جحا العراقي يريد طلب تزكية من حزب ديني

جحا العراقي

الحوار المتمدن-العدد: 1490 - 2006 / 3 / 15 - 10:32
المحور: كتابات ساخرة
    

الووو منو يتكلم وياي هلا الف هلا بجحا لك وينك صارلك سنة ماكو وين شنهي اخبارك اشو متبين قول امرني جحا شرايد انا اعرف ماتخابر الا على شغله تعرفني طول عمري صريح ومااعرف الف وادور وماعندي مجاملات احجي شتريد .
شنو ....كتاب تزكية مال شنو كتاب تزكية هاااااا تزكية حتى تتوظف بدائرة حكومية منين اتريد اجيبلك اياه منين من الحزب الشيوعي ههههههههه جحا انا ترى مو بالحزب انا فكري ماركسي مالي علاقة بس مو مشكلة اشوفلك جماعتي الي بعدهم بالحزب وملاحقهم الموت والقتل من جماعة العمايم البيض والسود بس ترى محد معترف بكتب تزكيتهم ترى التزكية الماشية لازم من حزب ديني نصيحة جحا شوفلك عمامة سوداء او بيضة يوقعولك على تزكية اخسرلك كعدة شرب وياهم وهما يعينوك مو بس يزكوك .
بس اكلك اول ماتروح عليهم اذا طلعوا من العمامات السود كلهم انا ( سيد ) وهم يشيلوك على الراس لان السيد بالعراق صاير عدنا موده واذا رحت للعمامات البيض قلهم انا ( شيخ او اخي ) وهي تمشي السالفة والله جحا مداشاقه وياك شبيك جحا زعلت هو اني بعدني مامشتغل ومالكي وظيفة لان اخلاقي ماتسمحيلي ابوس راس عمامة مااشتريها انا بفلس ومااريد احجي كلمة اكبر من هاي لااصير زنديق وكافر واطلع مو خوش ولد مو مشكلة اشوفلك صاحبنا بحزب التطوه اي الي هو مايلبس رباط اي من جماعة القوي والامين (شبيك ماعرفته حي الامين ببغداد اي وقوي دعاية مال حليب اطفال مشايفها معلقة بيها واحد مطيرجي اي يطير طيور ومسوي ايديه مال مطيرجية مضبوطين اي مثل اعلان الانتخابات ) صاحبنا خوش صاحب بس يشرب كله جن ويانا وهو مايقصر اذا اكله .
مو الحلو بصاحبنا بهذا الحزب جان من جماعة الربع والرفاق وهسه فد شي هو بحزب التطوه بس يستاهل عنده ماجستير من دولة اوربية على نفقة الحزب السابق والساقط بس والله للامانة ماماذي واحد بحياته وجانت من الدنيا اتضيم عليه اروح اشرب وياه بس بوحدنا اي مو مايعجبني اشرب وياه بعض الشكول الزفرة الي جانت تكعد وياه قبل السقوط انا اعرف انه ماخذ الامر عن مصلحة واخر مرة شافني قبل شهر كلي بعدك شيوعي لعد اشكد انت قديم بطل مبادئك هسه وقت العمامه ماشي ومن يرجع الشيوعيين الله كريم اقلب موجه وياهم اي والله حقه حجيه صحيح زين والي مايقدر يقلب موجة وباقي على موجة وحده شلون يعني ينداس بالرجلين يلا اموت على نفس الموجه ولا احول على موجه ثانية خلينا نحلم ممكن نحقق شي ماقدروا يحققوه اباءنا واجدادنا .
اهووو جحا انطيتك محاضرة وانت الكارت مالك راح يخلص مال تلفون وخاصة شركة عراقنا بالاصل هي فرع من شركة كانت جزء من اسهمها لابن النظام السابق بس محد يصدقني بس مو مشكلة يقدرون يسالون الي جانوا يشتغلون وي عدي بتلفزيون الشباب يعرفون اذا جنت انا جذاب لو لا ............. الك الله يالعراق .
جحا ترى من هسه اكلك انا اجيبلك التزكية بس يراد كعده شرب وانا اعرف انت ماعندك عمي على حسابي انا اعرف انت من النظام السابق مااتعينت لان كانوا رايدين منك كتاب تزكية من حزب البعث ولازم تكون بدرجة نصير (مو نصير شمه الملحن العراقي لا نصير بالحزب ) .
وانت جنت رافض هذا المبدا ليش رافضه جان جبت من السابق كتاب تزكية وتعينت وجان هسه انت بالوقت الحالي مدير وعضو بارز في احد الاحزاب الدينية الرائعة من امدانا على افكارنا البالية بس شنسوي رحمة الله على والدي جان مربينا على مبادى مايشتروها الناس السابقين والحاليين بفلس واحد ولحد هذه اللحظة منكدر نتخله عن هاي المبادى مو بيدنا ( مو بيدنا اغنية عراقية رائعة ) .
جحا اشو شطحت هوايه اني شنو القصة دسده لتلفونك خلي انا اخابرك لان كارتك راح يخلص اي بس راح اخابرك على اسيا لان هي خوش شركة ورئيسنا الكبير مستفاد منها هم اسهم لابنه وهم صاحب الشركة صديقه الحبيب ودك فلوس وعمولات بيناتهم وقعدات شرب للصبح بس مو وقت هسه نحجي بالموضوع نخصصله حلقه بوحدها شركة الاتصالات الثلاثة بالعراق .
الووو جحا ها سامعني مرلي باجر محضرلك التزكية اي بس جحا دير بالك اي وزارة تقدم بيها شوف نوعية وزيرها اي اذا جان من جماعة الحزب الاسلامي فوت على وزيرها كوله اخي شلونك اخي وجطل نفسك سني وكله شلونه زلماي خليل زاد بعد جاي ينزل بالطايرة الهليوكوبتر على مقركم ويحجي وي الامين العام للحزب واذا جان من جماعة هيئة علماء كله شلون شيخنا اخبار المفخخات والعبواءات والذبح والجامعة العربية واذا جان من جماعة صالح المطلك كله اخبار الشوؤون الزراعية ديوان الرئاسة اخبار مزارع سجوده واخبار الرفاق والشعب والفرق الحزبية واذا جان من جماعة المصالحة والتحرير كله شلون البنك المركزي مال محافظة الموصل وانت واولاد شيخ اكبر قبيلة بالموصل وياكم البيش مركة خمطوه وتقاسمتوا امام اعين ابناء المحافظة وكله اشو جنت امريكي للعظم وهسه من انضربت مصالحك صايرلي محرر صدك حكمه الهية واذا جان من جماعة التجمع الجمهوري العراقي كله شلونه بريمر وياك بعده يخمط وياك لو ...لا اشو بالحجي انت وطني وبالفعل كله شغلك وي الامريكان . واذا كان من جماعة اياد علاوي كله اشلون حجينا بوش صار سيد لو بعده بس حجي . واذا كان من جماعة المرجعية كله اخبار قمر كوريا الجنوبيه رجع على المدار لو بعده ( منريد نحجي بالسالفة بس تقدرون تسالون اي واحد من جماعة المرجعية مابينا حيل لمشكلة جبيرة ) واذا جانوا من جماعة اهم حزب ديني بالعراق قله شلونها فرق الموت والغدر بعدها تريد تسويها فتنة بالبلد . واذا طلع من جماعة القوي الامين كله التفجير الي صار على مقر الخطوط الجوية العراقية وراح بيه بس العراقيين الفقر والي تبناها حزبك للشغلة بالثمانينات تذكره هذا تعتبر عمل ارهابي لو عمل مقاومة حتى نفتهم ليش بس المواطن العراقي البسيط الي هو يدفع الثمن مو الاكباريه ليش جيف فقير ومال احد وكله التفجير الاخير للمرقد والي طلعت بيه على التلفزيون وكتلهم للناس بكيفه كل واحد شيسوي بكيفه وخلقتنا فتنة كبيرة بمقولاتك هذه ليش جحا القوي مو احنا الكبار وعقلنا الكبير ليش ضحكة علينا العالم . واذا طلعوا من جماعة التيار الكهربائي ( لانهم داكين هما على وزارة الكهرباء وانا اعرف ليش بس لانحجي حتى لاتصير مشكلة ) كله شلونه عجل وفرج وولد كله العجل وعرفناه هو نفس العجل الي سواه اليهود بوقت النبي موسى وعبدوه وسوق فرج وعرفناه ونعرف ماراح تفرج من وراء تصرفاتكم مال مزعطة بس الولد ماعرفنا لان المهدي عليه السلام بالغيبة بعده وكله اخبار السلاح الروسي (الغير تقليدي ) الي جابلوكم اياه الروس بعد مقابلة استاذكم للسفير الروسي وضميتوه بمحافظتين بس للامانه انا ماعرف نقلتوا لو بعد ترى اخوان الشغلة مو اشاعة وانا تاكدت من الشغلة من قيادات واصله من جيش المهدي وجان عدكم اتفاق وي الهيئة على فد شي وخرب الاتفاق من وراء الاحداث الاخيرة بوي سفيرنا الروسي ليش ناسي الشيوعيين انت ليش دائما توكف وي الخسران دير بالك علينا مانريد افلوس لاتخاف ولاسلاح ترى مامحتاجين لهيج شغلات احنا قلمنا اقوى من اي قنبلة او سلاح انريد شويه توصي الجماعة (الي انطيتهم السلاح الغير التقليدي والي مامستخدميه لحد هذه اللحظة وماعرف راح يستخدموا على الامريكان لو على ابناء شعبهم واخوانهم ) علينا يومية قاتلينا شخصية مهمة ذات فكر شيوعي واشتراكي وكله بعدها السجون ومحاكم الشرعية والاعدام وراء السدة بالثورة تقتل الكل وماتميز بين شيوعي وسني وشيعي وكردي مو حتى خليت اهل الثورة يترحمون على القندرة صدام من وراءه تيارك الكهربائي والي مايصدقيني بمسالة السلاح الروسي الغير تقليدي يقدر يسال السفير الروسي وانا على استعداد اخلي راسي تحت اي سكينه اذا انا اكذب بهذا الامر .
واذا طلع من جماعة الشيوعيين كله بعدك قلبك طيب وتعيين الكل وناسي اقاربك وجماعتك بالحزب مامعينهم لان انت ترفض مبدا الواسطة .
واذا جان من جماعة حزب فضيلة ( اي فضيلة صاحبتي بنفس الكلية جانت ) كله شلون الاستاذ بعد يبتز الطلاب بالدولار لو بطل شغلته وصارلي متدين ويحجيلي بالدين وهو جان يلحق الطالبات بالكلية وهسه صارلي شريف روما من امداني وكله على كيفك بالبصرة ترى اهلها الاصليين والطيبين والي ماكو بالعراق اطيب منهم اندفنوا من وراء المد الايراني .........؟
اشو بس على الشيوعين يحجون جيف هما يشتغلون بالوجه وماعدهم نفاق وباطنهم مثل خارجهم مو مثل البقية .
واذا جان من جماعة ابو كبه كله ماضيك الاسود والمقرف ليهسه يلاحقك بالوزيرية اذا نسيته نذكرك بيه او نخلي شياب(عجايز ) الوزيرية يذكروك بيه ..............؟
واذا طلع من جماعة البيش مركة والبيش التمن كله شلونها كركوك بعدك توزع اراضي بيها للاكراد الي يحولون نفوسهم عليها والي نفوسهم الاصلية من محافظة اربيل والسليمانية وتنطيهم وصلة كاع ومبلغ راتب شهري مئتين الف دينار ونص سعر مواد البناء بس يحولون نفوسهم على كركوك كله ترى انا مانايم واخواني الاكراد المعروض عليهم هذا الشي بلغوني بيه وهذا الشي جاي يتم بشكل سري وكله الاراضي الي جاي توزعه بمناطق بالموصل حتى تغير ديموغرافية اخوانا الاشوريين والتركمان والمسيحين والشبك كلها وصلتني بعين وشوف محافظ الموصل الطنطا (الي يطلقون عليه لقب حسام ستر اختي ) الي انت وميليشياتك مسوي قندرة بعد ان قتلتوا اخوه ونسبتوه لجماعة تنظيم الخضراوي على طريق موصل بغداد وجان راجع بشكل سري من اجتماع بغداد وجماعتك بالطريق ماقصروا وياه لان حسوا انه ناوي على ايقاف تدخل الميليشيات الكردية بالموصل .
بوي جحا لاتنسى نصائحي ترى السالفة بالتعيين مليوصه واخذه من قاصرها ودبرلك من 200$ الى 500$ دولار واتعين باي دائرة وبدقائق وخاصة بالتربية والكهرباء والتجارة والدفاع والداخلية والتعليم العالي صدقني احسنلك تاخذها من قاصرها بفلوسك وبشرفك ولاخفة على احد بتعينك اقله تتعين بشرفك وبكرامتك ومامتنزل نفسك لواحد .
لصته على نفسي اليوم انا لوصت هوايه وفضحت هوايه بس صدقوني انا حاسس ان كل قلوب العراقيين البسطاء والطيبين والشرفاء معاي احتمال اخوان انا ماعندي ايمان مثلكم بالاديان بس عندي ايمان بالعراق والعراقيين وانا من اكتب صدقوني ابجي بحركة بس ماخليت اي شي يسندني اذا وقعت بيد الربع لان الربع مايرحمون احد اشو فضحت الكل .... طبعا هسه الكل يريد راسي بس صدقوني انا ماتهمني نفسي او عائلتي لان العراق بعيني قبل كل شي العراق اهم من عائلتي ونفسي انا بشر ممكن اموت بطلقة او عبوءة او مفخخة او حادث غدر او تعذيب او اطلع بالتلفزيون ويهددون بعائلتي ويقلولي احجي انت قول عن نفسك ارهابي وغير شغلات ترى اذا متحجي هيج قدام الكاميرة اناذي عائلتك قدام عينك (شلون رهمتوها ماركسي وارهابي كلشي يصير بالعراق اذا هو المسيحي لزموه اسبوعين دك قتل يقلوله اعترف انت ارهابي وتكفيري وهاي حادثة حقيقية حدثت بمحافظتين وتوسطت الكنيسة في حل هذه المشكلة ) كل هذا مايهمني الي يهمني هو ان لايموت العراق لاني اعبد العراق وواقسملكم بشرفي ممكن اضحي بنفسي واموت بس يبقى العراق واحد ويبقى شعبه واحد وقلب على قلب .
ارجو من امهاتنا و خواتنا و اخوننا ان يدعون بصلاتهم الي انا مامومن بيها يدعون للعراق مو الي لان العراق اهم مني ووحدته اهم من حياة شخص صغير يحاول ان يظهر الحقائق ويوكف يم مد جارف وكبير .
اخوان اطلب منكم طلب اخوي وصدقوني مالي اي مصلحة بهذا الطلب لامن بعيد او قريب دير بالكم على اخوانا بمرض السرطان اذا امكن تعالجوهم بدون ماتسلمون هذه المساعدات للحكومة او الوزير الحرامي تكفلوهم انتوا هولاء المرضى بدول الي انتوا بيها حتى لو كانوا هولاء المرضى من اقاربكم حتى لو مريض واحد الي تكدرون عليه انا مداتحمل الموت والقهر بالمستشفيات من وراء السرطان اقسملكم انا جاي اساعد الي اقدر اساعده بس انا مو غني حتى اقدر انا هم الي بيدي جاي اسوي بس والله اخوانا اقسملكم بكل مقدس وبالعراق ماعندي احد من اقاربي او اهلي بي هذا المرض بس انا من رحت للمستشفى بجيت على كثرة انتشار هذا المرض والله دموعي وانا اكتب جاي تنزل تحملوني اخوان ارجو رجاء اخوي من قناة العراقية او قناة الشرقية او قناة السومرية او قناة البغدادية اواي قناة عربية او اجنبية ان تسلط الضوء على هذا الجانب وتساعد مرضائهم واترجى من دولة الامارات العربية ( انا عمري مامنزل نفسي لااحد بس راح انزل نفسي لخاطر ولد بلدي الفقراء يستاهلون) انا تساعد وتلتفت لمرضى السرطان في العراق رجاء اخوي لان البوك والخمط بالحكومة دفن الناس البسطاء العراقيين والمرضى ولان السلاح الي استخدموا الامريكان بحربهم الاخيرة قبل سقوط بغداد اظهر حالات مرض السرطان بشكل كبير انا على استعداد لاي شي مقابل ان تديرو ن بالكم على المرضى السرطان العراقيين جاي يبيعون حتى بيوتهم حتى يعالجون نفسهم واهم شي تساعدوهم باشرافكم انتم وامام اعينكم انتم مو باشراف حكومتنا الخماطه ووزير صحتنا الحرامي . انتظرونا مع قصة بنك البتراء الحقيقية ورئيس حزب الموتمر .
حكمه الحلقة ( اذا لم تكن صاحب مال او نفوذ او عضو في حزب ديني في العراق لن تستطيع ان تتعين باي دائرة حكومية او اهلية )

#جحا_العراقي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات