عبدالكريم هداد
(Abdulkarim Hadad)
الحوار المتمدن-العدد: 1459 - 2006 / 2 / 12 - 09:48
المحور:
الادب والفن
گبلْ...
وبأيْ مدينة من العراق..
لو غَرَگْ واحد غفلْ
ينكسر گلب الناس..
وتبقَى المدينة تنوحْ
مثل وحشة طفلْ
ويْصير الجرف مُو طينْ
يْصير دموع..
ويلي دمعة المسكينْ
ونِسْوانْ المدينَة يْفَرفَحَنْ صوبينْ
شْگدْ بيهِنْ بِواچي ، و يِـبْچَنْ عْليه
اشُو هَسَّه العراق بْطولَه غَرگانْ
ولا واحد صرخ ، ويْصيحْ بِالآه..
ويِبْچي دمعتَه عليه
يابويّاهْ ..
هذا الوطنْ مَنْفي ، مَنْفي وْيّايْ
من سنينْ
وحزني صار منفاهْ
مَدري ابْچي عْلَى حالي
مَدري عليه
يابويّه العراق ... شْگد حزن ماذيه
تَعَودْتْ الحزن .. وسنين منفاهْ
ولسَه مْچَلِبْ بْلوني ، حَزينْ ..
وحَنينْ..
ويلي ياوطن .. مَا گْدَرِتْ أنْساهْ .
السويد
31-1-2006
#عبدالكريم_هداد (هاشتاغ)
Abdulkarim_Hadad#
كيف تدعم-ين الحوار المتمدن واليسار والعلمانية
على الانترنت؟