أبو قاسم ينال عضوية منظمة لوكَية بلا حدود

فرات المحسن

الحوار المتمدن-العدد: 4170 - 2013 / 7 / 31 - 14:23
المحور: كتابات ساخرة
    

للمرة الأولى أختلف مع صاحبي الحاج أبو نجية بمثل تلك الحدة التي وصلت حد الصراخ والتهديد بالمقاطعة. سبب الخلاف هو اللعين التعيس أبو قاسم الجايجي في مقهى الشط الذي أقترب منا اليوم وهمس جملته التي استفزت الحاج أبو نجية وجعلته يسحب أنفاس سيجارته بشكل متوال وسريع مع حسرات وزفرات كان معها دخان السيجارة لا يجد له مخرجا وكأنه يخفي نفسه خوفا من عصبية الحاج أبو نجية. الجايجي أبو قاسم رمى جملته مثل جمرة نار ووضع كؤوس الشاي وذهب وابتسامة صفراء منافقة عالقة على شفتيه. هل كان شامتا أم متحديا أم أراد إثارة الخصومة بيني وصاحبي الحاج، ربما هذه أو تلك أو غيرها ولكنه هيج قلب الحاج أبو نجية الثملي وطير جريشه.
الجايجي أبو قاسم قال مزهوا بأنه حصل على بطاقة هوية لأحدى المنظمات العراقية ووضع أسمه في قوائم من سيمنحون قطعة أرض وراتب شهري والأدهى من ذلك قال بهمس وهو يقرب فمه بين رأسينا، البارحة وهبت تلفون آي فون بعد أن اشتركت في الوليمة وكنت أحد القائمين على رصف الصحون فوق الموائد ومراعاة طلبات الضيوف من الذين تحلقوا حولها لضرب الثريد ، ولمثابرتي وشطارتي وجديتي وسرعتي في العمل حصلت على الهوية والوعد والآي فون.
تلك الجمل السريعة الهامسة المصحوبة بابتسامة صفراء شامته أثارة حفيظة الحاج أبو نجية وجعلت الشرر يتطاير من عينيه الكليلتين أصلا. بادرت للتهدئة وأنا أدرك ما تضمره روح هذا الرجل فقلت لصاحبي أبو نجية لا عليك، لا تهتم ، فتلك مسألة واردة جدا وعمل طبيعي للجايجي أبو قاسم فهو واحد من منظمة مجتمع مدني كبيرة وواسعة تضم بين ظهرانيها الآلاف لا بل الملايين من البشر ولا يقتصر وجودها على أرض العراق. عند جملتي هذه ثارت ثائرة أبو نجية وأزبد وأرعد وراح يدردم بكلمات منفلته تنطلق مثل صلية بندقية رشاش ووجدت وكأن الشرر بدا يتطاير من عينيه ليحرق وجهي واتهمني بالتسويف والتبرير والمخاتلة وللمرة الأولى بعد عشرة عمر طويلة فاجأني بكلمات جافية قاسية.
ـ ولك مو عيب عليك، متستحي ، يا منظمة مجتمع مدني يا بطيخ هذا صخام وجه، أنته عاقل مخبل ،، شنو بالله عليك يكول منظمة مجتمع مدني،، هاي هيه بس تكدر تتعيقل وتتفلسف، أبو قاسم الجايجي عضو منظمة مجتمع مدني، خبال والله خبال.
ـ يابه وداعتك حجي وداعت العشرة والزاد والملح،، كون على ثقة الجايجي أبو قاسم واحد من هاي المنظمة وإذا ما ترضه أسم المنظمة معروف بكل العالم ،، سموهه منظمة لوكيه بلا حدود،، ليش أنته ليهسه متعرفهم،، نشيدهم الدائم أبو زركه طلع من بين البيوت.

ـ أدري كلش زين أبو زركه ثاولهم. هاي هم وحده من الأغاني الفاينه مالتهم ،، أعرفهم ،، أعرف اللوكية كلش زين.. ليش مو كليوم نقرالهم بالصحف والمواقع..ليش منو يسمي الصخل حجي صخيل والجلب حجي جليب ليش مو العكل جانت تردس ردس كدام صدام وقبله والقبل قبله.
ـ لعد ليش مستغرب من شغلة أبو قاسم الجايجي ؟؟.. هم خطية يريد يترزق..
ـ أي من عابت هيج اترزق يجي باللوك لوغية وصخام الوجه..
ـ عمي دعوف الناس هسه بقت على هذا المخربط أبو قاسم.لحكته جيف فقير... أي مو الله يجّرم هناك دكاتره وباحثين وشعراء وصحفيين ديشتغلون هاي الشغلة ومتونسين بيه..وديدنهم من عصر نبي نبشتم ونبوخذ نصر وسرجون ابن سنحاريب الأكدي ومعاوية أبن هند وهارون لحد زمن القائد الضرورته صدام وهسه حبر الامة وقائد الجمع الأمين الزعيم أبو أسراء مراد علم دار العراق.. شغلتهم مو بس لوك لوغية.. شغلتهم يخبلون المسؤولين جبيرهم وصغيرهم ويخلون الناس ترجف حتى من الشرطي.
ـ أدري، وهذوله بكل وكت نلكاهم .. من جان صدام ركصوله مثل ما ركصو للبكر وقبله العبد السلام وقبل قبله نتذكر عبد الكريم كل القلوب تهواك .. عبد الكريم رب العباد يرعاك..
ـ أي لعد أذا كل هذا تعرفه شبيه روحك محموسه وطفرت من يم أبو قاسم الجايجي وصارت الدنيه ظلمه بعينك،،مثل ميكول المثل من يم أبن عمه وعكدت !!!!... سمي بسم الرحمن وعوفه لهذا الرجال الفقير،، موهناك عندك زلم خشنه !! راح يسون أبو أسراء المالكي أمام المتقين وحجة الإسلام والمسلمين ورسول رب العالمين وناصر الدين وهمين بعد راح يجي يوم يكولون المالكي علم العراقيين الحفاي شلون يلبسون قنادر.. مو فد واحد كام يشتغل يطيير فياله ويضرب صبغ بنتلايت ويكبر بروس حتى ربع المالكي.. وكلمن عنده خرده لو جاه عند مسؤول صار عنده أتباع وصارت منظمة لوكية بلا حدود أدافع عنه،لأن هو جان مناضل وأستشهد لعدة مرات ؟؟!! هو والعديد من عائلته وقت المقبور له صدام حسين. وليش همه اللوكية شغلتهم بس على أبو أسراء وربعه روح أفتر العراق من زاخو الحد أم قصر وشوف الصور والشعارات والقصايد والرقص والغناء والتكبير والتمجيد وأسمع الأخبار وأتمعن باللواكه وطيحان الحظ ألي متونسين عليها زعماء ورؤساء ووزراء وأتباعهم وحتى فراش المدير، ويدفعون عليها فلوس. والناس يوميه سايل دمه بالشوارع ومحد يفتح حلكه.. و أبو أسراء والنجيفي بالحكم مطلب عظيمي.
ـ أعرف وداعتك أعرف... تره الفلوس تعمه العيون مو بس أجيب العروس .. والطبع ألي بالبدن ما يغيره غير الجفن.. بس هذوله حتى بدون فلوس يشتغلون لوكيه ...طبع بالجينات.
ـ ها حجي أبو نجية أشو وصلت للجينات، لهنا والحساب تغيير .. شنو فاحصهم لو امبحوشهم.. هنا راح نختلف .. تره اللوك لوغية ما تجي بالجينات هذي تربية بيتيه لو نقص بالنفس وشعور بالدونية ويمكن ترحيلها إلى طبع الأهل وخوفك من تصير بالمجتمع فكر جمعي.
ـ ها أشتغلت رحمة الله وكمت تتفلسف تربيه بيتيه وفكر جمعي .. دروح بابا روح ...يابه وروحه العفلق ألي ما ينحلف بيه بس من تنذكر الزمايل.. الشغله بالجينات .. ولوما بالجينات جان ما صاروا هذوله حنقبازيه ما ألهم مستقر..يوميه كَالبين عكرف لوي .. قبل ميضوكَون اللكَمة يهزون الذيل.. بالرغم من كونهم أباتر وهي جمع كلمة أبتر وأنت تعرف معنى شانئك الأبتر والعياذ بالله.هسه لو ينجبون مو أحسن وأشرف.
ـ هم يمكن وياك الحق... بس مال ينجبون هاي صعبه .. لأن الدوده حركتها قويه ورشيقه وتفتر مثل البروانه .. والبي ميخلي
ـ هسه مو انته همين تكول أني شاعر وطلعتلك تلث دواوين والصحف تنشر لك يوميه قصايد.. أشو ما سمعت منك قصيده لو مقال يمدح زيد لو عمر من المسؤولين.
ـ أفه عليك حجي بعد كل هل عشره والقرابه وحايط على حايط بعدك معرفتني.. ليش أني لوكي لو شايفني أمفلس لو جيناتي خربانه..
ـ حاشاك حبيبي حاشاك..
ـ هسه ما علينه.. تره شغلة أبو قاسم الجايجي متوكل خبز.. أذا انته متابع مسيرتي الشعرية وقاري قصايدي.. لعد دزلي نفر كباب وأني راح أحشر أسمك بالقصيدة ألي كتبته أمس وإذا دفعت الجايات راح أزودلك عجز بعد الشطر .

ـ ليش مو كتلك أني ... اللوك لوغية متأصلة بالجينات..

#فرات_المحسن (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات