السحابه مكانشي ليها بيت

عادل عياد

الحوار المتمدن-العدد: 4956 - 2015 / 10 / 15 - 01:14
المحور: الادب والفن
    

في ليل ..
هناك ..
سهران وحيد ..
الشمس غابت في الرجوع
وكام نجمه بتراقب
مطره اخترقت قلب الصيف
والسحابه مكانش ليها بيت
الأرض تعبت من كُتر الحمول
قالتله توه بعيد عني وروح
بوح للسما
أنا مابقتش حمل البوح
حتى عقارب الساعه اتمردت
اللي بتخطيه للأمام
ترجعه تاني لورا
أرض الأحلام مفتوحه قدامه
لكن عيونه لسه بردو مفتحين
صاحيين على الواقع ...

تصارعه الحاجات
فاكر في لحظه يقدر يزوغ من اللي فات
حتى عقله اللي مات
بيطلع من قبره أحياناً
ويلعب في الذكريات
لعبة الموت
...
السما بعيده ومابيقدرشي يلمسها
بس في خياله بيجري ساعات ويحضنها
يمشي هناك في الشوارع
و الشوارع بتتخلل جواه
تقابله فراشه سحريه
فيلعبوا مع بعض شويه
وبعدين يقتلها ويدفنها جنب عقله
في مشهد غريب

شعوره بيناديه فيسرح
ويفكر في كام بيت عدى من عمره
وليه حطوا أول طوبه
يجري يجري يجري
واتاري اللي بيجري ضله
أغنية " ساعات "
عنده هو ساعه واحده
وباقي الساعات ضاع منها عنوانه

يدَور وسط كراكيب حياته
بس التراب قاصد يغطيهم
فيكسر أشجار كانت بتضلل عليه
وبتقف معاه في المحن
وتديه من طرحها

سور جنونه بيقفل عليه الأبواب
ويخلي سنينه تغتالها الأوهام

بهتان ضوء القمر
والشمس دمرت الظلام
طلعت العصافير تفطر
بس الليل لسه جواه
هو المسيطر ...

#عادل_عياد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات