بيان انتخابي

نوار رسول

الحوار المتمدن-العدد: 4382 - 2014 / 3 / 3 - 10:33
المحور: كتابات ساخرة
    

الاخبار القادمة من بغداد تشير الى ان البرنامج السياسي للمالكي سيكون مختلفاً هذه المرة وسيتسم بالواقعية بعيدا عن السفسطائية التي بصمت شعارات دولة القانون طيلة الفترة السابقة والتي لم تستطع الخروج منها بسبب تصريحات عرابها الاول الجعفري وطروحاته الفلسفية..وحسب المصدر فان مستشارو المالكي نصحوه بالابتعاد عن الخطاب الرسمي والتكلم باللهجة العراقية الجلفية ليكون اقرب الى قلب الناخب العراقي الذي تعود خلال فترة الثماني سنوات المنصرمة على لغة الشحاطات والقنادر والعبوات واللاصقة واللاطعة والماحقة الساحقة, كما نصحوه بالخروج من المنطقة الخضراء والتوجه الى الصحراء وتفقد احوال مواطنيه وفتح ابواب الكاونترات والمجرات حصرا والابتعاد عن الثلاجة والفريزر كما اعتاد القائد الضرورة فعله من قبله وحتى لا يقع في اشكال عدم وجود الكهرباء وتحول الثلاجة الى كنتور والفريزير الى طاولة للعب الدومنة ومكان لوضع ما توفر من نعمة الله من المشروبات المحللة بفتوى وبغير فتوى. واشار المصدر الى ان البرنامج السياسي سيتطرق الى مفاصل حيوية وحساسة في حياة المواطن العراقي العزيز وبالجلفي وستتضمن وحسب التسريبات ما يلي:

- حبيبي المواطن اذا چنت برشلوني او ريالي فانته الك مطلق الحرية ان تتظاهر 24 ساعة باليوم خدمة للنادي والمذهب وكل على مذهبه الاسباني وما تحتاج الى رخصة للتظاهر روح والهوا بظهرك.

- قانوننا اللي لزگنا باسم المذهب راح تكدر بواسطته عن قريب اتصجم البنت ام التسع سنين وبدل ما توكف براس الفرع بحلة المدارس تنتظر المتوسطة ووراهة الثانوية هسة فتحنالك باب التصجيم للابتدائية وهم روح والهوا بظهرك.

- لا ادوخ نفسك بالشوارع والحفر والمستنقعات فمنا الى نهاية الانتخابات راح كلهة تتساوى وتصير بمستوى واحد صالحة للسير والركض لان عبواتنا الناسفة راح تنزرع بكل مكان ما كانت بيه عبوة حتى نهاية الانتخابات بخير وسلامة علينه وعلى عوائلنا السعيدة.

- الصيف جاي عالابواب ومسلسل مهند نور ما ناوين يسووله جزء عاشر فالافضل تگضون العطلة بتركيا هم تشوفون نور وهم الحلوات يتصورن وية مهند الى ان نفوز بالانتخابات وبكيفكم وراهة الكم مطلق الحرية تريدون ترجعون تريدون تقدمون لجوء بتركيا وماكو غير امريكا تقبلكم ظلت بكيفكم واحنه ديمقراطيين.

- لا تغركم الاخبار ووسائل الاعلام ترة الارهاب ما يخلص لو يجي العزير هية امريكا ليهسة ما لزمت الملا محمد عمر تريدونا نقضي عالارهاب فخاف تسمعون الصحوات قلبت علينه وعلي حاتم صار وزير الدفاع والعلواني صار وزير الداخلية بالحكومة الجديدة فصدگوا لان احنه نعرف مصلحة الشعب والامة احسن منكم ومن اللي خلفكم.

- القضاء لازم ياخذ مجراه واحنه مع القضاء اولا واخيرا بس احنه فايزين فايزين ولكم في اياد علاوي قدوة حسنة, بابا احنه مدعومين من اوبامه فاللي راح يصير ويانه راح يشبع هريسة واللي يوگف ضدنه راح يشبع زناجيل.

- نتابع عن كثب الوضع في الجارة اوكرانية ولو بينه وبينهة دولة بس اتظل جارة والنبي وصه على سابع جار ونراقب الوضع المؤلم والمأساوي للعوائل الاوكرانية الصديقة ولهذا راح نفتح باب اللجوء وبدون فيزا لشعب اوكرانية المحب للسلام والطمأنينة والجمال وقانون الاحوال الشخصية راح يتيحلك عزيزي الرجل تطبيق القانون بحذافيره حتى ان ابو اسراء يفكر في الاسراء من المنطقة الخضراء الى المنطقة الشقراء باسرع وقت لتجربة القانون قبل تطبيقه لدينا والله يكون بعونه.

- احنه نبوگ نسلب نختلس نبقى لازگين بالامام والمرجعية على الاقل شعارنا "لا ولي الا علي ونريد حاكم جعفري" مو مثل الجماعة اللي شعارهم "ماكو ولي الا عمر صدام يا وجه الگمر على اعناد علاوي" ترة ذولة ناس طائفيين بعثيين شموليين بس ماكو مانع ان نتحالف وياهم اذا اقتضت الضرورة وهم نگول ولكم في مشعان قدوة حسنة.

مع اطيب امنياتنا لكم بالزوال والاضمحلال قريبا وسريعا..
اللي يريد بطانية فبالامكان زيارة مراكزنا المنتشرة في عموم المحافظات وكذلك الامر بالنسبة للزيت مع هدية صحن باگلا لكل صوت انتخابي..
تصبحون على الكاع
انتهى...

#نوار_رسول (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات