من حكايات حجي راضي

راضي العراقي

الحوار المتمدن-العدد: 4975 - 2015 / 11 / 4 - 19:36
المحور: كتابات ساخرة
    

وقف حجي راضي خلف السلك الشائك ومجموعة من الكتل الكونكريتية التي تحيط ببوابة مركز الشرطة الحصين وهو يتوسل بالحرس لكي يسمح له بالدخول لمقابلة ضابط المركز .. عمي بلكي تخليني افوت أشوف الضابط .. ويجيبه الشرطي بعجرفة : أأأي عمي انتظر بعد شوية خلي يخلص التعداد .. ينسحب حجي راضي ليجلس القرفصاء مستنداً بظهره الى السياج الكونكريتي العالي .. وهو يفكر بحال عبوسي الذي أُلقي القبض عليه بتهمة شرب الخمر .. حينما داهمت قوة أمنية الحانة التي كان يرتادها .. وراح يحدث نفسه بصوت منخفض .. هذا الاثول شكم مرة گتله لاتشرب عرگ .. شلون مصيبة هاي .. هسة لو جايب الشرب مالته للمحل .. هم چان ما وگع بهالورطة .. وفجأة ينهض حجي راضي بعد ان شاهد الحرس يسمح لأحدهم بالدخول حتى دون ان يسأله ..فذهب يسأل الشرطي : ها عمي أشو هذا الرجال دخلته .. شنو الموضوع ؟ أجابه الشرطي يهمس في أذنه : عمي انته تعرف منو هذا الفات ؟ أجابه حجي راضي وهو يتراجع بخطواته الى الخلف : لا والله عمي .. شمعرفني بيه .. منو هذا ؟ اجابه الشرطي الذي بدت عليه علامات الخوف : عمي هذا ابو حيدر ماميته .. شلون متعرفه . فرد عليه حجي راضي : حيدر ماميته منو ؟ وانت ليش خايف ؟ عندها شعر الشرطي بالحرج .. فأجابه وهو يستقيم بوقفته : لويش خايف ؟ بس هذا حيدر ماميته صكاك وكاتل بالعشرين واحد .. ارتد حجي راضي مرة اخرى الى الخلف وتساءل بتعجب : كاتل عشرين واحد ؟ وهسة موقوف بالمركز ؟ أجابه الشرطي : إي عمي ويومية يجون اهلة وجماعته يواجهوه ويجيبولة أكل وكل اليحتاجة .. وأحنة منكدر نمنعهم .. لان نريد نتچفه شرهم .. فأجابه حجي راضي : اااااي وأكيد هسة الضابط گعده لابو حيدر ماميته بغرفته وراح يقدمله چاي لو بارد .. وأكيد حيدر هسة كلشي متوفرله .. وحتى موبايل وانترنيت عنده ..
عندها قاطعه الشرطي : عمي أستر علينه .. لا تظل تحچي .. متگلي انته شعندك جاي تريد تقابل ضابط المركز . عندك موقوف ؟
اجابه حجي راضي : هااا اي والله عمي جاي علمود عبوسي . كالوا موقوف عدكم .
فسأله الشرطي : وشمسوي هذا عبوسي ؟
رد الحجي : والله عمي ..على اساس فاتح تلاثة . فرد عليه الشرطي بأستغراب : فاتح تلاثة .. أيباااااااه .. هذني وين لگاهن ؟ وشلون اهلهن ساكتين ليهسة ؟
عندما ابتسم حجي راضي وقال له : عمي على كيفك .. عبوسي فاتح تلث قواطي بيرة .. چان كاعد بالبار وجتي الشرطة لمتهم ..
عندها استعاد الشرطي توازنه وقال : اهوووو ذولة جماعة أهل العرگ .. عمي هذولة ديشربون منكر وتدري احنا بلد اسلامي والي چان يسووه حرام ... عندها نظر حجي راضي الى الشرطي وهو يعدل هندامه وقال له : عمي هسة صار الي يسويه عبوسي حرام ... ؟ واللي يسويه حيدر ماميته حلال ؟ عمي .. أحنا لشوكت نبقى نقشمر على نفسنا .. ولشوكت نقيس الامور بهذا الميزان الاعوج ؟
لم يجد الشرطي جواباً غير ان قال لحجي راضي : عمي رحمة لوالديك .. دروح أوگف على صفحة وهسة من يخلص الضابط اخليك تفوت .. تراجع حجي راضي مرة أخرى وهو يهز يديه استنكاراً لما شاهد وسمع .

#راضي_العراقي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات