حل القضيه الفلسطينيه على الطريقه السويديه

جان نصار

الحوار المتمدن-العدد: 4620 - 2014 / 10 / 31 - 16:07
المحور: كتابات ساخرة
    

حل القضيه الفلسطينيه على الطريقه السويديه
بصراحه يا جماعه انا مؤمن انو القضيه الفلسطينيه ما في الها حل وهاي حاله ميؤس منها يعني بالمختصر هوبليس كيس.(المزاودين:هذا اسمه تخاذل وانبطاح يا حضرة الكاتب.)(الاسلام السياسي وحماس:سنرفع ريات الخلافه ونحرر فلسطين يا انبطاحي وزئبقي يا كاتب متشائم وعميل .)(فتح وبقية الفصائل الفلسطينيه:يرونها بعيده ولكننا نراها قريبه وسنرفع الاعلام الفلسطينيه على مأذن وكنائس القدس العاصمه يا طبور خامس يا حضرة الكاتب).
اشكر كل المغردين المذكورين والمنسين وخليكو باحلامكم مستغرقين ممكن انو الله يعين لانه عند حل قضية فلسطين اكيد كلنا هذا الجيل راح نكون مودعين يا بالجنه او بجهنم قابعين .

خلي عندك امل وتفائل يا حضرة الكاتب واصبر ان الله مع الصابرين.
اعتذر لانه للصبر حدود والامل مش موجود وارفض الاحلام والوعود هاي البلاد راح تضل نار وبارود طالما في اديان وعهود وما في راحه لا لعرب ولا يهود وانسوني وخلوني اسمع طرب ودق عود واغنية عبدالحليم موعود.

قال بقولك انو احنا الفلسطنين مغنوجين ورافضين دوله مستقله اسمها فلسطين وان الاسرائيلين موافقين بس احنا ناس تعجزيين.
بعض المثقفين ومدعي اللبيراليه ومحبي السلام او المنحازين الى اسرائيل وكارهي الفلسطينين بقولولك انو الحق عليكو ضيعتو كل الفرص واسرائيل جاده بالسلام. وان ببصم بالعشره بس عندي نقطة نظام صغيره وحبة اعتراضات وشوية حقائق لا راح تقدم ولا تأخر .ومع هيك يللا هو الكلام عليه جمرك والكتابي ماهي ببلاش.
راح انسى المصادرات والتهويد والمحاسيم(الحواجز: كلمي عبريه عربناها من كثرة الاستعمال والتعاطي معها).وراح انسى الاستيطان والاحتلال والسجون والمنع وال وال.
يا عمي كيف اسرائيل بدها توافق على دوله فلسطينيه وهي قبل عام قومت الدنيا على غوغل ومسحوا فيهم البلاط على اساس في عالم افتراضي سمى دولة فلسطين وهذا مجرد افتراض.
احتجت اسرائيل على تصويت فستق فاضي يعني عن كذب زي ما بقولوا الاولاد الصغار في البرلمان البريطاني.. وتعالوا وشوفوا المناحه في الصحافي والتلفزيون الاسرائيلي ما تقولوا الا وزلزال بقوة 9 ريختر (يعني محى اسرائيل عن الخريطه).
قبل اسبوعين قال السويدين قرروا يعترفوا بدولة فلسطين والعم افيغدور ليبرمان وزير خارجية اسرائيل نادى السفير السويدي وطسو بهدله من قاع الدست مع تحذير وانذار وتهديد بقطع كل الحبال والاسلاك الدبلوماسيه بين البلدين.
وبالامس القريب اعترفت السويد بدولة فلسطين على اساس ما سيكون مستقبلا وعينكم ما تشوف النور القيامه قامت والعم ليبرمان بقول برساله للسويدين هاي قضية فلسطين ما راح تنحل انسوها وهي مش قطعة اثاث ايكيا ذاتية التركيب هاي مشاكل الشرق الاوسط ابتعدوا عنها.
(ايكيا هي اكبر شركه عالميه سوديه للاثاث سهلة التركيب لا تحتاج الى اخصائي تركيب.)
ردت وزيرة خارجية السويد على وزير خارجية اسرائيل وقلتلو يا ح ح حضرة الوزير الايكيا بدها شريك للتركيب وكتاب معلومات فش اشي اسمه تركيب ذاتي يعني بدو شريك وهيك حل قضية فلسطين( انتوا وهمي).
ممكن بكره يطلعلنا واحد ويقولك حل قضية فلسطين على طريقة العاب الليغو. او 2 و4 و4 او كلمات متقاطعه او املئ الفراغ.
وزير دفاع اسرائيل بقولك ممكن اكثر شئ ينالوه الفلسطينين حكم ذاكي(ذاتي) زعيمة ميرتس واحزاب المعارضه الاسرائيليه بقولوا للاخ نتينياهو اللي بدو سلام ما بصادر وببني مستوطنات.
نتنياهو الجبان على حسب تصريح مسؤول امريكي مجهول الهويه مش معني بالسلام وهاي كيري وزير خارجية امريكا بقول لنتينياهو سوري اسفين على تصريح مسؤولنا الاهوج هاي بس زلة لسان دونت وري بي هابي..
نيتنياهو بأخر تصريح راح نبقى نبنى مستوطنات ومش فارقه معنا وحلم الدوله والسلام طار مع الحمام.
ختاما يا حبيباتي انتوا اللى خارج دائرة الخطر لا تتوهموا بالاعلام الاسرائيلي اللي بوهمكم انو الفلسطينين رافضين السلام لانه لو الله نزل على شي حاجز اسرائيلي بين مدن الضفه وتعرض للاهانه والذل والشتائم والضرب لحمل الحجار(الحجاره)وشعلها انتفاضه رابعه وخامسي.
اللي بوكل العصي مش زي اللي بعدها.

#جان_نصار (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات