مؤتمر قمة حنا الحزم وقراراته

جان نصار

الحوار المتمدن-العدد: 4764 - 2015 / 3 / 31 - 20:24
المحور: كتابات ساخرة
    

كالعادي نتيجة استعابي البطيئ اليوم ادركت انه كان هناك مؤتمر قمه عربيه في منتجعات شرم الشيخ من منطلق ان الطقس ربيع والاجواء مشمسه والجو بديع وراح نسكر ونحل كل المواضيع وما في حق عربي ممكن يضيع حتى لو كانت القرارات ترقيع بترقيع. مؤتمر من غير تلميع ولا حتى تقطيع بس بدنا شوية تشجيع لانه نتائجه راح تكون اشي كتير فظيع.
الاجواء كتير اورجينال والسياحه عال العال والاكل والشرب كله سبيسيال ضروري لهيك جمعة زعماء واحتفال وبوس اللحى والدقون شغال.
شو الموضوع يا اخوان ولشو العجله خير اللهم اجعله خير.جماعتنا السعودين جمعوا الخرفان عفوا العربان وقال في اعتداء على الامه العربيه.
السعوديه تقدم للحضور قبل الافتتاح اغنية مقادير وتجيبها مصر باغنية نعيش لمصر ونموت لمصر تحيا مصر وترد فلسطين باغنية علي الكوفيه ولولح فيها,لتجيب الامارات باغنية انا الشاكي وانا الباكي, ولتختتم موشح الاغاني باغنية دولة الكويت ليله ليله ليله يا ليله ليجيب عليهم كاتب المقال نفسي اسهر معكم ليله ولتختتمها الشعوب العربيه باغنية جاي تقولي معليش خلاص وتكلمني عن الاخلاص.
خلينا بموضوعنا يا حضرة الكاتب كل مره زي عادتك بتسرح وتمرح فينا وتنسينا اللي علينا وفينا ولايش بدينا ولوين راح تودينا .هات المفيد وبلا لعي.
قال في اعتداء من دولة اليمن الكبرى على شعوبنا العربيه ولازم نلجمهم ونوقفهم عند حدهم ولهيك دعناكم يا خرفان على هاي القمه الطارئه.
تصوروا مشاكل داخليه في احدى افقر دول العالم العربي اللي هي اليمن صارت تشكل خطر للعالم العربي.معقول هادا الحكي.
معقول ونص. عندهم خناجر نوويه وخناجر باليسيه وخناجر من نوع ميغ وشبح وسوخوي وعندهم خناجر من غير طيار ولا عيار وعندهم خناجر من نوع لاو وتوما هوك وخناجر بتطلق اشعة سينيه وليزر ومقاومه للدبابات والطائرات وخناجر راجمه للصواريخ و و و.شو بدي اعدلكم تا اعدلكم عندهم حتى خناجر دمار شامل.
يا حضرة الكاتب هدول اليمنين عندهم كل هاي الاسلحه معناتو بشكلوا خطر على السلم العالمي كله مش بس الوطن العربي وحبايبنا السعودين معاهم حق بعاصفة الحزم بعد ما دعموا عاصفة الصحراء على العراق .حلال عليهم والله الجماعه كفو.
شوفوا يا حبايبي القراء النخوه العربيه موجوده ولهيك حنا الحزم مع اخوتنا السعودين ومع تحرير اليمن من الغزاه ممكن ها ترى ممكن اننا نزيد عيار التضامن مع اخوتنا الفلسطينين ونرفع سقف الاحتجاجات والتنديد والشجب والادانه والرفض في كلماتنا وخطبنا المستمره من عقود.
شو بدكم احلى من هيك ,وهاي كمان بهذا المؤتمر نالت فلسطين حصة الاسد من الدعم والاشاده كالعاده في كلماتنا وخطبنا.
معليش العفوا منك يا حضرة الكاتب دخلك لشو هالقمه طالما ان السعودين بدو بشن الغارات والحرب على اليمن وما استشاروا حدا .بدهم شرعيه من شركة المقاولات الجامعه العربيه ولا شو. وبعدين من امتى الثورات تصدر وفكرك كان صعب المساعده في البحث عن حلول سلميه طالما انه عندهم امثله حرقت الاخضر واليابس من التدخلات الاجنبيه وما انحلت مثل سوريا والعراق وليبيا وو.
يا اخوان الحروب وتوليعها عنا احنا العرب هوايه بس عنا مشكله كتير بسيطه كل ما منولعها ما منعرف كيف نطفيها بعدين بالنسبه النا الارواح والاوطان من شجر وحجر وبالاخير البشر ما بتهمنا طالما اننا مع الحق.
العفو منك مره تاني حضرة الكاتب دخلك هاي المؤتمرات للتوليع لان عنا نفط وغاز كتير والا بتناقش قضايا تاني غير الحروب.
اعزائي القراء بصراحه من يوم ما وعيب على مؤتمرات القمه العربيه من50 سنه وجر ما شفت اشي زياده غير الحروب والاعتداءت والشجب واللطم والولولي على مصير القضيه الفلسسطنيه.
الله وكيلكم ولا مره تحدثوا او ذكروا او حتى ابدو اهتمام ولو سطحي بقضايا الفقر والجهل والتخلف او التعليم والزراعه والاقتصاد او البطاله ولا حتى ذكروا التجاره ولا الصناعه من منطلق انهم امه لاتأكل منما تزرع ولا تلبس منما تصنع لكنها امه تجتر وتلهط منما تدفع.
وكل هاي المؤتمرات بتصير والشعوب ولا هي درياني ولا حاسي شو اللي بصير من فوقها او تحتها او جنبها لانهم بيناتنا شعوب مخدره مغيبه ولا عارفه وين الله حاطتها.
وبقولك هاي الحرب رساله لايران.وصرنا بهاي المنطقه رسائلنا بين بعض عباره عن حروب وارهاب وماسي وفظاعات. واذا ايران بدها تبعتلنا رساله بولعوها بلبنان او بزيدو توليعها بسوريا.
اشي بقولك هاي حرب مش كتير مهمه وبس اختلاف وجهات نظر بين الشيعه والسنه.واشي بقولك هاي مصالح وبتصالح.واشي بقولك الملف النووي الايراني وهاي الحروب ردات فعل لهذا الملف واسي بقولك امريكا واسرائيل هم المستفيدين وهيك بدهم واشي واشي واشي.
من الاخر طاسه وضايعه والمال يتكلم والدليل ان السعوديه جرت وراها دول زي التوتو لانها بتدعمهم مثل مصر وغيرها حتى الباكستان بتعتبر ان الاعتداء على السعوديه هو اعتداء عليها.
طب يا حضرة الكاتب سؤال اخير ليش ما بتصرف الاموال على السلم والازدهار والتقدم بدل الحروب.
لانه مصانع الاسلحه الامريكيه والغربيه لمين بدها تبيع الاسلحه اذا صار في سلم عالمي. ولان حكامنا مأمورين ويسيرون حسب اهوائهم واسيادهم.
شو فكرك الحل يا حضرة الكاتب.
الحل عند الله مش عندي اذا بدو يحلها بحلها واذا ما بدو ما بحلها وحلو عني ليش انا قادر احل مشاكلي تأحل هيك مشاكل ما بتنحل.

#جان_نصار (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات