مقال اب كوميدي 3

جان نصار

الحوار المتمدن-العدد: 4348 - 2014 / 1 / 28 - 12:18
المحور: كتابات ساخرة
    

انا اليوم اصبحت اشعر بتفائل كبير في ما يخص حل القضيه الفلسطنيه لانه وزير خارجية امريكا مصمم على حلها وبقولك انو القضيه راح تنحل, وانا كلام الامريكان عندي زي صك وطوق الامان مش من اليوم من ايام زمان.اينعم في شوية عقبات من هون وهناك واشياء مش محرزي عن يهودية الدوله والقدس واللاجئين والمستوطنات وهسع طلعتلنا شغلة الاغوار بس كلها محلولي انشاءالله. وهاي اخونا الطيراوي الفتحاوي بقولك ما في امل للحل للدوله هالعشرين سنه القادمه وما راح يكون عنا دولي وانا قلت كمان هالحكي زمان بس مع همة الامريكان راح نوصل لبر الامان وكلامهم عندي طابو. راح تقولولي ان اليوم وضع الدول العربيه مقلقز ومخلخل وحالتهم بالويل يا دوب يحلو مشاكلهم وما في ضغط دولي او اجماع او اتفاق على وحدة اخوتنا الفلسطينيه وبين بعضهم بعدها مولعه شو اللي راح يجبر اسرائيل انو تحل وتتخلى عن شعار دوخوني يا لموني والمفاوضات اللي ما الها نهايه. الجواب هو ان الامريكان هم الحل.ثم شوفوا كيف انو وين ما الامريكان بحطو ايدهم في ازدهار وحلول . عندنا اكبر مثال اليوم العراق.
اخونا كيري بطمئن اللي بعدهم عايشين من المسيحين والاقليات في سوريا ان امريكا لن تتخلى عنهم وعندنا مثال كيف انها ما تخلت عن مسيحي العراق هذا اذا بعد في شي اسمه مسيحي العراق.

عشان في انفراج على الساحه الدوليه وبشائر حلول للقضيه الفلسطنيه واستباب الامن في الدول العربيه وشوية خوازيق سعوديه على قطريه خليجيه ارتاحت اعصاب ونفسيات معظم شعوبنا العربيه واكيد انا منهم ما في شي قالقني ومكيف على الاربع وعشرين قراط.
اتجهت للثقافه والابداع والترفيه من فضائيتنا العربيه والاجنبيه على اساس ملئ اوقات فراغي وخصوصا واني يا دوب بعرف اقراء مثلي مثل شي 100 مليون عربي يعني امي.واكيد في كمان شي 200 مليون بعرفوا يقرأوا بس ما بقرأوا والفضائيات والتلفزيون هي المتنفس الوحيد والاهم علشان نتنفس ثقافيا ونهدر شوية هالساعات اللي باقي من عمرنا. .. اهم شئ عندي وغذائي الروحي هي المسلسلات التركيه الله على الرومانسيه.وطبعا الافلام الهنديه لانو صار في عندنا ام .بي.سي.بوليود وهذا غير الامبيسيات من 1 الى 4 على اكشن وماكس وساكس. وعشان دولنا العربيه مشغولي بالصرعات السياسيي والطائفي فما في انتاجات عربيه الا في رمضان صاروا يستوردولنا مسلسلات عالميه
من كل دول العالم اشي صينيه ويابانيه وكوريه ومكسيكيه وبرازليه وايرانيه واخر صرعه باكستانيه.طبعا الناطقه باللغه الانكليزيه والفرنسيه والاسبانيه ما ذكرناهم لانهم تحصيل حاصل موجودين. اهم شئ انو هالمسلسلات مدبلجه بالعربي ورغم ان الاصوات مكرره مع هيك اشي بهبل هبل.تصوروا كيف انو الكوري مستر كيا بتكلم عربي وفصحي كمان .واخونا الياباني امسكوبيجي(على وزن ميتسوبيشي) كمان بتكلم عربي اشي على كيف كيفكم.
برامج الاغاني يا حبيبي لا تنساني, هالايام ما في عرب عايدول ولا ستار اكديمي في برنامج احلى صوت (ذا فويس) النسخه العربيه وزي ما انتو عارفين هذا برنامج عالمي في كثير من الدول. اخوانا العرب اشتروا حق الانتاج باللغه العربيه.المشاركين بالاصوات هاي السنه من معظم الاقطار العربيه بس اخوتنا العراقيه الهم حصة الاسد بعدد المشاركين رغم اوضاعهم المنيله بستين نيله.وبصفتي خبير اصوات حصرت المنافسي بين مصر والعراق والمغرب والباقي مع احترامي الشديد اصوات رائعه لكن هاي توقعاتي.
بصراحه كنت حابب كتير اشترك بهذا البرنامج لسببين اولهم انهم ما بتطلعوا على الشكل والعمر لاني شكلي كتير غلط والسبب الثاني اني راح اطلع صوتي على الاقل دقيقه ونصف بحريه ودون ازعاج ومقاطعه لاني بالبيت وخلال 30 سنه لا اذكر اني تكلمت اكثر من دقيقه ونصف بوجود حرمنا المصون هذا اذا سمحتلي بالحديث.
اتابع كل فويسات العالم يعني قصدي ذا فويس الامريكاني والبريطاني والفرنسي والياباني والصيني والاكوراني حتى الايراني والصومالي والافغاني مع انو الثلاث الاخيره ما عندهم هذا البرنامج ومع هيك بتابعهم.

الوضع بين مستر اوباما ومسزز اوباما كتير بعدو مكهرب خصوصا عندما تناقلت وكالات الانباء العالميه صور اخونا اوباما وهو نازل غزل برئيسة وزراء الدنمارك قبل اسابيع في جنازة الراحل العظيم منديلا.بيناتنا وبصراحه ومن غير زعل الرئيسي حلوي وخرج انو الواحد يتغزل فيها.مش زي ام بوز شبرين الست اوباما.على كل ما علينا الطوشي والمشادي بين اوباما ومرتو تطورت وصار في كلام طالع نازل والست اوباما قلت للرئيس :المأمن بالرجال زي المأمن المي بالغربال.واباما قلها والله لاطلقك بعد ما تخلص فترة رأستي...نتمنى ان الامن والهدوء يعودوا الى البيت الابيض انشاءالله.
في اسرائيل اليمين الاسرائيلي قيامي قيامتو على ابن نتنياهو ال شو حابب وحدي نرويجيه مش يهوديه على اساس انها مش كوشر(حلال). والجماعه ليل مع نهار صرعينا باليهوديه يقوم حضرة ابن نتنياهو يحب نرويجيه كتير هيك تخنها.
المذيع الساخر المصري باسم يوسف بقولك تعاقد مع ام.بي .سي.مصر على تقديم برنامجو البرنامج. وزي ما احنا عارفين انو هاي القناه مملوكي للسعودين يا ترى راح يقدر يسخر من السعودين والقطرين وحتى جماعة اخونا السيسي من المصرين.ادينا قاعدين منتظرين .

#جان_نصار (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات