قال الإرهابيين .. ليه زعلانين يا إخوان ؟

محمد مجدي

الحوار المتمدن-العدد: 4163 - 2013 / 7 / 24 - 23:56
المحور: الثورات والانتفاضات الجماهيرية
    

السيسي قال، في حفل تخريج دفعة جديدة من ضباط الكلية الحربية: يا شعب إنزل الجمعة الجاية إديني تفويض في التصدي للإرهاب ( المُحتَمَل)..

فيطلع الإخوان، و ياخدوا الكلام علي نفسهم ؟ طب زعلانين ليه، هو قال الإخوان و لا الإرهابيين ؟! ده بدل ما تقولوا: لبيك يا مصر، و نخلي خلافاتنا علي جنب..!

يعني مفيش عندكم ذكاء سياسي، حيلة سياسية، مكر سياسي، دهاء سياسي.. أي حاجة من كدة.. و لا أعصابكم تعبانة أوي للدرجة دي.

و طلع أدون عريان يقولك: علي القوي الغربية رفع دعمها عن رجلها في مصر! ( قصده السيسي يعني)! قام علي طول عمك الحاج أوباما أجل تسليم مصر طائرتان إف 16 ! ، ياه يا ولاد العريان سره باتع..غمز لأوباما فاوباما ما صدق.. كلامك .. اوامر للبيت الأبيض، أدون عريان.. كله إلا زعلك يا راجل...!! هو اوباما يستجري ينزل لك كلمة..! هو لو السيسي عميل لأمريكا يبقي المفروض أمريكا في الوقت ده تزوده بسلاح و أموال و لا تعاكسه بالحركة الصغيرة دي .. من القزم أوباما.. عموماً يا أوباما .. ربنا يبارك في الطيارات السوخوي.. و المساعدات العربية.. خد مع طياراتك معونتك و سلاحك .. كله ع الجزمة زي ما قالها زمان قاهر الامريكان و الاخوان، خالد الذكر جمال عبد الناصر.. ع الجزمة أي حاجة تكون سبب في التدخل في سياسة مصر الداخلية.. السيسي حيصحح أخطاء ما بعد أكتوبر.. يا تري يا مستر أبو عمامة .. فهمت رسالة السيسي و لا لسة : مصر أم الدنيا، و حتبقي أم الدنيا ؟! أوباما .. طير انتَ..و سلملنا بقا علي مستر شيمون بيريز الصديق الوفي للمعزول مرسي. مستر اوباما .. أمك في العشة و لا طارت؟!

و نرجع تاني.. ليه الإخوان خدوا التحذير عليهم.. هما لا سمح الله إرهابيين ؟ دول سلميين خالص، آخر حاجة.. السلمية بتشٌر منهم كدة، عادي هو حد سمع حد منهم، لا سمح الله قال: لو مرسي مكسبش الرئاسة حنولع البلد؟ طب مرسي نفسه مقالش شرعيتي بالدم ؟ يعني اختارلك يا شعب حل من الاتنين: يا إما فيها لأخفيها! علي طريقة شمشون، أهد المعبد كله، او علي طريقة حماس غخوان فلسطين، يا نحكم فلسطين، يا نعمل حرب اهلية و نستقل بغزة ؟ طب سيبك سيبك ياللي ظالمهم و بتفتري عليهم، مين الحلو الجميل الأمور مليح القسمات منتفخ الأوداج ساهم النظر الي قال: سيبوا مرسي و سينا تهدي في ثانية؟ أحبيبي أبلطج..!!

و مع ذلك السيسي قال لمواجهة الإرهاب المحتمل، يعني من تعامل بسلمية فإحنا معاه سلميين ، من تعامل بإرهاب حنكسر رقبته شعب و جيش.

طب و هو السيسي ليه بيطلب التفويض من الشعب، رغم ان ده يقع في نطاق سلطة الجيش، الحفاظ علي الأمن القومي لمصر؟

أنا سعيد إنك سألت السؤال ده. بُص يا عم. الإخوان بتلعب لعبة قذرة هدفها إستدعاء قوات دولية ( تحديداً الناتو) للتدخل العسكري في مصر، زي اللي حصل كدة في ليبيا، و ما ادرك ما ليبيا و حالها وصل لإيه، و حصار إقتصادي زي اللي اتفرض ع العراق، و إعطاء غطاء سياسي دولي لها لتجهيز الجيش المصري الحر، علي غرار الجيش السوري الحر.. و يقيموا دولة موازية. و متنساش إن الحيزبونة الأمريكية في مصر قالت لهم: إحكموا من رابعة..!

عشان تُجهَض الخطة دي، يبقي لازم المعركة ضد المخطط الخطير ده تكون معركة جيش و شعب. نزولك يوم الجمعة القادم ( الموافق ل 17 رمضان ) مهم لإنه:حيكون كارت مهم جداً، ان الشعب كله مع عزل مرسي في 3 يوليو و ليس صحيحاً إدعاءات الجزيرة و أخواتها من الإعلام الصهيوني الغربي إن في إنشقاق، إنقسام و تنازع علي السلطة في مصر، بين قوتين متكافتين، علي الأرض. في كلمة واحدة: إنزل إحمي مكتسبات 3 يوليو.. لإنها لسة في خطر.

17 رمضان هو تاريخ هدد فيه البلتاجي بالعتف ، علي فكرة.

أيضاً، لما الجيش يحارب البؤر الإرهابية في سيناء فده محدش يقدر يفتح بُقه عليه، إنما لو الجيش أو حتي الشرطة (آه و الله) إشتغلوا علي محاربة الإرهاب خارج سيناء، فده مع وجود إعلام مٌضلل يقف بجانب الإخوان، سيتم إستغلاله من جانبهم علي ان الجيش يرتكب جرائم ضد الإنسانية، من الآخر: الجيش و الشرطة معاهم شرعية قانونية، لمحاربة الإرهاب، ده صحيح، لكن نزولك في اليوم ده سيعطيه – أيضاَ- شرعية شعبية أمام العالم كله، بالتالي محاولات زي اللجوء لمحكمة العدل الدولية لمحاكمة قادة الجيش أمامها حتفشل و ده جزء من المخطط الإخواني الأمريكي. و إفشال المخطط ده بيجنب مصر إنها تكون فريسة للتدخل الأجنبي.

كمان ده جزء مهم جداً في إحداث هزيمة معنوية للإرهابيين. و تحقيق عملي لشعار : الشعب و الجيش إيد واحدة.


دي حرب جديدة، لازم تتلعب علي قواعد النظام العالمي الجديد اللي هي : الديموقراطية و حقوق الانسان. بصراحة المجتمع المدني المصري مخترق بجمعيات حقوقية، و كتاب .. و نشطاء .. بيشتغلوا لخدمة الاجندة الامريكية .. و البركة في الدولار...! كدة حيخرسوا و يلموا نفسهم .. عشان نتفرغ لحربنا علي الارهاب بمزاج عالي..

خذوا حذركم منهم.

يا شعب مصر أنتم كلكم جنود في هذه المعركة. سلاحكم: النزول للميادين، ردع كل من يتقول كلام او يروج شائعات هدفها شق الصف الوطني، وسائل الإعلام و المواقع الاجتماعية زي الفيسبوك و تويتر و يوتيوب.. و الكلمة بشكل عام... آه و الله.



عرفت ليه بقا الإخوان الإرهابيين، و اوباما صديق الإرهابيين، ركبهم خبطت ليه...؟



بالمناسبة الجمعة 26/7/2013 حيوافق الإحتفال بعيد جلاء المستعمر البريطاني. كل جلاء و أنتم طيبين.

#محمد_مجدي (هاشتاغ)      

---

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات