بالعربي( ميّة) 00 بالفرعونى ( إمبو) 00

ياسر العدل

الحوار المتمدن-العدد: 1454 - 2006 / 2 / 7 - 10:20
المحور: كتابات ساخرة
    

يا أجدع واحد مسئول فى بلدنا، إزيك يا سعادة البيه، أنا شفتك مرة فى التلفزيون، وقالولى إن أنت بتاع الميّه الحلوة والمالحة والفناطيس والحنفيات، وكمان مسئول عن زيت الخروع والأكل المغسول بالميّه الصاحية نظافة، والله يا شيخ أنا بعد ما شفتك حبيتك، وقعدت أدعيلك بالستر وبالصحة وكتر الأولاد.
على فكرة يا بيه، أنا والأولاد عازمينك، تدخل دارنا تآكل لك لقمة من الموجود وتشرب ويانا الشاى، تحلم ويانا بالعيش الطالع سخن من الفرن، مدهون بالسمن البلدى وحواليه البيض المشوى وعودين جرجير، تحلم ويانا بلقمة هنيه بتنادى على المعدة المشتاقة لأكلة نظيفة، ونحلم وياك بالميّه من الحنفية نظيفة، لا مؤاخذه يا بيه دارنا صحيح مش دار، حتة شقة على قد الحال فى الدور الأرضى مرمية فى حتة بعيد على طرف الدنيا، ما فى حد من الجيرة أو جيرة الجيرة وزير أو بيه، حتتنا صحيح مقطوعة لكن ما تخافش يا بيه عزومتنا من القلب، ولو شرفت جنابك شقتنا، الرقبة فداك.
والله يا بيه أنا فاكر مرة زمان أنى حلمت بروحى طبيب فى الصحة، لا بس أبيض فى أبيض متعافى ومتعلم، أشوف الميّه الحلوة فى كل مكان وأشيل الميّه الحلوة من أى مكان واجعلها سبيل لله، والناس يجروا عليه يملوا بلاليص وأزيار ويشربوا ميّه ويدعوا لى، لكنى يا بيه صحيت من النوم متغطى بعرقى وخوفى من الشكوى لأى صغير، والحلم فضل جوايا لحد الوقتى سنين، ألف مكان فى بلادنا خرابة، الميّه الحلوة مفيش والحنفيات خربانة، وأخيرا جاتلى الفكرة، قلت أشكى لجنابك حكايتنا مع الميّه 0
لا مؤاخذه يا بيه، إحنا ساكنين فى مدينة على وش الصحراء الغربية فى الجيزة، جنب الهرم العالى فوق نادى رماية الجيش علطول، عماراتنا مبنية على ظهر تلال رمل معووجة، تبان عمارتنا على البعد قوال طوب على ظهر جمل بارك، فينا يا بيه ناس زيّك، خلق ميسورة الحال وياّهم وبتشرب ميّه نظيفة معباى فى أزايز، وفينا يا بيه خلق بعيد عنك، محسوبة الدنيا معاهم بالسحتوت يشربوا ميّه عكارة حنفيات، لكنا وبالكل كليلة حالتنا مع الميّه عجيبة، قالولى إنها حالة "السّح 00 الدّح00 أمبو"، عماراتنا صحيح فيها ميّه، بس مش هادية الميّه، من الصبح لحد الصبح يوماتى "بتسح" علينا سراسيب تنقيط وشخير، تتقل راحتنا ويجفانا النوم، نرمى رجلينا فى البلكونة نشوف الهرم المتنور بالليل نهرب من صوت الميّه، ندفس روسنا تحت البطاطين نهرب من صوت الميّه، نسلم على خيط النور فى الفجر نهرب من صوت الميّه، يشغلنا نهار الجرى ورا لقمة عيش نهرب من صوت الميّه، وده كله والميّه "تسح" من الحنفيات، تصطادنا الحاجة إجباري لتصليح الميّه، نشجع كل المصرى وكل المستورد، نشترى حنفيات ومحابس وجلود بالخمسة والعشرة جنيه أسبوعى، نزوغ من الشّغل ونغرق فى سباكة وتصليح، وتفضل دى الميّه فى حالة تنقيط وشخير0
فى مره يا بيه جالنا السباك، قال لنا على طبع الميّه فى حتتنا، تسح من الحنفيات وان نزلت تنزل بيضه دحّ حليب، وقال لنا حل خطير نغلب بيه الميّة، مش لازم نسكن على تل الرمل العالى، لان المحبس والحنفيات مالهاش صرفه مع ضغط الميّه بفنطاس الحتّه العالى، قلنا يا سلام احمى لنا يا رب السباك، نص الحل توضيب الميكانيكا بتاعة الفنطاس، وقال لنا على سر "الدّح" الأبيض سايح فى الميّه بتاع الشرب الداخلة فى بطونا، أصله تراب خلّى طعم الميّه غريب والشاى بقى لونه طحينة، والأملاح فى الميّه تاكل مصارينا وتحلى بلحم المواسير.
صدقنا يا بيه، عملنا اجتماعات وبعتنا شكاوى ونزلنا على محطات البنزين وبيوت الأصحاب وأبواب الجامع، نملا جراكن ميّه شرب، ساعة تيجى معانا جراكن الميّه الحلوة فى عربياتنا، وساعات نزهق من تعب الشّيل، ونقول للموت أسباب، الموت بالأملاح فى الميّه أرخص من الموت بالسكر فى الشاى، نساوينا وولادنا هارونا كلام وسلام، بيقولوا يا بيه مطلوبة الرحمة، عاويزين حد يكلم حنفياتنا تبطل "سح" وينضفها لنا من "الدّح" علشان نشرب ميّه حقيقى، ميّه فرعونى "أمبو".
على فكره يا اجدع واحد مسئول فى بلدنا، لا مؤاخذه أنا مش بشكى، أنا بوصفلك حالتى وحالة خمسين مليون مصراوى عايشين على هامش الدنيا، وبنشرب ميّه حقيقى عكارة.
يحميك الرب يا بيه، لو فيها ثقالة وقلة ذوق، ممكن تعطينا إزازة ميه أميرى معباى فى أزايز، من ميه أهل الكورة والسيما ومجلس أصحابنا الوزراء.

#ياسر_العدل (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات