بالعامية الفصحى ..إعلام المُحن الميرى والشعبى

محمد منير

الحوار المتمدن-العدد: 4227 - 2013 / 9 / 26 - 20:13
المحور: اليسار , الديمقراطية والعلمانية في مصر والسودان
    

تسود حالة محُن ميرى وشعبى فى المجتمع المصرى ..فتجد مثلاً محافظ الجيزة ووزير التربية والتعليم مصحيين الصحفيين ومصورى الجرائد الصبح ومتصورين فى كل الصحف وهما ماسكين ايد ولاد الشهيد نبيل فراج وداخلين المدرسة ! ..
تلاقى واحد خارج من شارعهم الطفحان مجارى وطالع ميتين امه فى طابور العيش ومتقلب من سواقين التكاتك ، ومتصور وهو مبتسم من الغيظ وبيدى وردة لظابط جيش تعبيراً عن امتنانه بالأمن والآمان!! ..
تلاقى صورة قسيس معبط فى شيخ والشيخ نازل فيه بوس تعبيراً عن الوحدة الوطنية !! ..
صور ممحونة كتيرة جداً تمتلئ بها الصحف .. ، والمحن بالعامية المصرية يا سادة هو نوع من الاستهبال العاطفى
الشهيد نبيل ضحى بحياته عشان مصر تنضف والاجيال الصاعدة تتعلم كويس مش عشان المحافظ يسيب المحافظة قذرة والوزير يسيب المدارس والتعليم متبهدل ويتصوروا مع ابنه وهو رايح المدرسة مش سوفنير الحكاية..
ولا الشعب بيحب الجيش والحكومة والشرطة عشان زاحوا الإخوان برخامتهم ، لكن ممكن يعشقهم لو الشوارع نضفت والأمن رجع بجد وحصلت عدالة فى التوزيع ولقى لقمة وهدمة وهوا نضيف ..
ولا الوحدة الوطنية حترجع لما الشيخ والقسيس يعبطوا فى بعض ويقضوها بوس .. الوحدة الوطنية هى الوعى والعلم والثقافة ومستوى المعيشة والعدالة الإجتماعية
مسمعناش من 2011 عن خطة لفتح مصنع ، كله بالصلاة على النبى بوس واحضان وأغانى

**** مشاهد **** :
& امبارح طفل اندفن تحت انقاض مخزن بوتجاز انهار فى وسط البلد !
& بنتى راجعة من المدرسة الثانوى بتبوس ايدها وش وضهر لأنها دخلت فصل مش زحمة 85 تلميذه بس ، وقضت اليوم واقفة ، ولما قالت للمعلمة انه مافيش مكان تقعد فيه ردت عليها " اقعدى يابيضا " .. ونص التلامذة يستلموا الكتب والباقى يتصرف لأن الكتب ناقصة .. والوزير كان مشغول بالتصوير جنب ابن الشهيد ؟!.
& محافظة الجيزة غرقانة فى المجارى ، ومخالفات المبانى ومهندسى الأحياء والموظفين يعيشون أوج لحظات السبوبة والفساد .
& قسيس فى المترو قاعد وجنبه مكان فاضى ، دخل واحد ملتحى ومعاه ابنه شاب ، وجلس الملتحى جنب القسيس وهو يزغر له .. قام القسيس العرقان عشان يقعد الشاب مكانه ، وهم الشاب بالجلوس ، لولا تدخلى وقلت له " عيب ياسيدنا ، ده هو اللى يقوم ويقعدك مكانه انت زى والدة " .. وقضينا اربع محطات فى صمت متوتر حتى نزل الشيخ وابنه الشاب !
المحتوى لا الشكل .. ياناس .

#محمد_منير (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات