الدول المارقه تتحدى الخارقه لتصبح حارقه

جان نصار

الحوار المتمدن-العدد: 4965 - 2015 / 10 / 24 - 19:39
المحور: كتابات ساخرة
    

من ايام الرئيس الامريكي بوش الاب وبعده بوش الابن وكل الادارات الامريكيه لغاية يومنا الحالي بعتبروا انو سوريا وكوريا الشماليه وايران دول مارقه.
شو معنى دول مارقه؟
يعني الدول اللي بترفض الهيمنه والتسلط والاحتواء الامريكي بمعنى انهم معارضين لسياسة امريكا وما بدهم يدخلو تحت جناحها.
طيب هل هي دول ديمقراطيه وفيها حريات وعداله اجتماعيه؟
اكيد لاء احنا مش راح ندافع عنهم من هذا المنطلق.
لكن التقيم الامريكي ودول الغرب مهزهز ومش عادل ومتحيز.
فمثلا دول مثل السعوديه وقطر والخليج وغيرهم وغيراتهم ليش مش دول مارقه بحساب المقايس الامريكيه رغم انهم دول مش بس مارقه, لا بل ساقطه وفارطه وهابطه وبالاخير ناططه على مقدرات وثروات وحريات وديمقراطيات شعوبها غير انهم بيتدخلو بسياسات دول غيرهم.بس هدول ماشين حسب ما بدها امريكا وبستين الف داهيه الحريات وحقوق الانسان طالما في فلوس ونفط ومصالح.
ليش احنا الشعوب المصتضعفه والمسحوقه والمهمشه والمستغله وحتى المحتله من قبل اسرائيل منتعاطف مع هاي الدول اللي بسموها مارقه حسب التعريف الامريكي.
لانه هاي الدول بتحدى امريكا وسياساتها مش بتتواطئ معها رغم استبدها ودكتاتوريتها.
بصيبنا نوع من النشوى والشماته لانو في حد يتحدى جبروت وهيمنة العم سام والدول الخارقه مثل بريطانيا وفرنسا اللي استعمرونا واحتلونا وذلونا.
يعني لما كوريا بتحدى امريكا بالنووي منصير نرقص ونهلل رغم انها دوله مستبده.ولما ايران بتقول انها راح تنتج القنبلي النوويه كمان منفرح رغم انها يمكن تسقط على راسنا قبل سقوطها على الامريكان.
عنا عقده من الامريكان والهمبرغر والكوكا كولا رغم اننا منوكلها ومنشربها اكتر منهم.
اذا كانت امريكا معنيه بالديمقراطيه لشعوبنا العربيه احنا موافقين اذا دمقرطو وتمظرطو كل دول التخلف وقمع الحريات ,مش خيار وفأوس وبندوره وتفاح.
يعني سعر سوريا بالديمقرطه يكون مساوي لسعر السعوديه وقطر والمغرب ودول الخليج والاردن مع ايجاد حل للقضيه الفلسطينيه .
ثم بردون والعفو منكم, هلىء استدركت ليش يا خوي هي امريكا حاكمي العالم شو خصهم فينا ليش ما يتركونا بحالنا.واحنا الشعوب منقرر مصيرنا لحالنا.
بالمختصر هاي الدول المارقه بتتحدى الدول الكبرى الخارقه وصارت مثل المأكولات الحارقه على معدة امريكا والغرب
..................
الحوار بين اخونا ابو رايق والعم ابو فايق قبل يومين سمعتهم بتحدثوا:
فكرك يا خوي ابو رايق بسأل العم ابو فايق ,راح تولع اكثر من ماهي مولعه بدخول روسيا على الخط والملعب السوري بالهجوم وراح يجيبوا نتيجه ونخلص والا لاء.
والله يا ابو رايق بعرفيش انا خايف بس على المساكين والمشحرين من اخوتنا السورين اي هو بعد بدهم قوات اجنبيه مشان يدمروهم اكتر.
والله يا ابو فايق اكيد هاظه ابو علي بوتين راح يخلصنا بالفتح المبين ويطردوا كل الغازين من هدول الارهابين.
سمعتلك يا ابو رايق انو هاظ زعيم كوريا الشماليه والله ماني متذكر اسمه اظنلك والله اعلم بينغ بونغ مهدد تركيا انو يمزعهم ويقصفهم نووي اذا حاولو يطيرو الاسد.ترى هاظ مجنون وعقلاتو خزق حتى اميركا بتخاف منه.
ما ضل حدا الا واتدخل بسوريا. اميركا والغرب كله بريطانيا وفرنسا والسعوديه وقطر نازلين بالدفع والدعم والبعبصه ومن جهه تاني ايران وروسيا وابصر مش عارف مين.
يا خوي هي حقل تجارب والا شو ومالقيتوش الا سوريا.
طب انت يا ابو رايق مع مين؟
والله انا مع كل الشعوب المسحوقه ومع اخوانا من الشعب السوري وبصراحه بشجع الدنمارك.
شو دخل الدنمارك على الخط وبموضوعنا.
لانو هاي البلاد يا خوي بلاد تخلف وحروب وقلق وانا اليوم بخريف عمري نفسي اروح على بلد شعبها سعيد وسمعتلك انهم اسعد شعوب الارض ومن الاخر انا زهقت خوازيق وقلق وخوف وتخلف وحروب.
وبعدين خليني اشوف واحدي شقرا وحلوي وعيونها زرق زهقت هاي اللي عندي نفسي اغير.
اخ يا ابو فايق طول عمرك نسونجي لفيت لفيت بالحديث عن السياسي وبالاخير ارجعت على النسوان.
يا خويا يا ابو رايق ليش احنا العرب في عنا شئ برفع الراس وننشغل فيو غير الحروب والنسوان والمصاري واكيد الله الو الحصه الاكبر خصوصا لما نكبر ونشوف اننا وصلنا للمرحله النهائيه من العمر بصير حبينا.
طب واخرت الحرب بسوريا لوين راح توصل. والله ياعمي وصلت على اليمن وبكره ابصر لمين الدور.
ليبيا والعراق وفلسطين هدول ما دخلنا فيهم هدول كمان مولعين, اكيد في مفاجأت قادمه .انتظرونا في حروب قادمه كثيره.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات