..وهاد الجماعات ما فيها لا خدمة ولا ردمة، وما فيها لا مدرسة بحال الناس ولا صبيطار ولا ماء صالح للشرب ولا طريق ولا سكن متين..جماعات محكومة بالفلوس والاستغلال والعبودية والاستبداد..وهاد الجماعات بعيدة بالزاف على المساواة ديال الرباط وعلى الثروة ديال الدار البيضاء وعلى السياحة ديال مراكش وعلى الفلاحة ديال أكادير وعلى المعامل ديال طنجة. هاد الجماعات نصفها شباب..على الله! ضاع ولم يعد أمامه سوى الموت في البحر..
ففينكم يا ولاد هاد الجماعات..اللي وصلتوا هناك وعاجبكوم الحال..فالوساطة اليوم هي انتم.. لانكم أصبحتم تشكلون الدولة من هنا وهناك وحزب أبا وأمي والجيران وشيخ القبيلة والزاوية..مأسستموه ليكون تحت أمركم..
وفي الأخير حزب أبا وأمي وكل العائلة يصارع من أجل البقاء بعدما فقد السلطة...نتيجة الاحتكار ديال كل شي من طرف المخزن وأعوانه..لكن لا بد من نخرجوا من قاعة الانتظار..ونمشيوا عند الناس..نضامنوا ٠ونتعاونوا ونحاولوا نردوا الثقة لهم..ونزيدوا نصبروا شوية..راه مزال كاين ما يتقال وما يدار..!
المريزق المصطفى

#المريزق_المصطفى (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات