الخيار العسكري لقطر لاحتلال الصين

جان نصار

الحوار المتمدن-العدد: 4963 - 2015 / 10 / 22 - 17:51
المحور: كتابات ساخرة
    

كل يوم بقول بديش اكتب عن السياسه واصلا صار عندي وعند المواطن العربي قرف واحباط ويأس من اخبار مجتمعاتنا الاليمي والمفجعه والمخزيه واللي بتخري. ورغم هيك بالاخير منرجع على السياسي اصلا احنا العربان شو شاغلنا غير السياسه والاديان بعيدا عن حقوق الانسان ومساواة النسوان..
تصوروا ان قطر على لسان وزير خارجيتها بتصرح انها قد تختار الخيار العسكري في سوريا لازاحة الاسد وبعد الانتصار راح يتفضو للصين وممكن انهم يحتلوها بعد قصفها بالنووي القطري.
مش عارف هو شر البليه ما يضحكو او على قولت المثل مجنون يحكي وعاقل يسمع.على فكره عن جد قطر في عندها جيش .ما هي كل سكانها بنزلو بفندق بالصين.
اوكي انا موافق انو الاسد دكتاتوري مستبد اخو شليتي وخلصوا مياته والسورين بطالبوا بالحريات وتغير نظام الوراثي.بس هاي وظيفة السورين انفسهم هذا من جهه ومن جهه تاني شو اللي عاصص على ذنبت قطر تنها بدها تنحيتو وعلى اي اساس .
فمثلا هل قطر دوله ديمقراطيه او حتى فيها حريات وحقوق انسان والا فيها مؤامرات وانقلاب الابن على الاب من الجد وحتى الحفيد.وبعدين قطر موزعه ثرواتها على مواطنيها ودوله وطنيه. فش(ما في) فيها اكبر قاعده امريكيه في الشرق الاوسط والعالم بعد اميركا.
شو السر يا ترى هادا الحقد السعودي القطري على النظام السوري, ما انتو اطقع.
والمثل بقول يا قطر والسعوديه ومن لف لفيفكم كحكام انتو مش افضل من الاسد.قال :لا تعايرني ولا اعايرك الهم طايلني وطايلك, ومن عندي راكبك
اظن انو وزيرة الدفاع القطريه الجنراله والعميده واللوائه(على فكره هي المناصب لا تؤنث كلاماتها بالعربيه بس انا مبدع ويحق لي ما لا يحق للمتنبي) الشيخه موزه راح تقود الجيوش بنفسها.
لاء وقال شو الحلف التركي السعودي القطري بدهم يواجهوا روسيا ويهزموها على الاراضي السوريه ويطيحو بالاسد .ومن هناك هيك هيك معهم جيوش ومرتزقه وقوه بنزلوا على روسيا وبضلوا فيهم دق دق على روسهم لحد ما يقاقوا ما يلاقوا.
السعوديه كمان وزير خارجيتها النجم الصاعد والساطع عادل الجبير وين ما راح مش حافظ غير جمله واحده واللي هي :الحل بسوريا بدون الاسد ولا مكان له.
حتى رئيس فرنسا هولاند صار زي الببغاء يردد مقولة الحبير لا حل بسوريا مع الاسد.. نفس جملة السعودين(على القليلي غير بالكلامات يا هولاند), بعد ما رشو ورشرشو السعودين المليارات بالصفقات والعطاءات للاخوه الفرنسين.
يا حكام السعوديه اي نعم انتم احدى اغنى دول العالم وناهبين ثروات بلادكم ومجيرينها لصالحكم بس هناك الملاين من شعبكم بحاجه لهالفلوس اكتر من البعزقه يمين وشمال مشان اسقاط الاسد.
تخيلو لو هاي الميليارات اللي صرفت على محاربة الاسد وتدمير سوريا والعراق وليبيا ولبنان و و و و, ودعم الارهابين والمرتزقه, صرفت في اعمار وتنمية الشعوب العربيه بدل صرفها على الاسلحه والحروب ونشر الفكر الوهابي,كان وين صرنا.
هأقولكم بلاش هاي الميليارات تصرفوها على العرب اصرفوها عل شعوبكم وحاولو تتخلوا عن جهلكم وتخلفكم .افتحوا مدارس اكتر وجامعات ومستشفيات ومصانع و تنميه وبنى تحتيه. اقضوا على الانسه بطاله واتفقوا مع السيده حريه ان تصل الى بلادكم بجوز تستفيدوا.
اكيد انسه بطاله وسيده حريه والاخت عداله اجتماعيه والخاله مساواه هدول مؤنث مش مذكر ولهيك هم مرفوضين من مجتمعاتكم.
يا اخوانا القطرين والسعودين والخليجين طالما انكم من محبي الحروب ,شو رأيكم تحاربوا الجهل وحاربوا التخلف وحاربوا الارهاب وحاربوا الفقر وحاربوا البطاله وحاربوا المرض وحاربوا اليأس والاحباط اللي ضارب عامة شعوبكم .
طالما اننا مع الحروب يللى حاربوا العلم وحاربوا التقدم والازدهار وحاربوا الابداع والرقي والادب والفن والرسم والرقص والغناء والحداثه والتنوير اظن بعد كل هالحروب اكيد راح تلاقوا وقت لحروب جديده او حتى قديمه انا ماذكرتهاش.
سمحت السعوديه للمرأه ان تترشح لانتخابات المجالس البلديه لاول مره بعد ما كل نسوان الارض وصلوا المريخ والقمر.
لاء وايش عدد المرشحات 366 مرشحه ممنوع يخالطوا الرجال وممنوع الدعايات الانتخابه وممنوع وممنوع. بصراحه ممنوع يترشحوا اقعدوا بالدار وبلا غلبي.تخيلو رئيسة بلديه ممنوعه من ان تقابل المراجعين من الرجال وينوب عنها الوكيل ويا ترى الوكيل مين راح يتوكل عن توكيله.
لاء وبتسألوني ليش هسترت وانجنيت واجرت كل الطوابق وصرت مهوي وخالص كازي.
خلص بلاش سياسه .طيب شو اخر مستجدات الانتفاضه الفلسطينيه واخبار الانتخابات النيابيه المصريه والازمه الليبيه والمشاكل اللبنانيه وغليان الحكومه الاردنيه واخر اخبار الصحراء الغربيه والمملكه المغربيه وقضاياها الحكوميه ووين وصلت القوات العراقيه بمحاربة الدوله الاسلاميه الداعشيه والحرب اليمنيه والمشاكل الارهابيه في الدوله التونسيه وصراع الجنرالات في الدوله الجزائريه.
خلص حل عنا يا خلصنا افرقنا بريحه طيبه.

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات