نجوى

عماد عبد اللطيف سالم
كاتب وباحث
(Imad A.salim)

الحوار المتمدن-العدد: 4574 - 2014 / 9 / 14 - 09:30
المحور: كتابات ساخرة
    

طبعاً ، ومِثِلْ مَتُعرفون ، آني مقَرِّر لا أحجي بالسياسة ، ولا أسمع سياسة ، ولا اشوف سياسة . ولو تدرون بشنو حالِف على هذا الشي .
المهم .. وآني كَاعِد مستور ، وحبّاب ، ومسترخي ، ودا اتفرّج على فلم يخبُّلْ على الـ MBC2 ، و شلون بخَتْ .. بالغلط دِسِتْ على الريموت كونترول ، وطلعتْ قناة العربية الحدَث .
وإذا بواحد ( عراقي ) مُفَكِّرْ ، ومحلّل سياسي ، وخبير استراتيجي ( تلاثتهِنْ سوة ) ، دتتصِّلْ بي مقدمة البرامج المعروفة " نجوى " ، وتسأله عن رأيه بموقف العراق من التحالف الدولي ضد داعش .
خطيّة نجوى بعد مسألتْ السؤال ، وجان صاحبنا يعيط : شوفي ست " نجوى " .
نجوى كَلتلَه : خليني أكمّل سؤالي أستاز . كّلهه نعم " نجوى " ، بس إسمحيلي وإنطيني مجال أكمّل فِكِرْتي . نجوى استغربتْ وكَالتْ : بس إسمحلي أوضّحْ سؤالي الأوّل أستاز ، لأن عندي دئيئتين بس . الأخ كَالْ : صحيح " نجوى " .. بسْ سؤالج واضح ، وآني أعرفْ شتقصدين " .. المفروض حيدر العبادي يروح للسعودية ، وينسّق ويّه أيران ، ويشارك بمؤتمر باريس ، ويوكُّفْ قصف المدن ، ويكسِبْ " الحاضنة " ، ويشكّلْ حَرس وطني بـ " المحافظاتْ الستْ المُنتفِضة " . والموضوع الأهم والأخطر ، لازم يعيّن وزيرين للدفاع والداخلية .. لأن مَبُقاله بس يومين .. لو ترَهْ مسوّينة شي .. ورجعنا لنفس الطاس ، ونفس الحمّام .
طبعاً نجوى ، وهيّه صافنة على هذا " العتوي " ، وحايره بزمانهه كَالَتْ للأخ : شو يعني طاس وحمّام ؟ هيدي سياسة جديدة للدكتور حيدر العبادي .. ولّهْ شو عم تعني ؟
وبعدهه ممكملة الجملة .. وصاحبنا رِجَعْ عاط : شوفي " نجوى " .. ( تكَول نجوى وحده من كَرايبه ، و دايس وياهه ميانة ، لو عِدْهَه " جمبر " براس الفرع ) ....
بالأخير .. نجوى ضاجتْ ، وكَلتلهه : طيّبْ شكراً ، وصلت الفكرة .. ومعلّش سامحني .. الوئت إنتهى . ( وآني من يمي ، يمكن سمعتْ نجوى كَالتْ : أُفْ ) .
يعني ، وانتو ممحلفيني .. مابُقَهْ واحد بالعالَم ، ماعِرَفْ أسم المذيعة نجوى .. من وره هاي المقابلة الكَشْرة . حتّى أكو فارة صغيرونه صارلهه اسبوع لاعبة بغراض البيت طوبة ، وإحنة محشدّين أفراد العائلة كلهُم حتّى نلزمهه ، ونقنّعهه تعوف البيت بالتي هي أحسن ، لو " تنعلِسْ " .. وماكو فايدة .
هاي الفارة جانتْ هي " الخاسر الأكبر " من هاي المقابلة الستراتيجيّة . و مِنْ كُُثُرْ ما سمعتْ : نجوى ، نجوى .. طِلْعَتْ المسكينة ، وظَلّتْ صافنة كَدام التلفزيون .. كَبُل ميجيهه نعال بضربة جويّة من إبني الصغيّر .. وبدون تدخّل على الأرض .. ويصْمُطهَهْ صَمُط .

#عماد_عبد_اللطيف_سالم (هاشتاغ)       Imad_A.salim#          

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات