شقيت غربتى بكفوفى

عبدالله صقر

الحوار المتمدن-العدد: 4271 - 2013 / 11 / 10 - 23:04
المحور: الادب والفن
    

رميت همومى من على أكتافى
وخلصت من خوفى
وشقيت غربتى بكفوفى
الظلمة بتدارى الوجوه
والضى طالع له نور على الحيطان
وساعة الغروب أنا طالع
أدور على أمل وأنا حيران
يصادفنى عتمة تحاول تبعدنى عن الخلان
يقابلنى أرهابى ويخبط على بابى
يهددنى بسلاحه فى كل أوان
وطنى بيحاول يسرقه منا شوية أرهابيين عميان
أدور على وطنى وخايف عليه من زمان
علشان يحمينا من شوية مخربين شكلهم شكل الغربان
...................................................

أنا الفكرة
أنا الفكرة طالع من طلاسم المجهول
يقابلنى فى الظلمة كام مخرب عامل زى الغول
يحاول يضيع منى الفكرة و لكنى مخبيها بين ضلوعى
ومستعد معاها أموت مقتول
بس يتحقق الآمل ويرجع وطنى أمن من تانى
ومستعد أقتل أى غول
يحاول يضيع وطنى منى
بس ألاقيك يا وطن أمن وفرحان
.................................................

عمرى أتبدر على الطرقات
كل الآمانى
فى الليالى
بتكون سودة
سطلع عليها
النهار تصبح بيضاء
إلا أمانى أنا كلها ضايعة أو مسدودة
أخبى أمالى فى جفونى
وأقول يا وطن سامحنى
على إل بيعملوه فيك شوية الغربان
سامحنى يا وطن وأنا سايح على وجهى سرحان
بدور عليك يا وطن بين الآوطان
لدرجة أن عمرى أتبدر على الطرقات
..............................................

غربتى دايما بتنادينى
أه ........ طالعة بطعم المرار
علشان غربتى دايما بتنادينى
وأنت يا وطن حاطك فى نور عينى
ساكن جوة قلبى وأسمك مرسوم على جبينى
ودايما فى قلبى ساكن بتحاكينى
موش عارف ليه مشدود ليك ياوطن
وكأنك عاملى سحر بيغوينى
نفسى بقى يا غربتى تتركينى
أو إنك تنسينى
دا أنت عاملة وى عدوتى
نفسى إنك تلفظينى
علشان ألاقى وطنى مستنينى
وياخذنى فى حضنه ويراضيتى
أصل الغربة بتزود الآشواق
والكلام عن الغربة ما يعرفهوش غير العشاق
لآن بينى وبين وطنى حنين وأشواق
والقلب عشمان فى الوصال يا وطن ومل من الفراق
.................................................

شمس غربتى
ماشى فى شمس غربتى
وشمسهاحامية وبتحرقنى
ولكن شمسك يا وطن أحن
على وبتحمينى
وهواك كمان بيشفينى
ياما كنت بمنى نفسى
وأخيب كل الظنون
بأنك هاترجع لى يا وطن وبكرة إل
ركبوا علي أنفاسك ها يرحلوا
ويرحل كل إل كان بيخون
علشان نور النهار جاى من تانى
وغربتىها تبقى ذكرى
صدقنى يا وطن الغربة حراقة
وبالذات غربة الآوطان
علشان القرش لما يقصر فى إيدى
تبقى رقبتى قصرت مع إيدى
ما ترجع يا وطن وبلاش منها نهانة
لحسن نفوسنا تعبت علشان نحس بأننا عايشين
تحت جناحك من تانى
ولا حد يهددنا بسلاح ولا كانى ولا مانى
ماهو سلاحك أقوى من أى أرهابى جانى
تقدر عليه وتصطاده فى ثوانى
علشان الناس تعيش فى أطمئنان من تانى
أرجع يا وطن وبلاش منها مهانة
علشان نحس بحنانك ونعيش من تانى

#عبدالله_صقر (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين	حوار مع الكاتبة السودانية شادية عبد المنعم حول الصراع المسلح في السودان وتاثيراته على حياة الجماهير، اجرت الحوار: بيان بدل

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات