قنزه ونزه لو غيرها !

يحيى الحميداوي

الحوار المتمدن-العدد: 4235 - 2013 / 10 / 4 - 21:28
المحور: كتابات ساخرة
    

روحي مفرفحه ,صار يومين الحجي أبو محمد ماشايفه ,لابالشارع ولا بمقهى مطر المتهالك ,كلما أفكر آسير عليه للبيت تطلع شغله عارضه تمنعني من الذهاب ,اليوم قررت أن أزوره بالرغم من مشاغلي الكثيرة واهمها المدرسة ودوخة الطلاب ,وبعد عمك بعد خالك رهمها وبلكي ينجح ,هي درجتين يابويه والحكومة الله يستر عليها أتريد اتنجح الطلاب سويها لله ! لاتصير جحف وراسك يابس وتبيع وطنية ترى أحنا مواطنين مثلك ونعرف بالوضع .
دخلت إلى ديوانية بيت الحجي ,أبومحمد أمدد على الفراش طايح بالقاضيه ,لاف اليشماغ على راسه ومبين جحوظ عينيه واشفافه يابسه وجالس محنيا جسده العلوي للأمام ماسكا بطنه بيده متأوها ,يسعل بصورة متقطعه ,أخرب بيتي يهدم الحيل .
-حجي سلامتك ,المرض بعدوينك أنهدم حيلي كلّه وداعتك
-تسلم يبويه الله يبارك بيك ,بويه هاي (قنزه ونزه) ذبتني كلش طريح الفراش ,أثناء حديث الحجي كان نظري مشدود لحركات (دوحي ,أبن أبن الحجي ) مبتسما ويغمز بعينه كأنه يريد قول شيء لكن خوفه يمنعه .
-وداعتك حجي يوميه أريد أجيك وأهم روحي بس تطلعلي شغله صفح
-معذور أنت خوش ولد ماتقصر ,سولفلي شنو الأخبار !
- حجي الوضع موزين كلش كلش !
- بويه الموت حق علينه ,بس لايزعلون مني ,أحنه شعب مسنح ! وأنركبنه من العلبه وما راح اتفض وي هاي الشرذمه وخلي ابالك هاي الهوسه ماتنتهي ألا بعد الأنتخابات راح يحيلون زيد على عبيد وناس تكصب ناس .
-حجي تعبنه واحدنه يمشي ويسوهي علاكته بيده لويوصل للبيت لو يعبونه بالعلاكه
-اسمعني صرنه مثل (كصبة الدحدوح ناس أدك وناس أتنوح) عمي ناس تركص بجفيه للجاي ايصير هاي تجارة مغمسة بالدم وذوله مصاصي دماء شبعانين ضحك على المساكين والابرياء الجاي تموت بالجمله ,احنه منعول شيب ابو الخلفونه وطالعلي ابو الشفافيه يسولف على المعجون لو هذا الآخر ابو سنون يهدد ويعربد , عمي ذوله ماتصير الهم جاره إلا الشعب يوعى أشويه ويبدأ بالتغير ونخلص
-حجي بروح أهلك هم يتراوالك راح يتغيرون !
-ابد وداعتك فردنوب هاي كطنه واشلعها من اذنك ,هاي الوجوه نفسها نفسها ,الجذاب والدوني والمايخاف الله(وشكل لمي من أروح أنكسرت الشيشه) ما مش تغير وجيب ليل واخذ عتابه ,خايب تعبت ,ولك أمك أشلونها (حجية رجوه)
-حجي زينه تسلم عليك بديت تصحى يحجي كمت تنشد
- فوت تفر ,كوم من يمي روح لبيتك خلي أرتاح ترى تعبت كلش .
من طلعت أفتهمت ضحكة دوحي وغمزاته على جده أبو محمد على الجايات أذا بقينه وما لكفتنه مفخخه أسولفلكم عليها ,, ظلت يمكم العافية

#يحيى_الحميداوي (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات