وأنه لمن دواعش سروري!!

مؤيد حميد

الحوار المتمدن-العدد: 4334 - 2014 / 1 / 14 - 00:13
المحور: كتابات ساخرة
    

وأنه لمن دواعش سروري!!
مؤيد حميد


وهم رجعو وهمه نفسهم ..ولكم صدك جذب ..شنهي تعلمتو علينه ..ما شبعتو ..أي مو كافي حلب وشفط .. كافي عاد تره مصختوها ..أذا لكيتو واحد من هذا الشعب ينتخبكم هاي المره.. كولو هذا عايش مو بالعراق ..ولكم والله جننتونه وما خليتو بينه عقل .. أي طبعا عيني وين يلكون هيجي نظافه ووجاهه.. شفتوهم أول مره شلون جانو ..هذا اللي لابس قميص والياخه مالته كلها وصخ ودكمه وحده حمره وحده بيضه وبالنص زركه..لو هذا اللي كل شعره بأذنه بطول الخاشوكه .. ومجلحين ..ولو هاي اللي عمرها ما شايفه صالون نسائي وهسه شافت .. بوياي وين ننطي وجوهنا .. واحد جان بيه بواسير وميكدر يكعد ..هسه لازك لزكه بالكرسي وما ينطيه لو يجي الخشلوك ..والثاني سنونه طالعه ليكدام وهسه دكول ليلو ومصفط .. قوط وأحذية بماركات عالمية وأربطة حرير أبو أبوهم ما لابس هيجي, وسعر الوحده منها براتب شهر لموظف أبو أبوه ينشعل لمن يوصل نهاية الشهر أيوزعه على المولده وخط ولده وبناته للمدرسه.. سيارات أخر موديل وحمايه ورواتب وأمتيازات وجوازات سفر دبلوماسيه ولد النع... وكاعدين ببيوت مؤثثه أيجاراتها مدفوعه من جيوب ولد الخايبه والى أن تقوم الساعه.. ومكيفين الحواسم قشمرهم أبو سراوي بقطعة أرض المطي ما يكعد بيها..عود بعد عشرين سنه أيصير سعرها بأربعه مليون دينار وأذا حذفو الجماعه الصفاره أحسب شكد تصير..( صخونه) ..كولولي بس شلون راح أيهدوها.. طركاعه وطاحت علينا وعلى بوش وأبوه وكل عشيرته.. وألعن صديم اللي خله هيجي بعوره تجي وتحكم العراق..
والايام الجايه راح نشوف ونتلمس الداعشيين وهمه بيناتنه..وأنه لمن دواعش سروري ..أخبركم يا عراقيين تره هذا المشهد يتكرر كل أربع سنين.. ولازم نسجل كلشي صوت وصوره.. تعابير وجوه..حركة شفايف ..مسك اليدين وهيه تعبر عن فشلهم وتخبطهم في توفير الحد الادنى من الخدمات..وراح نسمع وعود جديده .. سوف نبني وسوف نعمل وسوف نمنح والى أخر سوف.. وهم لازم نسجل كل فيكه وكل جذبه لان ذوله أساتذه في فن الخداع والتضليل.. وهسه أيروحون على الناس البسيطه والطيبه من أهلنا, ويخدعوهم بأساليب وفهلوات أدربو عليها وشلون ينتزعون صوت العراقي بالكوه.. ديروبالكم يا عراقيين .. أحذروهم وقفوهم أنهم مسؤولون..والدهر يومان.. همه لعبو بينه ثمن سنوات وشوفونا نجوم الظهر..بس أحنه راح نسقطهم بيوم واحد..وهذا اليوم أجنه أنريده.. يوم بيه تسود وجوههم المتملقه ويوم تبيض بيه وجوهنا وسنفوز ورب الكعبه..
شلون نرد على هيجي هجمه شرسه من ذوله المنتفعين ..لازم كل العراقيين تروح للانتخابات..وبأصابع أيدها العشره تسقط كل ذوله اللي باعو العراق وباعونا..لان همه يعتقدون أحنه ما راح نروح للانتخابات..فراح نفسهم أيفوزون وحتى كتبو قانون الانتخابات حسب مقاساتهم .. فلازم نفشل حساباتهم ونبطل مؤامراتهم ..وحتى نكول للعالم أجمع أحنه شعب حي وبيدنا مفتاح التغيير..وعلينا أستبدال هاي الوجوه النتنه اللي لعبت بينا طوال عشر سنين وحرمتنا من الحاضر وتريد تحرم أطفالنا من المستقبل..وما خفي كان أعظم

#مؤيد_حميد (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات