لازم ننتخب .. وعلى عناد الحجي !!

فالح العتابي

الحوار المتمدن-العدد: 4395 - 2014 / 3 / 16 - 19:49
المحور: كتابات ساخرة
    

خلونه نروح للانتخابات , ونخلي كل ذوله الحشرات العفنه , اللي يرشون شعبهم , بالبطانيات والمواد الغذائية الرخيصة , بجيس مال زباله , ونرميهم خلف حدودنه .. لان هاي الجراثيم اللي أجت ويه الاحتلال الامريكي والايراني , أتضح كل همهم , شلون أيقسمون هذا البلد الى أجزاء , ويدوسون على كرامة العراقي , وخلقو الطائفيه اللي رادو بيها ضرب العراقي بالعراقي .. بس الحمد لله , جان العراقي أذكى من تلك العقول المريضه , وكدر يفشل مخططاتهم .. أحنا لازم ناخذ البطاقات الانتخابية , حتى نفوت الفرصة على خونة العراق .. لان أذا ما أخذناها , راح أيحصلون عليها , ويروحون ينتخبون بيها.. لان أكو بالمفوضيه مال الانتخابات , من يساعد هيجي قشامر .. وهنا أكول شي مهم .. مفوضية الانتخابات كلها تتعاون مع دولة القانون , وأني واثق من كلامي , وأكو ناس بيها تخاف من غدر هاي النمونات الفاشله , فتقبل أن تزور , حتى تبقى عايشه ..
اليوم كل الشعب العراقي , عرب وأكراد وتركمان .. مسلمين ومسيحيين واديان وطوائف اللي تشكل كل العراق , عليها واجب واحد , أن تطيح بكل الرؤوس العفنه , اللي تحاول نهب ثرواتنا ومستقبل أجيالنا .. ولا تصدكون حجيهم , وألاعيبهم , ورشواتهم , لان يا عالم , صارلنه عشر سنين , ما شفنه منهم بس الاذيه والبوك , وصار حافيهم ملياردير , والشعب يرجع ليوره ..
والله تعبنه , وملينه من كلشي .. ليش الله غاضب علينا .. أشو نصلي ونقره قرأن , وندعي من رب العالمين أيخلصنا من شر الاشرار وكيد الكائدين .. واحدنا شايل روحه بيده من يطلع بره بيته .. يوميه نفقد كرامتنا ورجولتنه من نوكف بسيطرات طويله عريضه ,أيضحكون بيها على عقولنا , وأحنا مثل بلاع الموس, غصبن على أكبر شارب نبقى ساكتين ومغلسين , والارهاب أيدش ويطلع من بيناتهم , وسط وضع أمني كلش خطير , وبعده قائد عمليات بغداد أيردد نغمة الوضع تحت السيطرة.. أمراض رهيبه بدت تغزو وسط وجنوب العراق , وتعالو شوفو الولادات المشوهه .. عطاله جامعيه وبطاله تنتشر بكل محافظه .. جوع وعوز حقيقي بين جماعات واسعه من العراقيين .. شحجي يا عراقيين .. الموضوع كلش جبير .. ومن أجل هذا , لازم أنروح ناخذ البطاقه الانتخابيه , ونشطب كل هاي الاسماء اللي تريد عودة الدكتاتوريه والعبوديه والتسلط .. وهاي أربع سنوات يا عراقيين وما نريد أنعض أصابعنا ندم .. والله الساتر من الايام الجايه..

#فالح_العتابي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات