يالفرحتنا الما تمت

نوري جاسم المياحي

الحوار المتمدن-العدد: 4270 - 2013 / 11 / 9 - 17:51
المحور: كتابات ساخرة
    

مثل ماتدرون المواطن العراقي مظلوم ومكرود ومنين ما يلتفت تجيه الكفخات ... ومن يساله الواحد يكوله شلونك ؟؟؟ يجاوبك بكل بساطة وطيبة قلب ...شلوني .. ياويلي تعلم على الصكعات كلبي..
هاي الوضعية والحالة من جانت الدنيا ايام خير ( ايام الملوكية مو ايام المرحوم وانتو بكيفكم خلو اسم المرحوم لان هم هواية وكلهم مرحومين واكيد راح يلحكهم مرحومين جدد ولسه هم احياء كما يكلي عقلي) ... اما الوضع بهذه الايام ..الطايح حظه من كل كتر وزاوية ... تشوف العراقي ينتظر فرج الله وعطف المسؤولين الكرام ..
والله مسكين العراقي ...مثل الغركان صاير يجلب بكشاية ( والما يعرف الكشاية هي العودة الصغيرة او التبن اليابس اللي يطوف على المي ) ..
انتم تذكرون شلون فرح الشعب من كالو ... ان مجلس النواب صوت ضد تمديد الرئاسة الثالثة لرئيس الوزراء ...فجأة وجرب طلعت المحكمة الاتحادية برئاسة الخير القاضي مدحت المحمود والغى القرار..
تذكرون من فرح الشعب من كالو ان مجلس النواب خفض رواتب الرئاسات الثلاث 10%...وفجأة وجرب جت المحكمة الاتحادية والغت القرار وصرفوا الهم كل ما استقطعوه مرة واحد ...وتبين الشغلة انكلبت توفير الهم ....
ومن هاي الشغلات والبلتيقات يومية نسمع جديد الى درجة الملل وبالعربي الفصيح القرف ولعبان النفس ...
كلكم سمعتوا بقرار المحكمة الاتحادية عندما الغت رواتب تقاعد النواب وما صاحبها من ضجة اعلامية ...وخرجوا الشباب فرحانين مظاهرات تاييد لقرار المحكمة ... وسووا زيطة وزنبليطة وتوقف الشحماني والذبحاوي واصحابهم ...لانهم معربين عن تاييدهم ( للقرار الحكومي) ومع هذا اعتقلوا واطلق سراحهم بعد ان نعنعت ظلوعهم ...ونقل الذبحاوي من النجف الى جزر الواق واق في السماوة ...الم اقل لكم ... ديمقراطيتنا وحيدة فريدة و لامثيل لها في العالم وحتى في امريكا ...
المهم نرجع لسالفتنا ورباط الحجي ... العراقي المسكين ... يومية يسمع خبر مفرح ويسر الخاطر وبعد يومين تتبخر الفرحة وتنقلب هم وحزن وكليب مجروح ...ويتم يردد وي نفسه ويغني مقهورا ومحزونا ومالوما ( يا لفرحتنا اللي مادامت ) ...
ومن الاخبار المفرحة التي سمعتوها ( قبل مزاد الانتخابات الحالي ) خبر تنزيل اجور الانترنت .... وفرحت الناس ...والما مشترك راح اشترك ...وفجأة وجرب اتحولت خدمة الانترنت الى زبالة ... وانقلبت فرحة المشتركين الى نقمة ولعنة وسب لكل من كان السبب في التنزيل ...وبدلا من ان تحسن الحكومة سمعتها ...انكلبت الاية واشتغلت المسبة على الحكومة ومستشاري المالكي ...وعلى اساس ان الحكومة متعمدة لتكميم الافواه ومنع التواصل الاجتماعي بيم المواطنين ...
واني كمواطن مسكين اسأل المالكي زما عندي شغلة بالسياسة ...يا استاذنا شلك بهل اللعبات اللي تضرك وتضرنا ...يومية طالع النا بشغلة ومكلوبة عليك وعلينا ...نوبة تعرف ان طارق الهاشمي ارهابي ثلاث سنوات وانت مدغلص عليه ...,نوبة عندك ملفات فساد ونوبة لو اروح لمجلس النواب وتصير بوكسات وتفشل العملية السياسية ( يا اخي ما عساها ما تفشل و تخلصنا ؟؟؟ وليش هي هسه ناجحة ؟؟؟؟)
ونوبة تكله للمذيع يفوتك ولو تدري شمسوي حمودي ( وخليت ابنك بحلك الناس ماشة ) ..وخليت حتى قادة الاجهزة الامنية مثل الواحد ...............وما اكدر اكمل ...اني ما شايف واحد سياسي يجفص هيجي جفصات مع كل الاحترام لك يا دولة الرئيس ؟؟
يادولة الرئيس نصيحتي الك اركض ورة اللي يبجيك ولا تركض ورة اللي يضحكك ...اكيد سامع هاي النصيحة من الاكبر منك ...
نرجع لسالفتنا ...طلعت الحكومة كلها وكلايلها ..تكول ان الكهرباء راح ماتنقطع بعد والناس فرحت واستبشرنا خيرا ..وما صدكنا اننا خلصنا من ابتزاز وحقارة اصحاب المولدات الاهلية ...فركضنا لسحب الوايرات وفي عبنا ضحكة مكتومة على صاحب المولدة ( ونكوله بكلبنا ما استحمدت ربك على رزقك بالملايين وما تعبان بيه)...
فجاة وجرب مطرت الدنيا وفرحنا بالمطر على اساس هو بشارة خير مثل ما يكول اهلنا ...
والله خطية العراقي والعراقية ...فرحة المطر طيرت فرحة الكهرباء ..وصدك جذب الكهرباء رجعت تنكطع وعادت حليمة لعادتها القديمة ..ويا دار ويا عين ماشفتي الكهرباء ...ورجعنا نغني اغنية ( يالفرحتنا اللي مادامت ) ..
راح تبقى حسرة بكلبي ...فد يوم تصدك الحكومة بحجيها وبوعودها ويانا نحن فقراء هذا الشعب ..
واخر قولي لكم يا سادة يا كرام ...ترة اني ما جا احجي بالسياسة وانما احجي على الخدمات ..واني ترة مو سياسي ..
اني عراقي وبس الله وكيلكم.. والعباس كفيلكم ... ومالي علاقة لي بالانتخابات لانني اصلا ما اعترف بكلهم ولا راح انتخب حتى لو اعطوني زولية كاشان او همايون عثماني .. لان السياسة في العراق عهر وفسوق ...وكذب وتجارة ..وكفر وفجور ...
اللهم احفظ العراق واهله اينما حلوا او ارتحلوا ...

#نوري_جاسم_المياحي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات