زوجك من النوع النكد؟ ليش في انواع تاني

جان نصار

الحوار المتمدن-العدد: 4436 - 2014 / 4 / 27 - 15:23
المحور: كتابات ساخرة
    

زوجك من النوع النكد؟ليش في انواع تاني
امرأه تسأل صديقتها زوجك مثل زوجي من النوع النكد؟فتجيب صديقتها ليش في انواع تاني.
يعني كل الازواج نكدين وغيورين ومعنترين وعصبين ومزاجين ونرجسين بدك بس الله يعين.بفوت الواحد منهم على البيت يتشخطر وبيطلع يتمختر ويا ارض اشتدي ما حدا قدي. كتير منهم ما بسواش بصله واذا جيت تبيعهم بسوق الجمعه ما بيجيبوا راس مالهم ومنيح اللي لاقوا شي مرا(امرأه)اتضبهم وتحواهم وترضى تتجوزهم ومع هيك الواحد منهم شايف حالو وبغني سلطان زماني انا والله سلطان زماني.
ما بعجبهم العجب ولا الصيام برجب ولو ضوت المرا اصابيعها العشره زي الشمع ببقوا على حالهم نكدين ونماريد.
بفيق (يستيقظ)الواحد منهم الصبح راكبو ستين عفريت ,وبمين بدو يتفشش ويتخلق وينكد على عيشتها غير مرتو(زوجته) اللي الله يخدها اليوم بعد ما كانت حبيبة قلبو وحياتو ونور عيونه ايام الخطبه والتعارف وحفيت اقدامه وهو راكض وراها ترضيت تلمو وتوافق تتجوزو .يللا على شو بدها الوحدي تحكي, الشكوى لغير الله مزللي.
النكد بيبدء من الصباح, الفطور جاهز. البيض مش مقلي منيح وليش ما في بيض مسلوق ووين الجبنه والزيتون والعسل والمربي وما في خبز طازه المهم انه يلاقي شي ناقص مشان ينكد. بعدين منجي للملابس ,اذا كان جنابه عنده 40 قميص وكلهم مغسولين ومكويين بأستثناء واحد بعمل نكد ليش الازرق مش مكوي .طب يا عيوني هاي الابيض والاسود والرمادي والبيج والملون وو.. .خلص حبكت كيف بدو يروح على الشغل والقميص الازرق مش مغسول انزعج اخينا وبلش النكد.
مع ان حضرتو في بيت امه كان يلبس القميص اسبوع وكانوا يغسلوه وهو لابسه بس اليوم صار باشا.
طلبات الغذاء والعشاء والعزائم والولائم من الرجل لزوجته هي اصعب الاكلات والتي يستغرق صنعها ما بين 4 الى 6 ساعات ويا ويلها اللي بتقصر. وهات يا انتقادات على الاكل الرز مش مستوي او مخبص واللحمه يابسيه او طريه مهتريه وناقص او زائد ملح و و .وبعدين عند الاكل اخونا سنو طيب يعني سحيب وبوكل الاخضر واليابس ولا شكر ولا حمد.
بالمقابل الزوجه تعمل بالخارج وبالبيت والطبخ والغسيل وتدريس الاولاد واحيانا مرافقتهم للمدارس ومعاش الزوجه اكبر من معاش الزوج ومع هيك الباشا ضرط مش عاجبه وبدو يتجوز عليها من فلوسها ويجيبلها ضره مشان دلالو.
بعض الازواج دلوع ماما وشوخشيختها, بيتعبي وبتشحنو امه على زوجته كيف يربيها ويشكمها ويضربها ويهينها على اعتبار ان امه مرت بكل هاي المراحل من ابوه وبدها تنتقم وتعوض قهرها بكنتها .وهيك ازواج موجودين وجاهزين تحت الطلب ومستعدين للنكد على زوجاتهم.
الزوجه بعد كل ذلك لازم تكون بالليل على سنجة عشره يمكن الاخ بدو يفرغ طاقه ويقوم بالواجب الوطني ويمكن يكون تعبان زي العادي يا سعادي وما بدو غير يتفرج على التلفزيون ويتابع مباره او فيلم اكشن وينام حسب مزاجه اللي دائما معكر وكل شحنات الغضب من شغله او تنبلتو اذا ما كان يشتغل بفرغها بالمدام.
الاحصائيات الاخيره تشير ان اكثر من 20% من رجال الوطن العربي يعانون من الضعف الجنسي, يعني ما وفهمكم كفايه وكثير من هاي الحالات نفسيه ومع هيك النكد موجود وبزيد من العقد النفسيه.
كعادتي اعشق الاحصائيات واخرها تشير بأن اكثر من 25%من العائلات في بريطانيا تعيلها المرأه(الزوجه)اما الازواج فهم سعداء ويقومون بالاعمال المنزليه.بالمقابل يوجد حوالي40% من النساء أي الزوجات يعيلون الاسره في مصر والازواج يرتادون المقاهي والشيشه والحشيشه وعايز المصروف كل صباح من حرمه واخر الليل هات يا نكد وضرب واهانات.
احد اصدقائي مستر نكد وعكنني وتنغيص عاش حياته على هذا المنوال اصيبت زوجته بمرض السكري وعميت ولا زال ليومنا هذا يقارع زوجته اثناء كل خروج من البيت بمساعدة بناته يحاججها على مين كنتي تتطلعي ,والمسكيني عميا وصارت فوق الستين واخونا لو استطاع كان اتجوز عليها.
احلى شئ مجموعة الرجال اللي مابجيبوا اولاد يعني عندهم عقم او اللي عندهم بس بنات ومفكرين ان السبب هو زوجاتهم.وهات فهم اصحاب العقول الخشنه ان سبب ذلك هم انفسهم.الواحد منهم بقولك هاي الحرمي بتجيب بس بنات وبرفض يفهم ان الرجل عنده اكس واي والمرأه بس اكس .وما دخلها بالموضوع وان جنابه المسؤول.
كانت ستي(جدتي) تقول: اللي بزتو الخرى بتجيبو المرى.مع احترمي للقراء.
يا جماعه اتاري نكد الرجال اضعاف مضاعفه عن نكد النسوان واللي ما ذكرناه اكثر بكثير من اللي ذكرنا لكن علي الاعتراف اني اصيبت بالاحباط والتشائم ولهيك بكفي لهون.
ختاما انا بصراحه اتنكدت من مقال نكد الرجال رايح انكد على مرتي وخليها تنكد على الاولاد
مع تحيات نكد منكد منكود نكداوي.

ملاحظة ناقد ادبي:هذا المقال سفيه كتب بلغه سوقيه ولا يرقى للكتابات الساخره .هناك مغالاه وضحالة فكر وسخافه.فهو بعيد عن الواقع كتب بلغه ركيكه وعاميه لا ترقى الى طبقة الانتلجنسيا والمثقفين وهو مقال غير نخبوي يخاطب البسطاء وعامة الشعب من المستحسن عدم قرأته.

تعليق الكاتب:اعتذر من النخبه واعتذر واعترف ان كل ما هب ودب يريد ان يكتب اليوم من امثالي لذا مقالي هذا اذا لم يرقى للمستوى المطلوب فانا اكتبه لمن يقراء واشكر احد قرائي الذي لا اعرفه على اللايك المرافق لمعظم مفالاتي .
كل منا حسب مقدرته واستطاعته

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات