جحا العراقي يبكي على الوطن

جحا العراقي

الحوار المتمدن-العدد: 1474 - 2006 / 2 / 27 - 07:21
المحور: كتابات ساخرة
    

مقدمة صغيرة .........
اخواني العراقيين جميعا احلفكم بكل مقدس عدكم احلفكم بالوطن وبكل عزيز وبكل ابناءكم واباءكم الي قتلوا من وراء حروب الطرطور صدام والضارة ايران واحلفكم حتى بكل عزيز وشرف لاتنجرون وراء فتنة تاخذ الاخضر بسعر اليابس وتخلون كل العالم يضحك علينا ويبقون الحثالة بالحكم فرحين بالفتنة وراء ماتموت وتتقتل جهالنا واطفالنا وتنتهك اعراضنا يجون ويكعدون على الجاهز ويتفقون ودماء اولادنا واخوانا ذمة برقابهم وبعدها مانشفت من ايديهم ووجوهم الزفرة والنتنة دماءنا .
وتشوفون اخوانا بعد حروب بلبنان اكثر من عشرين سنة الد اعداء اثنين هسه متفقين وطكتين اصبع سويه وداخلين بتحالف والالاف الي تقتلت من وراءهم راحت بشربت ماء يلا فدوة للوطن .
شفنوا شكد روح الانسان تافهة بالنسبة للاحزاب وروساء الطوائف والجماعات والمرجعيات اخوان ترى احنا اخوان واي شي يصير ممكن يتعوض الي اتهدم وانحرق ممكن اعادة اعماره صدقوني ترى والي تهدم ينعاد بس الدم اذا انفتح ترى الانهار ماراح تنتهي ومحد مستفاد غير المحتل والحثالة من كل الاطراف التي تحاول مسك امو ر البلد والضحك علينا باسم الدين والوطنية والحرية والديمقراطية والجذب مالتها .
اقسم بالله لو اعرف انه هناك شريف بستحق ان اوقف وياه من باجر انا اخلي ايدي بايده والله انا ماعندي وقت هسه للدخول في حروب وياه الحثالة الي تحكم بمحاكم لان القضاء عدنا فاشوش بس من يقوى القضاء وعد شرف لكل عراقي وقع ابنه بالحرب وابوه ولكل من مات بالمفخخات وبطلقات الغدر والاحتلال وكل من ضحايا صدام الوطنيين الحقيقين مو الي لزكوا شعارات الوطنية وهما حواسم وقفاصة وجانوا قاضيها بالخارج كلها شرب ونسوان بايران ولندن وامريكا واجوي على الحاضر .
اوعدكم وعد شرف انه راح بنفسي ادخل واحد واحد للسجن على مافعلوه باموال الشعب العراقي وبالفتن وبالماسي التي اصبحت مثل ماسي صدام القذر اذا لم تتجاوزه وراح اشوفهم ان القضاء الحقيقي اذا صار قوي لايمكن ان يعترف لابمرجعية او عمامة بيضة او سوداء الكل سواسية في ايدي حضرة القاضي وراح تشوفون خلي يفيدهم الحواسم والبوك والخمط والفتن الي تحاك على العراق من قبلهم هما والمحتل ويجي هذا اليوم واذكركم بيه ولاتخافون كلشي موجود .

بداية الحلقة ...........



لك اتركوني شباب اكمل شرب اليوم اريد اسكر بعد ماقدر احجي ولكم مو متت من القهر والضيم ولكم البلد جاي يتقسم واحنا كلشي مانقدر نسوي هنوبا كلها وطلعنا احنا مو خوش اوادم ومو وطنيين وطلع كل عفطي وحرامي وافرار وسلاب صار شريف براسنا ويحجي ويفتي بالدين بوي والله طركاعة كشرة حطت على رووسنا اخوان اريد ابجي لزمني البطل بعد مايفيد الكلاص اليوم الااسكر لكم شنو هذا الي جاي يصير بالعراق كل واحد يريد يقسمله قطعة من البلد ويسوي عليها علم ودولة لكم وجماله لو وطنيين مااحجي بس وين ماكو واحد عفطي جايبي ويطلع يصرح بكيفه باسم الشعب العراقي لكم شلون وي هاي الحالة اريد اطلع بره طلعوني اريد اتنفس بعد مااتحمل ولكم شفتوا صار بالبلد خلصنا من طاغية وحرامية جانا الف طاغية والف حرامي والمصيبة يصيحون ويحجون بالوطنيات وهم يريدون يقسموا العراق مثل الكيكة من ننعل ابوه هذا الوقت الي جابنا صدام على القطار الامريكي وجابلنا هلا حثالة على الدبابة الامريكية لكم شنو انتوا شبيكم مجاي تحسون طلعوني بره بعد مااقدر اختنقت ........... يعني شتريد مني علي مااصيح بنص الحديقة مال بيتكم والله مااصيح بس طلعوني بالحديقة اعرف انت تخاف على نفسك من ذاك الوقت تخاف تحجي على صدام وهسه تخاف تحجي على الجماعة حتى لاتنطك بالدهن وروح ابوك الي مات بحرب ايران مااصيح تعرف شكد احبك ياعلي وابني سميت على اسمك بكثرة معزتي الك تعرف ليش انا انقهر عليك لان اعرف انت تخاف تحجي الحقيقة مو علمود نفسك بس تخاف على امك واخوانك لايجون الحثالة وهم يختطفوهم بسبب حجيك ويقتلون واحد منهم اعرف هذا الشي ولذلك احترمك علي . بوي طلعوني بالحديقة وماراح اصيح بعد خلوني شويه ابجي على وطن بدا ينباع تفصيخ ولكم اه يالعراق منين تلكاها من ولدك بالشمال الي يريدون ينفصلون لو من ولدك بالجنوب الي يردون ينفصلون ويلزكون وي دولة القذارة لو ولدك من الوسط الي ملوءها مفخخات وعبواءات اه يالعراق لك بدت اراضيك تتحوسم شويه من سوريا انطيت وشوية للاردن وشوية للسعودية وشوية للكويت وشوية لايران لكم شبقى بعد ماكدر امسح دموعي خليها تنزل خليها ترى صارلي هواية ماباجي تعلم قلبنا يتحجر لكم بعدني ماكملت خلوني بروح ابوكم خليني افضض عن نفسي علي ترى والله مادااقدر مااريد يشوفوني جهالي وانا ابجي يمهم ويقولون ابونا انهزم امام حثالة حكمت ومازالت تحكم العراق خليني ابجي يمك شوية ترى اليوم اني محتاج للبجي كلها تتعارك على الكرسي واللغف لكم حضارة ستة الاف سنة اتفصخت وانباعت بستة ايام والله مجاي اصدك لكم اشبينا احنا بس اريد اعرف شبينا .
ابو كذلة يقول جنتم حفاية وانا لبستكم نعل اي بهاي اله حق نعل على راس هو والي خلفوءه والجماعة اهنا يقولون حررنا العراق وهم كلهم عفطة مابيهم جايينا على دبابة امريكية استلموا للعراق هما وخوالنا الامريكان وشفط بوي والله مجاي اصدك صدك يصير هيج بيك يالعراق صدك بعد مابيك وطنية ( وطنية مو كهرباء وطنية اخوان لا تفتهمون غلط مابيك وطنية معناها ماكو غاز ومنتجات نفطية وطنية ) وقامت الناس تصدك حجية الشعوذة والسحر وحجي اللحية والعمامة لك وين احزابك الوطنية واليسارية لك وينك انت يالعراق معقولة راضي بهالشي .
علي ارجوك خليني اكمل حجي ولاتحاول تاخذ البطل من ايدي ترى والله ازعل منك خليني ترى ماداتحمل لك علي تريدني اهاجر لك علي اذا انا وكل شريف عراقي يهاجر منو يبقى لهذا البلد يبقى اله الطنطات الي جاي تحكمه وتسرقه لك بوي كلها جانت معارضة بالخارج وكلها جانت طكتين اصبع وشرب ونسوان وكلها مخلي ايدها بايد الامريكان وهسه من جوي على الدبابة اشتغلت العمائم والحرام والشرف والاخلاق والوطنية والجغرافية والتاريخ والعلوم اهو هم جاي اشطح على دروس ابني .
بوي شااحجي بعد اذا جنا نتفل (نتفل من تفلة بصاق ) على صورة وحده باليوم كمنا نسب وننعل الصور المعلقة ومااريد اعلق لاينفهم حجي غير شكل ونزعل كل الجماعات وهي مامقصر علينا اشو لحد الان اكثر من ستين تهديد اجاني من مااعرف كم جهة هاي بس علمود جاي احجي الحقائق وبشكل بسيط وماردت ادخل بالعمق لعد لو ادخل بالعمق شراح يصير يمكن CIA يكلبوها فوك راسي وهي ماقصره بعد وهسه هم يعتبروني سمراوي بدل زرقاوي واطلع انا داعم كل ارهاب العالم اي داعم الجملغ والبانيد مال امريكا بوية والله طركاعة كشرة وقعت على راسي انا شجاي الوص بالحجي لك علي وصلني لبيتنا ترى ماراح اقدر اقوم بعد علي وصلني وبروح ابوك لاتزعل مني ولاتضوج من بلدنا العراق لان بلدنا كلش حلو وجميل بس لوما يحكمه الحثالة ماكو واحد اجى وطني بس ملك غازي وعبد الكريم والباقي كله عفطية يلا الك الله يالعراق .

حكمه الحلقة ( لاتشرب هوايه حتى لاتبدي تحجي الحقيقة ويسمعوها منك الجماعة وبعد يومين تلك لافته سوداء معلقة باسمك كتب عليها قتل اثر حادث غادر ) .

#جحا_العراقي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات