( لو تشيل لو تشتكي لو تدفع الايجار )

راضي المترفي

الحوار المتمدن-العدد: 4945 - 2015 / 10 / 4 - 14:16
المحور: مواضيع وابحاث سياسية
    

حلوه صاحب الملك .. حلوه حيدوري وانت تمارس دور صاحب الملك وتهدد ( المؤجرين ) العشتيه والنايمين بروس اليتامى للظهر .. حلوه وانت ابو البيت والقانون والسلطه , لكن المو حلو ياحضرة الملاك انت انطيت مهله قليله ومافكرت خطيه وين راح يولون قابل ينامون على الرصيف وبيني وبينك اني اشك انك قادر تشمر غراضهم بالشارع وامام كل الناس تكول ( شسويلهم صار 12 سنه الجماعه مثل جهنم بس يعبون وايجار ميدفعون اذب غراضهم بالشارع ويطبهم الف مرض ) تعرف ليش اني اشكك بقدرتك .. لا العفو ابو كرار الخلل مو يمك ولو انت رجال مسالم وما تحل رجل دجاجه لكن المؤجرين كلها روس كبار وحتى يمكن ( الطخماخ ) مايجيب نتيجه وياها ومتعلمه على شغل ليل وصلافه وبوك وحرمنه عيني عينك وعندهم ربع شقاوات وببلطجيه وسرسرية وولد كلب وحتى حشاك بيهم ( كواويد وعواهر ) اشلون راح اتدبرها وياهم وانت الخير وخوش ولد وتستحي من خيالك ابو كرار الورده . وبعدين شتتصور حضرتك بس تكول شيلو يشيلون ؟.. لك يابه ماحسبت هاي البيوت والقصور المعشعشين بيها بايكين نص العراق وضامينه بيها ومن يشيلون بهيج سرعه تطلع البوكات على الاقل ياعيني ياحيدوري انطي مهله اطول خل يكملون ويعبرون بوكاتهم المضمومه بالبيوت وره البوكات العبروها للخارج سويها اسبوع اسبوعين وهم تره متكفي لان المبيوك مو هين وتدري الجماعه المؤجرين وصلو ببوكهم وسرقاتهم لفساد الملح لا صدكني باكو حتى الملح والبنك المركزي تقريبا صار يشبه بيت المال بزمن علي بن ابي طالب من بعد ما يجمع المسلمين ويوزع عليهم الوارد بس الفرق الامام علي عليه السلام يوزعه على الكل ومايفرق بين سني وشيعي وكردي وعربي ومسلم ونصراني ومن يخلص التوزيع يصلي ركعتين والجماعه اشتغلوا عكس هذا ونسوا الامة وحضروا بس هم وبالتوزيع تحاصصو حرامي كتب على صدره الشيعه ولص كتب السنه وسارق كتب الاكراد واجاهم رابع كاتب على صدره ( القوميات الاخرى ) الثلاث حراميه التفتوا عليه ودفروه دفرة حرامي واحد ولحد الان فاقد الوعي وانت تعرف ابو كرار حراميتك حتى صلاة ما يحسنونها ومايحتاج البنك المركزي صلاتهم اكيد . المهم حيدوري اني خايف عليك من ذولا المؤجرين الحرامية الاشقياء المايخافون من الله ولايجون الا بالعين الحمره والشسمها هم الحمره وانت اثنينهن صعبات عليك وخوفي مو على الايجار لان ماراح يدفعوه لا هاي نعرفها ومتعودين عليها لكن اني خايف عليك انت لاتروح بالرجلين بقضيتك ويا هذولا الحرامية الارهابيين وبعدين يروح تهديدك لهم من كلت لكل واحد منهم ( لو تشيل لو تشتكي لو تدفع الايجار ) ادراج الرياح مثل مايكول المثقفين وتشيل وتشتكي انت وهم لايدفعون ولايطلعون ويضيع الايجار وحيدوري .

#راضي_المترفي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات