آداب زيارة البرلمان بصوت مُلّه صكَبان....

سامر رسن

الحوار المتمدن-العدد: 4393 - 2014 / 3 / 14 - 17:47
المحور: كتابات ساخرة
    

هرعت بصحبة بعض الجيران والنسوة إستجابةً لأتصال هاتفي من حجيه نشميه تُخبرني فيه أن أبنها الوحيد صكَبان أبو الغاز ضارب بعقله فيوز وجامع الناس بالشارع ويخطب بيهم......
*ها صگبان شنهي هاي الوادم الجامعهه من الصباحيات خوماكو شي...
*ماكو شي سويمر،بس البرلمان راح تنتهي دورته التشريعيه وما شفنه منه شي بيه خبزه غير بس قانون منع التدخين بالأماكن ألعامه وحتى ما طبقوه،فأريد أخذ هاي الوادم ونروح نلحك نودع ألأعضاء بطريقتي الخاصة أخاف بعد ما نشوفهم....
*إي عادي إحنه بلد بيه حريات وديمقراطي وأنت شاب ومن حقك،بس تعال فهمني شنو هاي طريقتك الخاصة...
*سويمر حسبالك بس انت لازم ورقه وقلم وتتفلسف براسي،اني هَم سويت مراسيم ومناسك خاصة لأداء زيارة البرلمان،تعال أوكف بصف الوادم راح أصعد على صبة الكونكريت وشوفهم اشلون مندمجين وياي ويكتبون كلامي حتى بعدين مِن نوصل للمنطقة الخضراء يطبقوه بحذافيره.....
"أخواني..أخواتي..أبناء منطقتي العزيزه،بسبب فشل مجلس النواب في تحقيق أبسط احلام وأهداف أبناء الخايبه والمكَاريد فقد رأيت أنا صكَبان أبو الغاز إبن حجي مزيعل "أدام الله ظلي الوارف" بأن المسؤولية الشرعية والوطنية تتطلب مِنّا أداء زيارة لمقر هذا البرلمان لألقاء النظرة الأخيرة عليهم قبل وداعهم غير مأسوفٍ عليهم ولكن وفقَ مراسيم وآداب خاصة لهذه الزيارة.......
فإذا توكلت وأتيت إلى مقر البرلمان أخي الزائر فعليك بالبداية أن تغتسل قبل دخولك إليه مرة ومِن بعد خروجك منه مرة ثانيه،ثُم تستقبل المبنى من الخارج وبيدك العَلم العراقي وتقول:
السلام على من مَر من هنا وخَمَط من هناك،وحُوسم وصَلى ولطَم هنا ورقص وسَكّر وَعَربد هُناك،وأصبح نائباً هنا من بعد ما كان متسول هناك،وصِّوّر نفسه مع الفقراء هنا ومع الصبايا هناك،ولَبِسَ عِمامه هُنا وقميص وبنطرون هناك...
ثم تفتح باب البرلمان وتدخل برجلِك اليمنى وتضع العَلم جانباً وتمسك محفظتك ومستمسكاتك الشخصيه وتضعهما تحت إبطك وتستقبل النواب فتقول:
السلامُ على نواب السرقه والظلاله،السلام على ناكثي العهود وعنوان النذاله،السلام على من ينتقد البعث ليل ونهار وهو أكثر منه سفاله،السلام على نواب الشيطان في أرض الأنبياء والرِساله...
السلام على غلطة العمر،السلام على معنى العهر،السلام على أرذل الخَلق من البشر،السلام على مَنْ نهى عن المعروف وأمر بالمنكر،السلام على المتسترين بالدِين وبخدمة شعائر الحُسين وبالطمغه في الجبين والتختم باليسار واليمين،السلام على من كَرّهَ الناس بالدِين..
ثم ترفع رأسك إلى السماء وتتشاهد وتقول:
اللهم أشهدُ لكَ إنهم سرقوا المال،ويتموا العِيال،وصَرَخَت من فسادِهم الجبال،وحطموا بداخلنا الآمال...وأشهدُ إنهم شمتوا فينا البعثيين،وجعلوا مقالاتنا تنشرها مواقع الإرهابيين"..
*هاي شنو صكَبان أنت تحجي صدك لو تشاقه،يمعود هاي الناس أغلبهه مو تكتب كلامك حتى تنفذه بيوم زيارتك الموعوده وإنما حتى يتسابقون منو اول واحد بيهم يسجل دليل ضدك وياخذه للشرطه ويحصل بيك مكافأة.....
على العموم تروحون وترجعون بالسلامه وزياره مقبوله مقدماً.....ومن ترجع لبيتكم عود خابرني...

#سامر_رسن (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات