( أحنه صف النجيفي ) !!!!

حامد كعيد الجبوري

الحوار المتمدن-العدد: 4158 - 2013 / 7 / 19 - 18:08
المحور: كتابات ساخرة
    

حمدا لله أن ساستنا وبرلمانيونا رضي الله عنهم وأرضاهم وجعل الجنة الخضراء في بغداد مأواهم قد أكملوا كل شئ يخص الوطن والمواطن ، و ( خطية ) أنساهم الشيطان ذكر أنفسهم فلم يحصلوا من خيرات العراق شئ ، الكهرباء للمواطن ( النايم للظهر ) ، الرواتب والامتيازات والسفرات والولائم للمواطن ( الخده ) ومعلوم أن ( الخده ) يشبه ( التنبل ) الذي لا يعمل وينتظر من يعمل له ، الأمن ( براحتك ) من الشمال للجنوب للشرق للغرب لا تفجير ولا تفخيخ ولا تهجير ولا طائفية ، أذا أنت سني روح صلي بمسجد الشيعة ، وأذا شيعي روح صلي بالجامع ومن تخلص ينتظروك ويودوك لأقرب مطعم وميخذون منك فلوس ، ويبيتوك بفراشهم وأذا ما متزوج يزوجوك ، أذا مسيحي وين تريد روح محلل وما هوب ، عيني صار كلشي بالعراق ورده ، الزرع أخضر ، الورد تعال وأشتم ، بقه بس العلم والنشيد الوطني ، العلم الجبور يريدون يخلون ( بيرغهم ) ، الدليم يكولون لا ميصير لازم أنخلي ( رايتنه ) ، المهم أتذابحت العشاير بيناتهم والحكومة تتفرج ، النوب الكرد هم كالوا بويه شنو هذا العلم بيه نجمات وبيه الله واكبر شنو عدنه مذابح ، خطيه التركمان سا كتين كلشي ما حصلوا ، الحكومة لكت خوش حل كالت خلوا العلم الغير وكت ، النوب صارت وثارت قضية النشيد الوطني ، ( حاتم سليمان ) شيخ مدري أمير الدليم يريد أغنية ساجدة عبيد ( عمت عينج ييمه أنكسرت الشيشه ) ، يا بويه من سمعوا أهل الحلة طلعوا مظاهرات عارمة وكالوا على ركابنه منريد الكاولية تسوي النشيد الوطني نريد أغنية سعدي الحلي ( دنك يا حلو ليلوحك القناص ) ، خو اهل الناصرية حشمت عشايرها وكالو والله غير أغنية ابو كاظم ( داخل حسن ) لو ( خضير مفطورة ) لو ( ناصر حكيم ) ولا نقبل بغيره نشيد ونسوي دمها للرجاب ، النوب كبت العمارة تريد أغنية ( مسعود مدري مسعودة ) العمارتليه ( فوك القصر طياره ) ، وهاشو الكرد ، والتركمان ، واليزيدين وألصابئين وكلمن يريد يخلي النشيد الوطني من تاريخه وتراثه العظيم ، ولكم والله عيب وفشله على لحاياكم ، لنعل أبو لأمريكان ، لابوا المعدان ، لابو السياسة ، لابو المدري شنو ، ولكم والله صرنه مهزلة ، عمي متذكرون يوم طب الفريق العراقي يلعب طوبه مدري وين وما عدهم نشيد الوطني محد يحفظها ، مو وكف المدرب يصيح والفريق يردد وراه ( بلي يبلبول / بلي / ماعدنه عصفور / بلي / يلعب بالطاسه / بلي ) ، عمي انتوا أهل الخضراء المهجومة أذا شفتوا هذا النشيد ميوالمكم ننطيكم غيره وأكو هواي مثله ، وبما انكم جهلة وطلاب أبتدائية أنعلمكم ( أحنه صف النجيفي أحسن الصفوف / والميصدك بينه خل يجي ويشوف ) ، ميعجبكم أخذوا هذا ( يا بط يا بط / أسبح بالشط ) . للإضاءة ..... فقط .

#حامد_كعيد_الجبوري (هاشتاغ)      

---

---

الحوار المتمدن مشروع تطوعي مستقل يسعى لنشر قيم الحرية، العدالة الاجتماعية، والمساواة في العالم العربي. ولضمان استمراره واستقلاليته، يعتمد بشكل كامل على دعمكم. ساهم/ي معنا! بدعمكم بمبلغ 10 دولارات سنويًا أو أكثر حسب إمكانياتكم، تساهمون في استمرار هذا المنبر الحر والمستقل، ليبقى صوتًا قويًا للفكر اليساري والتقدمي، انقر هنا للاطلاع على معلومات التحويل والمشاركة في دعم هذا المشروع.
 

اشترك في قناة ‫«الحوار المتمدن» على اليوتيوب
حوار مع الكاتبة انتصار الميالي حول تعديل قانون الاحوال الشخصية العراقي والضرر على حياة المراة والطفل، اجرت الحوار: بيان بدل	حوار مع الكاتب البحريني هشام عقيل حول الفكر الماركسي والتحديات التي يواجهها اليوم، اجرت الحوار: سوزان امين

كيف تدعم-ين الحوار المتمدن واليسار والعلمانية على الانترنت؟

تابعونا على:

الفيسبوك

التويتر

اليوتيوب

RSS

الانستغرام

لينكدإن

تيلكرام

بنترست

تمبلر

بلوكر

فليبورد

الموبايل

كيفية إشراك-إيصال مواضيعكم أو مواضيع تهمكم  إلى اكبر عدد ممكن من القراء والقارئات