مقال اب كوميدي 4 واداعشاه

جان نصار

الحوار المتمدن-العدد: 4507 - 2014 / 7 / 9 - 15:02
المحور: كتابات ساخرة
    

ام فايك (فائق) امرأه فلسطينيه بسيطه غير متعلمه تلفظ حرف القاف بالكاف.
ام فايك تستغيث بخليفة المسلمين البغدادي بتنادي واداعشاه وابغدادي يا واخليفا يا يما ياحبيبي عفوا يا خليفي اغيثونا هذول اليهود عمال يكتلونا(يقتولوننا) ويحركونا ولعنين ابو ابونا وراحت كل فلسطين وانتوا كاعدين تتكاتلوا مع بعض.طيب يا جماعه على اساس انكم اولاد تنظيم القاعده وامكم القاعده الله يوجهلها الخير كامت على اساس الظلم الواكع على الفلسطنين وكال بدكم تحررونا.الله يكتعكم نازلين كتل ببعض على عدد الركعات وطارت البلاد والعباد.
يما يا حبيبي يا خليفتنا البغدادي صار عندك اربع نسوان وكملت دينك ولا لسه لانه اذا ناكسك نسوان منبعتلك من عنا وهدا كله ثواب.
تعال اسبيلك اكم وحدي شكره(شقراء) وهيك بتنوع.وعلى فكره من امتا كان الجهاد انو المسلم يكتول اخوه المسلم في هيك اشي لاني اول مره بسمع بهظا(هذا) الاشي.
يما يا خليفي بعتنالكوا من عنا كطايف(قطايف)بمناسبة شهر رمضان انشالله ما يوكلهن ساعي البريد.
ابني فايك بقول انو كرا(قرأ)خبر نشروا بجريدة الانتي بردت(الانتيبندت)انك كنت لاعب فتبول موهوب واليوم انت لاعب مرعب الكلوب ويمكن من الامريكان مركوب.
ما علينا رفعت راسنا وصار عنادولة الخلافه الله يوفكك ويهديك .

الزعيم الفلسطيني ابو مازن بعدوا مادد ايدوا للسلام وبقول للاسرائلين امسكوها والا راحت عليكم.وهوبعده حامل وردة السلام ونازل فيها قطف وسحب كل ورقه منها ولسان حالو بعده بقول اروح على محكمة الجنايات الدوليه او ما اروح اروح او مااروح اروح او ما اروح والشعب بصرخ وبقولوا يا عمي طلعت الروح مشان الله بس روح هاي مقاومي شرعيه واللعب فيها مسموح ما انت وشعبك مذبوح من شو خايف يا نحنوح.

كل سنه في رمضان تجارنا على نفس العاده بنزلوا سلخ بالاسعار وخصوصا الاكل والشرب.والله ويكلكم احنا في هذا الشهرما منعمل اشي غير الاكل والشرب والنوم.منيح ان النوم ببلاش كان كملت, لكن اللحوم والدجاج والاسماك والخضار والفواكهه وكل شي بيتاكل وبنشرب بتصير اسعارو بالعلالي وهاي السرقه في كل بلادنا العربيه بدل الرأفه والتكافل بتيجي السرقه والتحايل.
مع الاسف احنا تحت الاحتلال الاسرائيلي وكل بضائعنا واستيرادنا من عند الاسرائيلين. ما احنا اسواق استهلاكيه اخت فلاتيه.
اذا قلنا لاخوانا التجار يا عمي ليش الاسعار عند اليهود ارخص شو اللي بمنع للبعض منا الشراء من الاسواق الاسرائيليه على الاقل منوفر شوي مصاري(فلوس)ما احنا الطفر ضارب اطنابه.
هات ساعتها مزودات وشعارات :ايوا انت واحد عميل وخاين وانهزامي وزأبقي ومتخاذل ومش وطني ...يعني يا بنهبوك وبشلحوك اوعيك وبتكون وطني او اذا انت اشتريت مثل ما همي اشتروا من عند اليهود وبتصير خاين.ممكن حد يفسرلي هالمعادلي.
بعترف اني خاين وبعت حصتي من مدينة القدس.كان الي حجر بالاقصى وبلاطه بالقيامه وبعتهم لليهود وساكن في فيلا من غرفتين ومطبخ بالاجار ب900دولار وشهر معي ادفع و3 شهور بتدفع عني دولة قطر الشقيقه.
على فكره الاموال القطريه بتلعب عنا بالسوق لعب بس الله وكيلكم مش عارف اوصلها وما نابني منها ولا طرطوشي.

المونديال قرب يخلص وبصراحه انا دايما من يوم يومي بشجع الفريق الخسران وما في فريق بحياتي شجعته وكسب حتى اني نحس ويمكن اكون انا السبب بخسارته.
اتفلسفت واتفذلكت بالبدايه بمقال عن المونديال وقلت اني بشجع اسبانيا والبرازيل وكتبت اني بكره وما بحب الالمان والهولنديين وبتمنى انهم يخسروا .شوفوا الابداع الالماني واللعب الهولندي .
بالامس لعبة البرازيل والمانيا رفعتلي الضغط وجابتلي ضيقة تنفس وصار عندي اكتئاب فوق اكتئاب الوضع السياسي يغني المنحوس منحوس لو حمل ميت شمعه وفانوس.

اليوم صباحا شاهدت حلقه 11 من مسلسل( ابن حلال) للمصري محمد رمضان في مشاهد بالديسكو.. وكان في يا جماعه اغنيه اسرائيليه يدايم بشمايم يعني ايادي في السماء.
على فكره انا مش ضد الفن والاغاني ومش عنصري.لكني كنت حابب ان صناع المسلسل يعرفوا ان اللغه كانت عبريه مش افريقيه او برازيليه على اساس ان المونديال بالبرازيل.صدقوني مش رح اذاود واقول تطبيع وترقيع وتفقيع وترويع وتصنيع وتشجيع فقط توجيه وتسميع .

ختاما الى حبينا ابو عصام زعيم الحاره دير باللك من ناديا هاي عملي للفرنساوي راح تركبلك قرون.اكيد احنا عارفين انك بالنهايه راح انت وجماعتك تركبوا قرون للفرنساوي بس يا عمي احنا منشجعك ومنشجع ابنك على الزواج من الرابعه طالما ان شيخ الحاره معك احنا المتفرجين كمان معك الله يقويك ويجزيك على عمل الخير.

#جان_نصار (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات