سفر نعناع

محمد مواش

الحوار المتمدن-العدد: 4904 - 2015 / 8 / 22 - 13:20
المحور: الادب والفن
    

"سفر نعناع"

ابلل واهسي بطاريك..وأشر الدمعه فشلة حنه عالبيبان..
اتيمم بحرگة خوف.. واصليلك شمع بردان ..
رد شهگة ملاگه.. بريتي متانيك ..
وظنوني نعش دخان..
يشيعني جفاك تراب..
وأرد تابوت خيبة حيل يفززني گبر وحشه..
كل حسبة دمع تصهل ملامح طيف للغبشه..

وأنشغ ساجيه اتاني الضوه مرطوب ينشف للعتب چلمه..
آنه عيوني گمر مهظوم غفله نباگ من حلمه..
وآنه ادري الحلم وهواس يمته يغازل النجمه..

تانيتك حدر كل سدره خدرانه بخت وفياي كعدنه بسدها نلعب طيش..

أتناوش خيالك ماي وأشد رمشك ضفيرة ليل..
وأمد الصفنة سچة غيم يسحگها المطر چم ريل..
لحد ما خضر ابالي العطش عطاب..
يمته تمر يضلع الماي..
لباريك بهوه غافي حلم گمرة وغنه ولايات..
ونتبده اعله طاري الليل نتعاتب بصم ضحكات..
وأتعناك نثة هيل نده ونتشلبه المرايات..
ويضيع الحچي بجرفي..
بخلگ ناعور ابدي سوالفك فوگ الوجوه فياي..
زلوفك سعف تخدر والتراچي عثوگ..
تسكر رطب كتر الماي..

اليشرب من لمى شفافك ضحك چرچف ضوه دافي وبرودة طيف..
يعرگ للخمر كاسين..
كاس بشعرك اليتبده فوگ الغيم نده ويمطر عطش صحره..
وكاس عيونك مرايات تمد چف السمه ولايه لحد رمش الضوه بخصره..

وبعدني متاني وشلة ظلمه تنشد بير يترس مستحه الفانوس..

لهسه أفرش شمع ودموع وسولفلك بچي وبخور..
أحني ظنوني بدموعي وتناوب جفن متعوب يسهر للعشگ ناطور..

أنعسلك شذر دافي واغفه بخدك بريسم..
وحرير يهفي همسة ليل وگلای-;-د تصحه ويا اخر نفس خدران من نشتهي الورده متاع..
رافگني "سفر نعناع"
راودني رفيف طيوف من تفرع شمسنه شراع...
......
محمد مواش - النجف

#محمد_مواش (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات