وحدوووووووه

حلمى حمدالله
كاتب ومفكر

الحوار المتمدن-العدد: 5001 - 2015 / 11 / 30 - 13:31
المحور: كتابات ساخرة
    

وحدوه
فى قصره المنيف بالقطاميه وقفت السيده اشكنياز كستاندى ....زوجه المرحوم زهدى عبدالنبى بطيخ ابوالعتاريس الوجيه الأمثل .....تراجع الترتيبات التى تتخذ بعد وفاته صباحا بعد ان اخبرتها الممرضه الخاصه به فى المستشفى المعالج فى لندن بوفاته ...فقررت تستعد
_ اشكيناز: فين رفقى مدير اعماله...
_رفقى : انا هنا ياهانم ....اامرى ....
_اولى بلغت شركات التأمين...المرحوم كان عامل لايف انشورانس محترم...
_تمام يافندم وبدانا اجراءات المطالبه
وحضرتك بكره فى مواعيد اونلاين مع مسئولين البروفايلز ....ومديرين شركات الأوف شورز وكايمين ايلاندز .....وبنوك سويسرا وشركات لندن ......
_يارفقى خلى الكلام ده بكره بعد الجنازه.....قولى الجثه اخبارها ايه ؟؟؟؟
_بعتنا خبيره تجميل تايلانديه على المستشفى فى لندن تعمل للجثه مساج وليزر وميكاب قبل ما تيجى مصر تتغسل
_كويس ...والنعى يارفقى
_سعادتك فى صحفه كامله فى الأهرام والأخبار والجمهوريه.... والمصرى اليوم وصباح الخير وصباح النور...والأيجيبشان جازيت والأهرام ابدو ....وبره نشرنا فى الجارديان والتايمز واللموند.....
_والجنازه ؟؟؟؟
ساعتك احنا مرتبين خمس جنازات ....عمر مكرم الجنازه الرسمى ودى لاعضاء الحزب ...والأهلويه والمدخنين....والحمديه الشاذليه ودى للمعارضه والزملكاويه وغير المدخنين.....وال رشدان علشان اصحاب الباشا اللواءات والقضاه....وقداس فى سانت تريز عشان اصحاب الباشا من الأخوه الاقباط ....احم ....وواحده فى بلد زهدى بيه والدايره الى بيمثلها فى المجلس ..... "ميت سملح العتاريس" ....زى ما حضرتك طلبتى عشان ماحدش منهم ييجى السرايا....
_هايل ...
_مش بس كده احنا حجزنا كل وسائل الموصالات البيجو والسوبرجيت وشرق وغرب الدلتا من هناك لهنا لمده اسبوع ....عشان نضمن الموضوع ده ......
_طيب والسهره
_السهره فى نفس الأماكن ياهانم ووهتتنقل على كل الفضائيات على النيل سات والأراب سات والهوت بيرد ...والحياه السودا ....بتاع الجنازات ..... وس ان ان ...وسى اى سى حصرى لباقى دول العالم ...وساعتك احنا جايبين مخرج حفلات امريكى ...وبنتفق مع عصام الشوالى عشان يعلق ع الجنازه....وفى 4 دى جى و5 مهندس صوت و12 كاميرا متوزعين على كل الأماكن ....وفيلم تسجيلى قصير عن حياه الباشا وكفاحه ....هيتعرض على اعلانات كوبرى 6 اكتوبر ....وعملنا هيدفون فى كل كرسى بتذيع قرءان باربع اصوات لاربع شيوخ مختلفين..... كل واحد يختار الشيخ الى على مزاجه ......وواحده موسيقى هاديه للى عايز يريح..... وواحده شعبى حزين للى نفسه يعيط ...
_هايل يارفقى
شركه الدعايه والتسويق" كلتش " الى احنا متفقين معاها ...بتقترح الجنازه تاخد الشكل الفيكتورى يافندم ومحددين للحضور وساعتك والأولاد" الدريس كود "وشكل بوكيهات الورد .....وفساتين السورايه .....والبيريهات
_طيب والمدافن يارفقى....
_ممكن ندفن فى المدفن الجديد فى التجمع ياهانم .... عشان الباشا مادفعش اخر قسط فى مدافن مارينا..... اوانا باقترح...... بورتوالغفير.... لانها قريبه من القاهره والمصيف وساعتك تقدرى تزورى البااشا فى اى وقت....
_دى مش مشكله انا هتابعه من الكاميرا الى فى المدفن من اى حته بالتاب ع النت
المعازيم يارفقى....
_سعادتك اتفقنا مع كل الأعلاميين والمشاهير وطمناهم اننا هندفع زى اى برنامج توك شو محترم ....
الأستضافه سعتك كل معزى ليه تذكره اقامه كامله فول اوبشن فى ااقرب فندق للجنازه ... الجنازه نفسها اوبن بوفيه ....والشيف الشوربجى هيحضر بنفسه ...

_هايل يارفقى ....اوووو شفت.... كنا هننسى السوشيال ميديا....فين السوشيال ميديا اكسبيرت ....عملتى ايه وايه ترتيباتك ....
_سيادتك احنا غيرنا الستاتيس بتاعه البيه وساعتك والأولاد على الفيس بوك والانستجرام والبوكيت والواتساب والفيبر ....
وعملنا اكتيفيشن للشركه اللى هتدير حساب المرحوم بعد وفاته ...
وحطينا شريط اسود على كل الصور والبوستات من امبارح.....
وفتحنا جيست بوك للتعازى ....وفويس ريكورد للى عايز بعزى بصوته او يصوت ...
ده غير الاعلانات الى نزلت على سايت مرحوم بوك ...ووحدوه دوت كوم .....وودع هواك دوت كوم ....واخر مره تشوفه ياقلبى دوت كوم ...
دا غير انه هيبقى فى بث مباشر للجنازه والسهره على اليوتيوب و .....احم احم.... البرازورز
_ايه انت اتجننت
_اتفاقنا معاهم كده يافندم
طيب خلاص... انا اهم حاجه عندى الترافيك ...واللايكات والكومنتات والبوستات ....مش عايزين حد يزعل مننا او ينتقدنا ....انت عارف جوجل عامل ازى ودول مابيرحموش ....
_متقلقيش خالص ياهانم.....
_ تليفون لساعتك من الممرضه فى لندن......مش مهم دلوقتى هاكلمها بعد الجنازه تلاقيها عايزه حسابها ...
_تمام يافندم
السوشيال ميديا اكسيبيرت .....تضغط على زر الموبيل لتسجيل المكالمه للهانم ....
...وينطلق الصوت الممرضه...
مسز انشراح....مستر زهدى فاق واك اب وعايز يكلمك .......

#حلمى_حمدالله (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات