دولة تعاني التهاب رئوي مزمن

ايفان الدراجي

الحوار المتمدن-العدد: 5374 - 2016 / 12 / 17 - 22:12
المحور: حقوق المراة ومساواتها الكاملة في كافة المجالات
    

شلون تعرف الدولة الي عايش بيها صحيّة وناجحة؟ عوفنا من كلمة وطن وغزليات عبد الرزاق عبد الواحد. نرجع، تعرف الدولة مالتك صحية وتمشي على ثنين رجلين مو تعرج على رجل وحدة وفوقاها عايبه من تصير بيد النسوان. شلون؟
عندي مقال قديم عنوانه (تخيلّوا معي كيف سيكون شكل العالم لو حكمته امرأة؟) كتبته من جنت عايشه بدولة عرجة اسمها العراق، عرجة وتعاني التهاب رئوي مزمن هماتين باعتبارها دولة ذكورية ولان 99% من رجالنا يدخنون فصايرة لويصه، اذا تتفل الدولة يطيح رجال! خنقتونا والحمزة. عوفك من الوصف خاصة فقرة تعرج على رجل وحدة عايبه، طبعا عايبه لان رجالنا مشوهين فكريا وجغرافيا. هسه تقولون هاي شبيج تتهجمين على الرجال. الجواب الأول: هاي الحقيقة الآنية المتوفرة وفقا لإحصاءات الساعة لتركيبة الرجال المتواجدين حاليا بدولتي –السابقة- المريضة، الجواب الثاني: بكيفي.
حاليا انا بدولة صحية تماما لانها تركض مو بس تمشي على رجلين ثنين ورشيقة وشحلاتها ملضومة لضم نسوان وين ما تروح، تبديها من سياقة الباصات العامة لحد اعلى مركز بالحكومة وانت وخيالك. كل شغل اشتغلت بيه وكل وظيفة هنا جانت مديرتي مره. كل دائرة حكومية راجعت بيها اغلب الي يشتغلون بيها نسوان، المجال الصحي كله نسوان المجال القانوني كله نسوان وهلّم جراً. ومو عبالك مثل نسوانه يكعدن بالدائرة يقلّمن باميا وأبو فلان رح يتزوج عليه ويكصن بهاي شلابسه وهذيج مصاحبة فلان لا، نسوان حوك ترجف رجف وتحسبلهن الف حساب من تتعامل وياهن. كائن بشري سليم مو معوقة فكريا وجغرافيا بسبب تراكمات أيدلوجية خلتها تقوقع نفسها بشخصية ام فلان الخدامة الزوجة رقم سين الأخت الفاضلة المنكوحة الزايرة الحاجة البطيخة. هنا تلقى الزلم اكثر شي لو بقسم الـ IT لو بالـ technicians عمال يعني لو مبرمجين لو شغلات شاقة عضلات اغلب شي، اما شغل الإداريات والقيادة و طولة البال والمالية كلها بيد النسوان والنعم منهن عرفن شلون يديرن هلبلد بحيث لفّانه وعوضنا أيام العوق والعرج والكحة بسبب الالتهاب الرئوي المزمن.
ملاحظة زغيرونة: عود احنا ليش نكتب بالعربية الفصحى وهي لغة منقرضة وميتة عبالك واحد لابس عباية امرؤ القيس ويمشي بنص الحمرا هو وبعيره؟ كل العالم يكتب بلهجته محد معبّر انجليزية شكسبير على سبيل المثال ومحد مستّعر من لجهته بس احنا نفيّك... اوف علينا!

#ايفان_الدراجي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات