خطيه طلع الهاشمي برئ !!

مؤيد حميد

الحوار المتمدن-العدد: 4345 - 2014 / 1 / 25 - 01:36
المحور: كتابات ساخرة
    

أحنه شلون شعب وشلون صحفيين خرده.. صدك خرده.. بس زرك طارق الهاشمي من العراق كلنه عليه مجرم وحقير وقاتل ( وأرتمى بأحضان التركيات هنياله ) وهو اللي جان أيفخخ السيارات وحتى حمايته أعترفوا عليه.. وبعدين ها يابه ..طلع أبو زياد كل دخل ما أله .. أثاري سافر الى تركيا لغرض العلاج.. لان جانت هم بواسيره ملتهبه وما يكدر هم يكعد على الكرسي .. وبعدين راح كمل علاجه بقطر لان الدنيا هناك حاره ولازم تيبس بواسيره وهسه صار زين والحمد لله .. أي مو أحسن من ريسنه اللي صارله سنه ما نعرف عليه كلشي.. والمهم راح يرجعنه السيد طارق الهاشمي نائب رئيس جمهوريتنه وهو بصحه زينه..نحمدك ربي ونشكرك على هيجي قسمه.. ولد الجلب أختارولكم شي واحد.. مره أطلعوه عميل ومجرم حرب وتصدرون حكم أعدام عليه.. ومره أدكولون الوضع العراقي بحاجه الى المصالحه ولازم نعفي على كل المجرمين..لا مو بس هيج..وراح يدخل الانتخابات بقائمته.. يابه دالعن أبوكم واللي خلف هيجي بعوره تحكم هيجي بلد طايح حظه..ولكم والله مللتونه ولعبتو نفسنه ألف مره .. ألف دكول مليون مره..
لا مو بس هاي..شوفو شلون قضاء مصخم عدنه..أيريدوها كبار أيطلعوه أبن كحبه.. وأمه وأخته كمشوهم أبيت مال دعاره بزيونه.. وأذا أيريدوها صغار..لا يابه لا.. أثاري هاي لا طلعت أمه ولا أخته ذوله تشابه بالاسماء.. وشفتو شلون سوى مشعان الجبوري هو اللي جاب الكول على السعوديه وأخذنه كاس أسيا تحت سن 22. . ونطاه البراءه والغفران وكله سامحتك سامحتك بئلبي الجبير.. وهاي هم دلاله ونقطه جبيره تسجل على حكومة أبو دشداشه.. بأختصار القضاء كله بيده.. ليش هو بس القضاء خلوني ساكت أحسن ....كلشي أيسوي بس يبقى كاعد على الكرسي.. لك عيني هذا تولع بالمنصب شلون راح أيهدها ما أدري.. منو كال أيهدها والله ينطي تلاثين محافظه وبس الخضراء يبقى بيها أيوافق ..عمي بعد ما ينطيها..وعلى عناد علاوي..
حتى أدكولون شلون يشتغل النجيفي .. عمي ريس برلمان خو مو أبو الركي .. أوباما قره الرسالتين بأمعان .. وقرر وقراره مو كوتره.. أعادة الحقوق للهاشمي وأرجاعه للعراق.. أقرار الحقوق المشروعه والمغتصبه للمحافظات اللي أنتفضت وأطلاق سراح الابرياء من سجون أبو دشداشه.. وشنو بعد .. أنهاء الخلافات مع الاكراد واللي راح أيصوتون على الموازنه وحسب طلبهم.. وراح تشوفون تغييرات مهمه وقوانين مهمه تطلع ..وأنتظرونا لحد يطلع من البيت..

#مؤيد_حميد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات