إيرينى سمير حكيم
كاتبة وفنانة ومخرجة
(Ereiny Samir Hakim)
الحوار المتمدن-العدد: 4474 - 2014 / 6 / 6 - 01:09
المحور:
الادب والفن
بيوتكوا من ازاز لكن ما تعرفوش الشفافية
بتزقلوا الناس بالطوب وانتوا متوحلين بالطين
بتنجَّحوا فشلكوا بسخريتكوا من نجاح غيركوا
ماتعرفوش الحق بس تعرفوا تهربوا من الحقيقة
انتوا كائنات عالا على البشرية
ياريتكوا كنتوا شجر يضلل عالحران
واللا خبز يشبَّع جعان
لا سايبين الناس تعيش من غير شركوا
ولا انتوا عايشين أحياء
عايشين ع الحق وبالحق ما بتعيشوش
افكاركو متزوقة وأهدافها مشيطنة
انتوا من الوحل جيتوا وبتدوسوا اللى بيدوسه
ربيتوا قلوب سودا وعيون للارض تبص
تهرب من مواجهتكوا ومالناس ماتختشيش
وانتوا بتهينوا الارض وبتإلموا الناس من البَص
وانا الحل الوحيد عندى
هو انى احللق فوق بشاعتكوا
لان الطيران هو أفضل تحدى
هو بيسكن بين سطور أحاسيسنا
هو فرصة كل واحد غاب عن تفاصيله
هو علامة النصرة على كل ثبات بيوجع
أنا هطير يا زواحف
ما هو يا أرفرف بعيد عن الحيطة يا تدفنونى جنبها
#إيرينى_سمير_حكيم (هاشتاغ)
Ereiny_Samir_Hakim#
كيف تدعم-ين الحوار المتمدن واليسار والعلمانية
على الانترنت؟