ابوذيات في المهجر

وسام الربيعي

الحوار المتمدن-العدد: 4667 - 2014 / 12 / 20 - 11:38
المحور: الادب والفن
    

ابوذيات في المهجر


عزيز العين لا تگطع وصلنا
طشرنا الوكت شيلم وصلنا
جولة ويه الزمن جلنا وصلنا
وما ظل بعد بينه قابلية


عليك انشد شوارع كل مدينة
شوفيلك والك روحي مدينة
على گد الغطا الرجل مدينه
تعال وشوف انا غطايه چفية


اروحن فدوه لطولك ورسمك
اريد گبالي بس تگعد وارسمك
اسامي اهلي تجي كلها ورا اسمك
تظل عالبال والباقي منسية


دلاله ما شفت بعده وقبله
اريده گبالي بس يگعد واقبله
جماله صار الي محراب وقبلة
واطوفن حوله بس يرضى عليه


تعال هنا ولك كافي تردد
قناة الروح وانت الها تردد
ولك العيون ياكلهن تره الدود
دخل تشبع من عندك شويه


على باب الفرح ناطر سرايه
اجتني هموم افواج وسرايا
شسويله الگلب عاشگ سورايا
عشگ خسران ربحه بس اذيه


يا سر العمر مفضوح يا سر
صبر ايوب صبري وآل ياسر
اذا حسنك سلب العگول يأسر
تلوم الروح لو راحت سبية


تعناله الگلب مشتاگ وزاره
لعب حية ودرج وياه وزاره
وزير انت والك گلبي وزارة
تبوگ وتخمط بكل شفافية


بعدني عالعهد باقي بعدني
ولو حتى الزمن عنك بعدني
گلبي مستوي وگلبك بعد ني
ناري مسعرة ونارك هدية


حزن يعقوب ماظن وصل حزني
وانا اسماعيل لو رمشك يحزني
اذا يوسف بس هم بها حزني
سلام الله عليهم مو عليه


گلبي نص الي صاير ونص لك
سيف وتذبح بطرفك ونصلك
وينه مرضعك گلي وين اصلك
اسيرك وانذبح چي مالي دية


مديون العراق الچان بلا دين
بلد واحد وصار اليوم بلادين
يابو الاديان يا ريتك بلا دين
نقرا الدين نسقط بالوطنية



وسام الرُبيعي
مونتريال

#وسام_الربيعي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات