بتحبوا فيها ايه؟

جورج المصري

الحوار المتمدن-العدد: 1311 - 2005 / 9 / 8 - 08:03
المحور: الارهاب, الحرب والسلام
    

سؤال ملهوش جواب ، سئلت الكثير من المصريين داخل وخارج مصر بتحب ايه في مصر؟
سؤال مش المفروض انه يوم يكون سؤال محير او سؤال معقد . ولكن مامن واحد سئلته السؤال ده الا وجاوبني بأجابات لاتمت للسؤال بصله يعني مثلا:
جوها جميل بس ملوث، مياهها عذبه بس ملوثه ، شعبها طيب بس مطحون و، الفاكهه لها طعم بس ملوثه خضروتها لذيذه بس ملوثه اللحمه طعمها يجنن بس غاليه نار وملوثه الفُسح كثيره بس غاليه نار ومش لكل الناس، الشعب متدين بس السرقات و النصب و الاحتيال و جرائم الشرف و الاعتداء علي الاناث في ارتفاع مستمر . و الي هنا اسئل السؤال التالي طب بتحبها بعد كل ده ليه وعلشان ايه؟ و الرد ماهي بلدي ولازم احبها.

والسؤال اللي بعده بيكون سؤال محير وصعب وفي بعض الاحيان سؤال استفزازي حسب الشخص اللي بسئله السؤال.
لما انت بتحب مصر علي الرغم من كل السلبيات السابقه باتري المحبوبه مصر اخذت منك ايه ؟ عملت لها ايه ؟ يقول الواحد منهم اخويا وابويا وأبن عمي استشهدوا في حروب مصر مع اسرائيل عظيم طب ماهم راحوا الحرب غصب عنهم لان التجنيد اجباري وكل واحد يقدر يفلت من التجنيد بواسطه او بعاهه مايصدق ويفلت؟ انت عاوز تقولي ان كل اللي اتجندوا في الجيش دخلوا الجيش علشان يدافعوا عن مصر ؟ طب ياسيدي ماشي وان فرضنا جدلا ان ده حقيقي لخمسين بالمائه من المتجندين طب ال الباقي ياتري بيحب مصر ليه وقدم لها ايه ؟

من فيكم بيروح شغله الصبح وبيقول في نفسه النهارده انا رايح اخدم حبيبتي مصر من قلبي ؟ مين فيكم بيروح المدرسه وبيقول انا بتعلم علشان انفع بلدي مين فيكم بيروح الجامعه وهو بيفكر انه يخدم بلده اذاي ؟
ياتري فيه سواق تاكسي واحد بيطلع من بيتهم وهو بيفكر انه يطلع يخدم اولاد بلده اللي محتاجين توصيله العيان والا اللي رايح شغله ويقول في نفسه انا النهارده حكون بشوش واعامل الزباين معامله طيبه اخفف عليهم وهما يخففوا علي.
ياتري سواق الاتوبيس ولا الدكتور وهو بيشوف الزبائن بيشوفهم علي انهم بلاوي بتتحدف عليه ولازم يوصلهم غصب عن عينه علشان يرجع بالاتوبيس مكسر من طلوعه فوق الارصفه وهو محمل الركاب علشان يتخطي اللي قدامه ياعالم ياتري الدكتور من دول بيشوف المريض علي انه جنيه ولا بيشوفه علي انه انسان محتاج للرعايه الطبيه ؟ ولا دكاتره اليومين دول اما مفلسين علشان ملهمش حظ او من كثر الفلوس بقوا صعرانين.

يتحبوا مصر علشان ايه وقدمتولها ايه كل واحد بيجري بس يلحق قبل اخوه وبعد كده تشتكوا من العالم بقي صعران ؟ هو العالم بالنسبه لك مش هو انت برضه العالم لغيرك . ان كنت شايف الناس بقت صعرانه طب مانت منهم بس مش شايف نفسك.
ياعالم ان حبيت مصر فلازم تحب اخوك في الوطن اخوك في العائله الكبيره واخوك يحبك وتساعدوا بعض تتخطوا الصعاب مش انت اللي تحفر الخنادق و المطبات وترجع تقول الشعب بقي شعب صعران ؟ ارحموا الغير منكم اولا علشان يرحمكم الغير دا المثل بيقول تلف وتدور و اللتي تعمله يرجعلك .
بتحبوا مصر ليه هو الحب كلام كاشعار واغاني كلام في الهوا ملهوش لامعني ولاطعم ولاريحه اه ياليل ياعين وهي دي مصر اللي بتحبوها .

صحيح يامصر خيرك لغيرك وولادك هما اعدائك ولو حبينا نجيب حد يخربك مش حنلاقي حد يخربها احسن من اللي بيقولوا انهم بيحبوكي وبالروح والدم بفدوكي . صحيح يفدوكي بروح حد تاني بس لما تيجي لغايه عندهم ياروح مابعدك روح ويادمي مابعدك دم. ده انا كان من الاساس فيه دم.

#جورج_المصري (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات