العنف ضد النسوان بعد الايضاح والاستبيان

جان نصار

الحوار المتمدن-العدد: 5004 - 2015 / 12 / 3 - 19:58
المحور: كتابات ساخرة
    

اكيد موضوع العنف ضد النسوان موضوع حساس ومقلق وافه ومشكلة ضربت كل المجتمعات يعني الموضوع مش مقتصر علينا احنا العرب بس ممكن اننا منحتل الصداره وكمان مندخل بموسوعة جنيس لتحقيق الارقام القياسيه في التفنن بعنفنا ضد نسوانا.
يا جماعه انا الكلام المدوزن والابحاث العلميه والمقالات النفسيه والتحليلات المجتمعيه والكتابات التوجهيه اللي على قواعد واسس سياسيه او دينيه اخلاقيه هاي مش اختصاصي انا دج دجتك العافيه وبكتب بالمشربحي والكلام المنمق والممنطق والمذوق والمروق والمحوق والمطوق والمفوق والمطوق والمعلق والمفتق والمطرق والمصفق مااليش في يعني من الاخر بجيبها على بلاطه على قدر فهمي واستيعابي وروئيتي للموضوع.
بديش اكتب بالتفصيل عن اصل المشكل بس للتذكير مره تاني وعاشره,القضيه الها جذور من ايام ما طرد ربنا سيدنا ادم من الجنه وهو الرجل حاقد على كل جنس حوا...قال ليش ؟لانو ادم بتهم حوا انها اصل البلا لما هفت نفسها على التفاحه تبعة شجرة المعرفي جابت لكل جنس ادم الدور وخلت ربنا يطردهم من الجنه بعد النعيم والكسل والتنبله والمرعى وقلة الصنعه.
صار في شغل وبحث عن طعام وتعب كان الرجل مرتاح منو. ولهيك حقد الرجال على النسوان هاي جذوره.
من ايام العصر الحجري والزلمي جارر المرا من شعرها وحامل الدبسي .هاي بافلام فلنت ستون شفتوها.بس اللي مش فاهمه كيف صناع افلام هوليود شافوا معاملة الرجل للمرأه بهديك الايام وصورولنا ايها بهاي الدقه .
اكتر مصطلح بفتوئني هو جملة مجتمعنا الذكوري وكأنوا ما في نسوان والمجتمعات الغربيه انثويه, ماهي كل المجتمعات مختلطه ويوني سيكس يعني فيها هو وهي والا انا غلطان.لاء وال هاي كلمه تستعمل لتمثيل بلطجة الرجال على النسوان .هلا عيني هلى والله.
زي ما قلتلكم اعزائي القراء انا مش كتير بجمع وكتابتي عن العنف ضد النسوان مش كتابه اختصاصيه يعني ما راح اكتب اسباب العنف الذاتيه والموضوعيه والمجتمعيه والنفسيه انا بكتب انماط وصور يعني ما في عمق اي بشكل عشوائي وهوائي وريائي وبدون مواربه واستحيائي وكمان هاي مش ارائي .
الزلمي الشرقي عنا عصبي وهواوي ومزاجي ونرجسي ونكد وبحب بطنه وتسلطه.
المرا فيها شغلات مشتركه مع الزلمي بس المجاكره والمشاكسه واللعي هاي احب شغلاتها.
بجي الزلمي على البيت بعد الشغل وبلاقي المرا مش طابخه مثلا وقاعده ببتفرج على مسلسلها او بترغي هي وصاحبتها على التلفون وبسألها:
شو طابخه اليوم
المرا:والله ما فضيت يا زلمي من الصبح وانا بشتغل وبس من هاي دخلتك بديت اتفرج على المسلسل.
كلمه منو وكلمه منها وهات يا صراخ وضرب وتكسير والنتيجه اصابات طفيفه او خطيره حسب تطور الوضع.
هلئ هذا عنف ضد النسوان او اختلاف وجهات نظر وتضارب بالاراء والايدي الله اعلم انتوا احكموا.
العنف انواع مدبر او مبرر او غير مقصود او عفوي او عاده او نهج حياه او تعبير عن الرفض وعدم الاستسلام او التعبير عن سيطره ووصايه وحمايه او عقد نقص بالمختصر كل زلمي وعنفه واسلوبه بالعنف.
المشكله انو العنف ممكن يكون باللفظ او الاشاره او الكلام او الاستعانه بالعضلات وهو استعمال الضرب وهو اعلى مراحل العنف.
اما ليش الزلمي بلجئ للعنف...لانه مش حضاري ومتخلف ومعقد وعنده ضعف بالشخصيه.
فمثلا لو حضر زوج الى بيته وشاف مراته عم بتخونه مع رجل اخر.
المفروض انو يكون حضاري ويقول لمرته يا روحي اسحي مره تاني تعيدها وبدون عنف لا لفظي ولا ضربي ويتفاهموا على المراحل القامه في حياتهم.
بس العفو منكم يا حبايبي القراء مثلا زلمي عاطل عن العمل ومش ملاقي شغل والحكومه مقصره والفقر ضارب اطنابه .ويا عيني عليه للزلمي بمين بدو يتفشش اذا ما تفشش وضرب مرته تعبيرا عن سخته واستياءه من وضع البلد السياسي والاقتصادي والتنموي.
اكيد ما راح يضرب الحكومي والمسؤول لهيك مثل هادا العنف اظن انو مبرر وما في عليه حكي من مره.
شوفوا المفروض انو العنف ضد النسوان ما يكون مرحله من مراحل حياة الرجال او في اسؤ اسؤ الظروف يكون اخر حل .بس مع الاسف عند كتير من رجال مجتمعاتنا هو اسرع واقرب واسهل حل توفيرا للوقت وتنفسيا عن عقد النقص والامراض النفسيه التي تعصف برجالنا.
على فكره مشان ما يفكروا النسوان اني متحيز للرجال هاي بس لقطات وشذرات لاتمت الى واقع الكاتب المعيشي وكمان في مقالات قادمه خاصه للنسوان.
كتير من النسوان رغم ذكائهم مشاكسين فمثلا معروف انو الرجال بحبوا بطونهم والاكل عندهم عباده.
فمثلا رجل اكول في الصباح بقول للمرا اطبخيلي اليوم اكله بحبها خلينا نقول كفته بالصنيه والمرا اه طبعا يا حبيبي.بتروح للجكر والنكايه طابخه ملفوف مثلا وهو بكره هاي الاكله موت.
لما برجع اخونا على الغدا وبشوف الطبخه بشيط وبغضب وهات يا مساج وين الجنب اللي بوجعك.
اللي الواحد مش فاهمه ,في يا ترى نسوان بتحب العنف والا اختبار و بشوفوا قديش مدى تحمل الازواج .او الاستفزازت صارت عاده عند النسوان.
على فكره انا ما ببررالعنف والضرب عند الرجال بس اوردت انماط مش اكتر.
قال في مصر الايه معكوسه ويقال انو نص النسوان بمارسوا العنف والضرب ضد ازواجهم .يا تري رح يجي يوم ويصير الكاتب يولول ويلطم ويقول: لا للعنف النسائي ضد الرجال وان مجتمعاتنا الانثويه تمارس انثويتها على ذكورنا.
في نهاية كتابتي للمقال دخلت علي زوجتي ورميت عليها ورده وهيي رمت علي قوار زريعه واخ يا عيني واخ يا راسي وعفوا مضطر انهي مقالي هناك غبش وزغلله في عيوني.
الحريه والمساواه للرجال هي حق تكفله كل مواثيق حقوق الانسان ولهيك ارحمونا يا نسوان.

http://www.raialyoum.com/?p=351915
ضرب الرجال هو اصلاح وتهذيب وضرب النساء هو انتقام وتعذيب.
بس مع هيك مش بقولوا: ضرب الحبيب زبيب.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات