دارميات عراقية شعبية........المرأة المهظومة../5

ذياب مهدي محسن

الحوار المتمدن-العدد: 1423 - 2006 / 1 / 7 - 10:10
المحور: حقوق المراة ومساواتها الكاملة في كافة المجالات
    

أستهلال
=========
لقد كانت المرأة العراقية وما تزال مسلوبة الأرادة محرومة من ابسط شروط الحريةوالعدالة الأجتماعية يتمثل هذا الحرمان بعدم أستقلالها وتمتعها بالحرية الأقتصادية كما يتمثل بالسيادة المطلقة للرجل عليها وبرغم وجود بعض البنود والقوانين والآيات القرآنية التي تنص صراحة على منح الحرية التامة للمرأة في الحقوق الانسانية الشخصية واختيار الزوج الا أن ذلك لا يكفي مادام العرف والتقليد الاجتماعي أكد واقع المرأة لهذا الشكل ولا تزال قوى ظلامية موجودة على الساحة العراقية ممن تدعي قيادتها للمجتمع تريد تغييب المرأةو الغاء دورها الفاعل في المناصفة وحقوقها التي أكتسبتها في نضالها المرير وتجسدت بثورة الرابع عشرة من تموز1958
ومساندتها في اكتساب هذه الحقوق من قبل قوى وطنية تقدمية وعلى رأسها الحزب الشيوعي العراقي (لا احد ينكر هذا صديق كان ام خصم )ولايزال......من منهذا نستخلص ان التقاليد والاعراف جزء من قوانين المجتمع غير المدونة يعكسان الواقع الفكري والمرحلة الحضارية فعليه أن نبدأ وضع القوانين الجديدة في دستورنا الجديد نظمن لها الحق كل الحق في حياتها الانسانية وحريتها الشخصية بعيدا عن كل ما هو مجحف بحقها ....أنها عشتار العراق ونخلته الباسقة والجنة تحت اقدامها في أمة العراق العظيمة...اظمنوا حقها ودخلوها بسلام ......في فجر الوطن الحر الأتي والشعب السعيد للعراق الجديد
=============
ما تنسمع رحّاي بس آيدي أدير
أطحن بكايه الروح موش أطحن اشعير
*****
أطحن واكضي الليل عن المأ ريده
بالكذله أصبح شيب من مدة ايده
*****
موش أطحن شعيرات أطحن بهمك
أكعد ودور الروح تلكاهه يمك
*****
ما تنسمع رحّاي بس بجيّ مسموع
جاتلني والله هواي ما منه مرجوع
*****
متحزمه وانكل شوك (للفود)أدفيه
بغشيش ألك يالموت؟من عندي دخفيه
*****
ضيجة خلك بالبيت رجلي آنه اشوفه
صاحت علىّ الناس جن أرد اعوفه
*****
الودر..؟ جاني ينام والشمس عدله
والله بجلب مجلوب لوصح أبدله
*****
وين اليفك مظلوم وين الله وينه
يتركرك عله جلاي هذا الحضينه
*****
أتكلي أمي اخذيه اكرع وشايب
أتلمس بعلباه مامش كصايب
*****
زفوني نص الليل للبرد حيله...؟
حبني وترسني اتفال من وره الشيله
*****
الحجي بس وياي ناكص بالعيار
كلهن يكسرن جوز وآنه أكسر حجار
*****
كل الشيوب التموت شيبه يتجدد
رآيه وسبع خرفان يومن تمدد
*****
كالولي رجلج مات موتة جلبنه...؟
النخل بيه جريد والصاري عدنه..؟؟؟
*****
أيكلي همي العشه خلينه نشبع نوم
الما تريده النفس جالشركه بالزردوم
*****
يا فلان اجاك وليد حظك غلبني
اوصل لباب الدار يبجي ويردني
*****
يا نغل ولد(أعفين )بالشط من ارميك
لوجنت أبن هواي بالعين أخليك
*****
أرجه اليموت يعود روحي أمهبوله
طبكت عليه الكاع ما بعد أنوله
*****
كلجن يمظلومات للكاظم امشن
ويم سيد السادات فكن حزنجن
*****
شايله فرخ(لكعيم ) مالج يابطني
ربطة شفج بعذار ربي ربطني..؟
*****
آخذله دمع العين وأصعد للأزرك...؟؟؟
لو ينعل الشيطان لو يجسم الحك
*****
جيبولي جدر النيل خل اصبغ الثوب
تو أيس الدلال منهم فرد نوب
*****
مثل الجدع ممدود مطلوني يمه..؟
كلما يجي ويروح بيدي أغمه
*****
ريت العمامه أحدار كش ول يامومن..؟؟؟
من كونه موش هواي لكبع وكومن
*****
وينج ووين الرجل بعدج زغيرونه
عيونج فشك مستحه للحرب يريدونه...؟؟؟
*****
خطار أهلنه منين هاشم يديه
بس لا تكوليش لا خطاب اليه
*****
مو كلشي نتمناه يوكع بدينه
أحنه السفن والريح تلعب علينه.؟
*****
آي والعرش واللوح والبلعته الحوت
نارك بلب أحشاي تلتهب للموت
*****
والحجر وأهل البيت والحج والحرام
كل ساعه من فركاك(يشكر )بالف عام
*****
غصبن عله الروح جابتني اشوفك
جثر الهه بالصدعات بلجن تعوفك
*****
مهضومه جيت أنخاك كلهم ولوني
لالي ولي بهل دار أهلي نسوني
*****
وشبعد وشخليت تنغط يالغراب
تنذجر ماتنشاف خليت الاحباب .؟
*****
كالولي منهو ذاك كلتلهم هواي
شنهو العلامه البيه.؟رف كلبي وجلاي
*****
ما نمت ربع الليل نشدوا ألمخده
وآنه حلمت بهواي خدي عله خده
*****
أحزن حزن معدان وارجي العصابه
ويه أم رجل وفروخ عوجه الطلابه
*****
يا مجوره وين تردين زينه نزلنه
كل أحنه نمشي وياج ونعوف أهلنه
*****
اليون تالي الليل لا بد عله اسباب
لو دهر موجر بيه لو ذاجر أحباب
*****
ظل ابجي طول الليل ابدن ما أهزك
لو جنت ابن هواي جان اشمعزك
*****
أتنخه بالنسوان خيه أبجن أبجن
نوبه عله ولفي الراح نوبه عله هلجن.؟
*****
شيخصهه بيه الناس رجلي أرد أجويه
يركض وره اليمشون صاير طبع بيه
*****
ربي انتجلت عليه ...جوزني حايج
يتعاركن رجليه مثل الشرايج
*****
شو دمش عني غاد ول ول يبو أركب
ليهّ ما يخلقك زين من كون ألك رب...؟؟؟
*****
يا من تبدل وياي رجلي برجلهه.؟
ونعادل أبميزان والزايد الهه
*****
لو تون لو ترتاح لو تلزم الباب
جنك جدع ممدود ما بين الاحباب
*****
أرد اللعب بدنايّ ما طالت ايدي
الفكر والشبعان خامه أبمجيدي
*****
عود أبعدت واسلاك غمك لهالراي
تعرضلي وكت الزاد وبشربة الماي
*****
حبله وأهز كاروك سبعه لي اللعبون
ما جوز آنا من هواي كلكم تشهدون
*****
من زار رجلي وجاي أنسلت خيطه...؟؟؟
خليني وي اهواي أخذلي ميطه ..؟؟؟
*****
العتب موش عليك عتبي عله لعكال
شوماكلت من أول شوط مابيه تطوال..؟؟؟
*****
والبيدي والبلكاع وعله امتوني
ماجوز انا من هواي لو كطعوني
*****
عمتك زينه وياك عمتي اشعمه
حته الهوه من هواي ما ترضه اشمه
*****
همي وهم هواي وهم الله فوكه...؟؟؟
تفتر عليه الناس جن عندي بوكه
*****
هواي أريد هواي هواي أريده
ما كوم آنا مناه ألا أيدي بيده
*****
ظل أبجي ما خليك ترضع حليبي
أنت وابوك تروح فدوه الحبيبي...؟؟؟

#ذياب_مهدي_محسن (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات