صباحوووو

عماد عبد اللطيف سالم
كاتب وباحث
(Imad A.salim)

الحوار المتمدن-العدد: 4792 - 2015 / 4 / 30 - 21:04
المحور: كتابات ساخرة
    

صباحوووو


عندي صديقة " افتراضيّة " تخبُّل .
بـالـ ( About ) مالتهه كلشي ماكو ، غير ال ( Born ) =
December 1995 .. وهيّة عمرهه قريب الـ 95 سنة ( إلاّ شويّة ) .
هسّة تكَولون : شلون عِرَفِتْ عُمرها 95 ( يمكِنْ شويّة أقل ) ؟ آني أكَلكُم شلون . قبل ثلت إيّام ، وآني دا اقره منشوراتكم ، وشبعان مغثّة .. ودا أتابع " سّيْر المعارك " على كافة الجبهات . وبعدين من جيتوا وطمّستوني بهاي شغلة القانون مال الكونغرس الأمريكي ، دزّتلي صديقتي "حسناء الغُبْشَة" رسالة كِتبتْ بيها : " هل رأى الحبُّ سُكارى مثلنا ؟ " . طبعا آني ردّيت عمياوي : لا يابه .. وداعتج .. فلا أكو سكارى مثلنا .. حتّى بـ " بارات " الصالحية " المقندلّة الوادم بيها تقندّل .. في زمن الستينيّات الجميل ، من القرن "المُنصَرِم ".(ولحّدْ يسألني شنو معنى " مُنصَرِم" هاي ..لأن ما أعرُف معناها ) .
صديقتي هاي كلّش مُعجبة بيّه..ودائماً تكتبلي:آني أحبّك حُب "خورررافي" . يمكن لأن تدري آني لا أهّش ، ولا أنّش .. ولا أنوش .
ويومية .. وأوّل متنام " المَرَة " ( سبحان الله .. ما أدري شلون تعرف المَرَة نامَتْ ) .. تدزلي صورة تشبه صُوَر مارلين مونرو ( الله يرحمهه ) من جانتْ تضوج بالليل .. و ويّة كا صورة خمس كَلوب حُمُر صغار ، وأربع عيون " زروق " ، تِبْجي .. و " تُبرق بروق " .
وكلما نعبُر الساعة عَشرة مساءاً ، و نوصَل قريب نص الليل .. تكتبلي : صباحوووووو .
والعِشِك تالي العُمُر .. ياذينا .. إي والله ( يبو نايف ) .. ياذينا .

#عماد_عبد_اللطيف_سالم (هاشتاغ)       Imad_A.salim#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات